स्तोत्रसंहिता 130 - पवित्र शास्त्र RV (Re-edited) Bible (BSI)

परमेश्वराच्या द्वारे मिळणार्‍या तारणाविषयी आशा

आरोहणस्तोत्र.

¹ हे परमेश्वरा, मी शोकसागरातून तुझा धावा करीत आहे.

² हे प्रभू, माझी वाणी ऐक; माझ्या विनवणीच्या शब्दांकडे तुझे कान लागोत.

³ हे परमेशा, तू अन्याय लक्षात आणशील, तर हे प्रभू, तुझ्यापुढे कोण टिकाव धरील?

⁴ तरीपण लोकांनी तुझे भय धरावे म्हणून तुझ्या ठायी क्षमा आहे.

⁵ मी परमेश्वराची अपेक्षा करतो, माझा जीव अपेक्षा करतो, आणि मी त्याच्या वचनाची आशा धरतो.

⁶ पहाटेची वाट पाहणार्‍या पहारेकर्‍यांपेक्षा, पहाटेची वाट पाहणार्‍या पहारेकर्‍यांपेक्षा माझा जीव प्रभूची अधिक वाट पाहतो.

⁷ हे इस्राएला, परमेश्वराची आशा धर, कारण परमेश्वराच्या ठायी दया आहे; त्याच्याजवळ उद्धार विपुल आहे;

⁸ तो इस्राएलास त्याच्या सर्व अधर्मांपासून मुक्त करील.