नीतिसूत्रे 2 - पवित्र शास्त्र RV (Re-edited) Bible (BSI)

ज्ञानार्जनाचे फायदे

¹ माझ्या मुला, जर तू माझी वचने स्वीकारशील, माझ्या आज्ञा आपल्याजवळ साठवून ठेवशील,

² आपला कान ज्ञानाकडे देशील, आणि आपले मन सुज्ञानाकडे लावशील,

³ जर तू विवेकाला हाक मारशील, सुज्ञतेची आराधना करशील,

⁴ जर तू रुप्याप्रमाणे त्याचा शोध करशील, व गुप्त निधींप्रमाणे त्याला उमगून काढशील,

⁵ तर परमेश्वराच्या भयाची तुला जाणीव होईल, आणि देवाविषयीचे ज्ञान तुला प्राप्त होईल.

⁶ कारण ज्ञान परमेश्वर देतो; त्याच्या मुखातून ज्ञान व सुज्ञता येतात;

⁷ सरळांसाठी तो यश:प्राप्ती सुलभ करतो; सात्त्विकपणे चालणार्‍यांना तो ढाल आहे;

⁸ अशासाठी की त्याने नीतिमार्गांचे रक्षण करावे आणि आपल्या भक्तांचा मार्ग सांभाळावा.

⁹ नीतिमत्ता, न्याय व सात्त्विकता अशा सर्व सन्मार्गांची तुला जाणीव घडेल.

¹⁰ कारण ज्ञान तुझ्या चित्तात प्रवेश करील, आणि विद्या तुझ्या जिवाला रम्य वाटेल;

¹¹ विवेक तुझे रक्षण करील, समंजसपणा तुला सांभाळील;

¹² म्हणजे कुमार्गापासून, विवेकशून्य गोष्टी करणार्‍या मनुष्यांपासून, तो तुला दूर ठेवील;

¹³ ते सरळपणाचे मार्ग सोडून अंधकाराच्या मार्गांनी चालतात;

¹⁴ त्यांना दुष्कर्म करण्यात आनंद वाटतो, दुष्कर्माच्या कुटिलतेवरून ते उल्लास पावतात;

¹⁵ त्यांचे मार्ग वाकडे आहेत, त्यांच्या वाटा विपरीत आहेत.

¹⁶ परस्त्रीपासून, मोहक भाषण करणार्‍या परस्त्रीपासून, ज्ञान तुझा बचाव करील;

¹⁷ तिने आपल्या तरुणपणाचा मित्र सोडला आहे, ती आपल्या देवाचा करार विसरली आहे;

¹⁸ तिच्या घरातून मृत्युमुखाकडे वाट आहे, तिच्या वाटा मेलेल्यांकडे जातात;

¹⁹ जे तिच्याकडे जातात त्यांच्यातून कोणी परत येत नाही, त्यांना जीवनाचे मार्ग साधत नाहीत;

²⁰ ह्यास्तव तू भल्यांच्या मार्गाने चालावे व नीतिमानांच्या रीतीचे अवलंबन करावे.

²¹ कारण सरळ जनच देशात वस्ती करतील; सात्त्विक जन त्यात राहतील.

²² दुर्जनांचा देशातून उच्छेद होईल, अनाचार्‍यांचे त्यातून निर्मूलन होईल.