स्तोत्रसंहिता 129 - पवित्र शास्त्र RV (Re-edited) Bible (BSI)

सीयोनेच्या शत्रूंचा पाडाव व्हावा म्हणून प्रार्थना

आरोहणस्तोत्र.

¹ आता इस्राएलाने म्हणावे की, “माझ्या तरुणपणापासून त्यांनी मला फार पिडले आहे;”

² “माझ्या तरुणपणापासून त्यांनी मला फार पिडले आहे, तरी माझ्याविरुद्ध त्यांचे काही चालले नाही.

³ नांगरणार्‍यांनी माझी पाठ नांगरली; त्यांनी आपल्या नांगरांनी लांबलांब तासे काढली.”

⁴ परमेश्वर न्यायी आहे; दुर्जनांनी आवळलेली बंधने त्याने तोडली.

⁵ जे कोणी सीयोनेशी वैर करतात ते फजीत होवोत आणि मागे फिरोत.

⁶ धाब्यांवरचे गवत जसे वाढण्यापूर्वीच सुकून जाते तसे ते होवोत;

⁷ कापणार्‍याच्या मुठीत ते येत नाही, पेंढ्या बांधणार्‍याच्या कवेत ते भरत नाही.

⁸ जवळून येणारेजाणारे त्यांना एवढेसुद्धा म्हणत नाहीत की, “परमेश्वराचा आशीर्वाद तुम्हांला प्राप्त होवो, परमेश्वराच्या नावाने आम्ही तुम्हांला आशीर्वाद देतो.”