नीतिसूत्रे 24 - पवित्र शास्त्र RV (Re-edited) Bible (BSI)

¹ दुर्जनांचा हेवा करू नकोस, त्यांच्या संगतीची इच्छा धरू नकोस.

² त्यांचे अंत:करण बलात्कार करण्याचा बेत करते, त्यांच्या वाणीतून घातपाताचे बोल निघतात.

³ सुज्ञानाच्या योगे घर बांधता येते; समंजसपणाने ते मजबूत राहते;

⁴ ज्ञानाच्या योगे त्याच्या खोल्या सर्व प्रकारच्या मोलवान व मनोरम वस्तूंनी भरून जातात.

⁵ सुज्ञ पुरुष बलवान असतो; ज्ञानी मनुष्य आपले बल दृढ करतो.

⁶ शहाणपणाने व्यवस्था करून युद्ध चालव; बहुत सुमंत्री असल्याने यश मिळते.

⁷ ज्ञान मूर्खाच्या आटोक्याबाहेर असते; वेशीवर तो आपले तोंड उघडीत नाही.

⁸ जो दुष्कर्म करण्याचे योजतो, त्याला लोक घातकी माणूस म्हणतात.

⁹ मूर्खाचा विचार पापरूप असतो; निंदकाचा लोकांना वीट येतो.

¹⁰ संकटकाली तुझे धैर्य खचले तर तुझी शक्ती अल्प होय.

¹¹ ज्यांना ठार मारण्यासाठी धरून नेत असतील त्यांना सोडव, ज्यांच्या वधाची तयारी झाली आहे त्यांचा बचाव करण्याचा साधेल तेवढा प्रयत्न कर.

¹² “आम्हांला हे ठाऊक नव्हते” असे म्हणशील तर हृदये तोलून पाहणार्‍याला हे कळत नाही काय? तुझा जीव राखणार्‍याला माहीत नाही काय? तो प्रत्येकाला ज्याच्या त्याच्या कृतीप्रमाणे प्रतिफळ देत नाही काय?

¹³ माझ्या मुला, मध खा, तो चांगला आहे, मधाचे पोळे खा; ते तुझ्या जिभेला गोड लागते;

¹⁴ असेच ज्ञान तुझ्या जिवाला आहे असे समज; ते तुला प्राप्त झाले तर फलप्राप्ती घडेल; तुझी आशा खुंटणार नाही.

¹⁵ अरे दुष्टा, नीतिमानाच्या घराचा नाश करण्यास टपू नकोस, त्याच्या विश्रांतिस्थानाचा बिघाड करू नकोस;

¹⁶ कारण नीतिमान सात वेळा पडला तरी पुन्हा उठतो, पण दुर्जन अरिष्ट आल्याबरोबर जमीनदोस्त होतात.

¹⁷ तुझा वैरी पडला तर त्याबद्दल आनंद मानू नकोस, तो जमीनदोस्त झाल्याने तुझे मन उल्लासू नये;

¹⁸ उल्लासले तर ते परमेश्वर पाहील आणि त्याला ते आवडणार नाही आणि तो त्याच्यापासून आपला क्रोध फिरवील.

¹⁹ दुष्कर्म्यांवर जळफळू नकोस; दुर्जनांचा मत्सर करू नकोस.

²⁰ कारण दुष्कर्म्यास चांगली गती नाही; दुर्जनांचा दीप मालवेल.

²¹ माझ्या मुला, परमेश्वराचे व राजाचे भय बाळग. जे चंचल वृत्तीचे आहेत त्यांच्यात मिसळू नकोस;

²² कारण त्यांच्यावर विपत्ती अचानक येईल, आणि त्यांच्या आयुष्याचा क्षय केव्हा होईल कोण जाणे?

²³ हीही सुज्ञाची वचने आहेत. तोंड पाहून न्याय करणे ठीक नाही.

²⁴ “तू नीतिमान आहेस” असे जो दुर्जनास म्हणतो, त्याला लोक शाप देतील, राष्ट्रे त्याचा तिटकारा करतील;

²⁵ पण जे दुर्जनास ठपका देतील त्यांचे बरे होईल, त्यांना चांगला आशीर्वाद मिळेल.

²⁶ जो योग्य उत्तर देतो तो जणू काय ओठांचे चुंबन देतो.

²⁷ तुझे बाहेरचे व शेतातले जे काम ते आधी कर, मग आपले घर बांध.

²⁸ आपल्या शेजार्‍याविरुद्ध विनाकारण साक्ष देऊ नकोस; तू आपल्या वाणीने ठकवू नकोस.

²⁹ “मी जशास तसे करीन, त्याचे उसने फेडीन,” असे म्हणू नको.

³⁰ एकदा मी आळशाच्या शेताजवळून, बुद्धिहीनाच्या द्राक्षमळ्याजवळून जात होतो;

³¹ तेव्हा तो काटेर्‍यांनी भरून गेला आहे, त्याची जमीन खाजकुइरीने व्यापली आहे, व त्याची दगडी भिंत कोसळली आहे, असे मला आढळले.

³² ते मी पाहिले, त्याचा विचार केला, आणि ते पाहून मी बोध घेतला.

³³ “आणखी थोडीशी झोप घेतो, आणखी थोडीशी डुलकी घेतो, हात उराशी धरून जरा निजतो,”

³⁴ असे म्हणत जाशील तर दारिद्र्य तुला दरोडेखोराप्रमाणे, गरिबी तुला हत्यारबंद माणसाप्रमाणे गाठील.