स्तोत्रसंहिता 108 - पवित्र शास्त्र RV (Re-edited) Bible (BSI)

शत्रूंविरुद्ध साहाय्याची याचना

दाविदाचे संगीतस्तोत्र.

¹ हे देवा, माझे मन स्थिर आहे; मी गाईन, मी जिवेभावे स्तोत्र गाईन.

² हे सतारी, हे वीणे, जागृत व्हा; मी प्रभातेला जागे करीन.

³ हे परमेश्वरा, लोकांमध्ये मी तुझे उपकारस्मरण करीन; राष्ट्रांमध्ये तुझी स्तोत्रे गाईन.

⁴ कारण तुझी दया आकाशाहून उंच आहे, व तुझे सत्य गगनापर्यंत आहे.

⁵ हे देवा, आकाशाहून तू उन्नत हो; तुझा गौरव सर्व पृथ्वीभर होवो.

⁶ तुझ्या प्रिय जनांनी मुक्त व्हावे म्हणून तू आपल्या उजव्या हाताने त्यांचे तारण कर आणि आमचे ऐक.

⁷ देव आपल्या पवित्रतेला अनुसरून म्हणाला, “मी उल्लास पावेन; मी शखेम विभागीन व सुक्कोथाचे खोरे मोजून देईन;

⁸ गिलाद माझा आहे व मनश्शे माझा आहे; एफ्राईम माझे शिरस्त्राण आहे; यहूदा माझे राजवेत्र आहे.

⁹ मवाब माझे स्नानाचे गंगाळ आहे; अदोमावर मी आपले पायतण फेकीन; पलेशेथाविषयी मी जयघोष करीन.”

¹⁰ मला तटबंदीच्या नगरात कोण घेऊन जाईल? अदोमात मला कोण नेईल?

¹¹ हे देवा, तू आमचा त्याग केलास ना? हे देवा, तू आमच्या सैन्याबरोबर चालत नाहीस.

¹² शत्रूंपासून तू आमची सुटका कर; कारण मनुष्याचे साहाय्य केवळ व्यर्थ आहे.

¹³ देवाच्या साहाय्याने आम्ही पराक्रम करू; तोच आमच्या शत्रूंना तुडवून टाकील.