स्तोत्रसंहिता 124 - पवित्र शास्त्र RV (Re-edited) Bible (BSI)

शत्रूंच्या तावडीतून सुटल्याबद्दल उपकारस्तुती

दाविदाचे आरोहणस्तोत्र.

¹ आता इस्राएलाने म्हणावे की, जर परमेश्वर आमच्या पक्षाचा नसता,

² लोक आमच्यावर उठले तेव्हा जर परमेश्वर आमच्या पक्षाचा नसता,

³ तर त्यांचा क्रोध आमच्यावर भडकला त्या वेळी त्यांनी आम्हांला जिवंत गिळून टाकले असते;

⁴ जलांनी आम्हांला बुडवले असते; त्यांचा लोंढा आमच्या गळ्याशी आला असता;

⁵ खवळलेले लोंढे आमच्या गळ्याशी आले असते.

⁶ परमेश्वराचा धन्यवाद होवो; त्याने आम्हांला त्यांच्या दाढांत भक्ष्य म्हणून पडू दिले नाही.

⁷ आमचा जीव पक्ष्याप्रमाणे पारध्यांच्या पाशांतून मुक्त झाला आहे; पाश तुटून आम्ही मुक्त झालो आहोत.

⁸ आकाश व पृथ्वी ह्यांचा निर्माणकर्ता जो परमेश्वर त्याच्या नावामुळे आम्हांला साहाय्य मिळते.