स्तोत्रसंहिता 114 - पवित्र शास्त्र RV (Re-edited) Bible (BSI)

आश्‍चर्यकारक निर्गमन

¹ इस्राएल मिसर देशातून निघाला, याकोबाचे घराणे परकी भाषा बोलणार्‍या लोकांतून निघाले,

² तेव्हा यहूदा त्याचे पवित्रस्थान झाला, इस्राएल त्याचे राज्य झाला.

³ हे पाहून समुद्र पळाला; यार्देन मागे हटली.

⁴ पर्वतांनी मेंढ्यांसारख्या आणि टेकड्यांनी कोकरांसारख्या उड्या मारल्या.

⁵ हे समुद्रा, तुला काय झाले म्हणून तू पळतोस? हे यार्देने, तुला काय झाले म्हणून तू मागे हटतेस?

⁶ अहो पर्वतांनो, तुम्हांला काय झाले म्हणून तुम्ही मेंढ्यांसारख्या उड्या मारता? अहो टेकड्यांनो, तुम्हांला काय झाले म्हणून तुम्ही कोकरांसारख्या उड्या मारता?

⁷ हे पृथ्वी, तू प्रभूसमोर, याकोबाच्या देवासमोर, थरथर काप.

⁸ तो खडक पालटून पाण्याचे तळे करतो, गारेचा खडक पालटून पाण्याचा झरा करतो.