स्तोत्रसंहिता 116 - पवित्र शास्त्र RV (Re-edited) Bible (BSI)

मृत्यूपासून सुटका झाल्याबद्दल उपकारस्तुती

¹ मी परमेश्वरावर प्रेम करतो कारण तो माझी विनवणी ऐकतो.

² त्याने आपला कान माझ्याकडे लावला आहे, म्हणून मी जन्मभर त्याचा धावा करीन.

³ मृत्यूच्या बंधनांनी मला वेष्टले, मला अधोलोकाच्या यातना झाल्या, मला उपद्रव व क्लेश झाले,

⁴ तेव्हा मी परमेश्वराच्या नावाचा धावा करून म्हणालो, “हे परमेश्वरा, तुला मी विनवतो की माझा जीव मुक्त कर.”

⁵ परमेश्वर कृपाळू व न्यायी आहे; आमचा देव कनवाळू आहे.

⁶ परमेश्वर भोळ्यांचे रक्षण करतो; मी दीनावस्थेत होतो तेव्हा त्याने माझा उद्धार केला.

⁷ हे माझ्या जिवा, तू आपल्या विश्रामस्थानी परत ये, कारण परमेश्वराने तुझ्यावर पुष्कळ उपकार केले आहेत.

⁸ तू माझा जीव मरणापासून, माझे डोळे अश्रूंपासून, माझे पाय ठेचाळण्यापासून वाचवले आहेत.

⁹ जिवंतांच्या भूमीवर मी परमेश्वरासमोर चालेन.

¹⁰ “मी फार पीडित आहे,” असे मी म्हणतो; तरी देवावर माझी श्रद्धा आहे.

¹¹ मी अधीरपणे म्हणालो की, “सर्व माणसे लबाड आहेत.”

¹² परमेश्वराने माझ्यावर केलेल्या सर्व उपकारांबद्दल मी त्याचा कसा उतराई होऊ?

¹³ मी तारणाचा प्याला हाती घेऊन परमेश्वराच्या नावाचा धावा करीन.

¹⁴ परमेश्वराला केलेले नवस मी त्याच्या सर्व लोकांसमक्ष फेडीन.

¹⁵ परमेश्वराच्या दृष्टीने त्याच्या भक्तांचे मरण अमोल आहे.

¹⁶ हे परमेश्वरा, मी खरोखर तुझा दास आहे; मी तुझा दास, तुझ्या दासीचा पुत्र आहे; तू माझी बंधने सोडली आहेत.

¹⁷ मी तुला उपकारस्तुतीचा यज्ञ करीन, परमेश्वराच्या नावाचा धावा करीन.

¹⁸ परमेश्वराला केलेले नवस मी त्याच्या सर्व लोकांसमक्ष फेडीन.

¹⁹ परमेश्वराच्या घराच्या अंगणात, हे यरुशलेमा, तुझ्यामध्ये ते फेडीन. परमेशाचे स्तवन करा!1