स्तोत्रसंहिता 122 - पवित्र शास्त्र RV (Re-edited) Bible (BSI)

यरुशलेमेच्या कुशलासाठी प्रार्थना

दाविदाचे आरोहणस्तोत्र.

¹ “आपण परमेश्वराच्या घराकडे जाऊ” असे ते मला म्हणाले, तेव्हा मला आनंद झाला.

² हे यरुशलेमे, तुझ्या वेशींना आमचे पाय लागले आहेत.

³ हे यरुशलेमे, एकत्र जोडलेल्या नगरीसारखी तू बांधलेली आहेस.

⁴ इस्राएलास लावून दिलेल्या निर्बंधाप्रमाणे तुझ्याकडे वंश ― परमेशाचे वंश ― परमेश्वराच्या नावाचे उपकारस्मरण करण्यासाठी चढून येतात,

⁵ कारण तेथे न्यायासने, दाविदाच्या घराण्याची राजासने मांडली आहेत.

⁶ यरुशलेमेच्या शांतीसाठी प्रार्थना करा. “तुझ्यावर प्रीती करणार्‍यांचे कल्याण असो.

⁷ तुझ्या कोटात शांती वसो; तुझ्या राजवाड्यात समृद्धी नांदो.”

⁸ माझे बंधू व माझे मित्र ह्यांच्यासाठी “तुझ्यामध्ये शांती वसो” अशी मी प्रार्थना करीन.

⁹ परमेश्वर आमचा देव ह्याच्या घरासाठी तुझ्या कल्याणासाठी मी झटत जाईन.