स्तोत्रसंहिता 113 - पवित्र शास्त्र RV (Re-edited) Bible (BSI)

दीनाला उच्च केल्याबद्दल स्तुती

¹ परमेशाचे स्तवन करा!1 परमेश्वराचे सेवकहो, तुम्ही त्याचे स्तवन करा; परमेश्वराच्या नामाचे स्तवन करा.

² येथून पुढे सर्वकाळ परमेश्वराच्या नावाचा धन्यवाद होवो.

³ सूर्याच्या उगवतीपासून मावळतीपर्यंत परमेश्वराचे नाव स्तवनीय आहे.

⁴ परमेश्वर सर्व राष्ट्रांहून उन्नत आहे; त्याचे वैभव आकाशाहून उंच आहे;

⁵ परमेश्वर आमचा देव जो उच्च स्थळी राजासनारूढ आहे,

⁶ जो आकाश व पृथ्वी ह्यांचे अवलोकन करण्यास लवतो, त्याच्यासारखा कोण आहे?

⁷ तो कंगालास धुळीतून उठवतो, दरिद्र्यास उकिरड्यावरून उचलतो;

⁸ आणि त्यांना अधिपतींच्या, आपल्या लोकांच्या अधिपतींच्या पंक्तीस बसवतो.

⁹ तो वांझ स्त्रीला गृहिणी करून मुलांची आनंदी माता करतो. परमेशाचे स्तवन करा!1