नहूम 3 - पवित्र शास्त्र RV (Re-edited) Bible (BSI)

¹ रक्तपाती नगरीला धिक्कार असो! कपट व खून ह्यांनी ती भरली आहे, तिचे भक्ष्य मिळवणे थांबत नाही.

² चाबकाचा फटकारा, चाकांचा घडघडाट ह्यांचा शब्द होत आहे; घोडे भरधाव पळत आहेत, रथ उसळत आहेत;

³ घोडेस्वारांची दौड, तलवारींची चमक, भाल्यांचे विजेसारखे चकाकणे होत आहे; वधलेल्यांचा समुदाय, मृतांचा ढीग पडला आहे; मढ्यांचा हिशेबच नाही; लोक त्यांच्या मढ्यांवर ठोकर खातात.

⁴ सुरूप व चेटकात निपुण अशा त्या वेश्येच्या बहुत व्यभिचारांमुळे हे घडले आहे; ती आपल्या व्यभिचारांनी राष्ट्रांचा, आपल्या चेटकांनी वंशांचा विक्रय करते.

⁵ पाहा, मी तुझ्यावर चालून येत आहे असे सेनाधीश परमेश्वर म्हणतो; मी तुझे नेसण तुझ्या तोंडावर उडवून देईन; राष्ट्रांना तुझी नग्नता दाखवीन, राज्यांना तुझी लाज दाखवीन.

⁶ तुझ्यावर हेंदर फेकून तुला तुच्छ करीन, तुला उपहासविषय करीन.

⁷ आणि असे होईल की जो कोणी तुला पाहील तो तुझ्यापासून पळ काढील आणि म्हणेल, निनवे उजाड झाली आहे; तिच्यासाठी कोण शोक करील? तुझे सांत्वन करणार्‍यांना कोठून शोधून आणू?

⁸ नोआमोनापेक्षा तू श्रेष्ठ आहेस काय? ती नील नदीच्या फाट्यांमध्ये वसली होती, तिच्यासभोवती पाणी होते; नील नदी2 तिचा दुर्ग होती, पाणी हाच तिचा कोट होता.

⁹ कूशी व मिसरी ह्यांचे तिला बल होते व ते अमर्याद होते; पूटी व लूबी ह्यांची तिला कुमक होती.

¹⁰ तरी ती हद्दपार झाली, तिला बंदिवान करून नेण्यात आले; तिची मुले रस्त्यांच्या सर्व चवाठ्यांवर आपटून मारण्यात आली; तिच्या सरदारांवर चिठ्ठ्या टाकण्यात आल्या, तिच्या सर्व महाजनांना साखळ्यांनी बांधण्यात आले.

¹¹ तूही झोकांड्या खाशील, तू लपशील, तू शत्रूपासून आश्रयाचे स्थान शोधशील.

¹² पहिल्या बाराच्या पिकलेल्या अंजिरांच्या झाडाप्रमाणे तुझे सर्व दुर्ग होतील; झाडे हलवली म्हणजे अंजीर खाणार्‍याच्या तोंडी पडतात.

¹³ पाहा, तुझ्यात राहणारे लोक केवळ स्त्रिया आहेत; तुझ्या देशाचे दरवाजे तुझ्या शत्रूंना खुले झाले आहेत; अग्नीने तुझे अडसर खाऊन टाकले आहेत.

¹⁴ वेढा पडणार म्हणून पाणी भरून ठेव; तुझे किल्ले मजबूत कर, चिखलात उतर, पायांनी गारा तुडव, विटाळे हाती घे.

¹⁵ तेथे तुला विस्तव खाईल, तुला तलवार नष्ट करील; ती तुला चाटून खाणार्‍या टोळांप्रमाणे खाऊन फस्त करील; चाटून खाणार्‍या टोळांप्रमाणे आपली संख्या वाढव; झुंडींनी येणार्‍या टोळांप्रमाणे असंख्य हो.

¹⁶ आकाशातील तार्‍यांपेक्षा अधिक सौदागर तू केले आहेत, तरी चाटून खाणारे टोळ त्यांना नागवून उडून जातील.

¹⁷ तुझे सरदार झुंडींनी येणार्‍या टोळांसारखे आहेत, तुझे सेनापती टोळांच्या झुंडीसारखे आहेत; ते थंडीच्या दिवसांत कुंपणात तळ देतात व सूर्योदय होताच पळून जातात; ते कोठे गेले ते कोणास कळत नाही.

¹⁸ अश्शूरच्या राजा, तुझे मेंढपाळ झोपी गेले आहेत; तुझे सरदार स्वस्थ पडले आहेत; तुझे लोक डोंगरावर पसरले आहेत; कोणी त्यांना एकत्र करत नाही.

¹⁹ तुझी जखम भरत नाही; तुझा घाय असाध्य आहे; तुझी बातमी ऐकणारे सर्व तुझ्याविषयी टाळ्या पिटतात; कारण ज्याला तुझी दुष्टता सतत जाचली नाही असा कोण आहे?