लेवीय 17 - पवित्र शास्त्र RV (Re-edited) Bible (BSI)

अर्पणे करण्याचे एकमेव स्थळ

¹ परमेश्वर मोशेला म्हणाला,

² “अहरोन, त्याचे मुलगे आणि सर्व इस्राएल लोक ह्यांना सांग की, परमेश्वराने आज्ञा केली आहे ती ही :

³ इस्राएल घराण्यातील एखाद्या माणसाने छावणीत किंवा छावणीबाहेर बकरा मारला,

⁴ पण परमेश्वराच्या निवासमंडपासमोर परमेश्वराला अर्पण करायला तो दर्शनमंडपाच्या दाराशी आणला नाही, तर त्या माणसाला रक्तपात केल्याचा दोष लागेल; त्याने रक्तपात केला म्हणून त्याचा स्वजनातून उच्छेद व्हावा;

⁵ ह्याचा हेतू असा की, इस्राएल लोक जे आपले यज्ञपशू खुल्या मैदानात मारत असतात, ते त्यांनी दर्शनमंडपाच्या दाराशी याजकाकडे परमेश्वरासमोर आणून परमेश्वराप्रीत्यर्थ शांत्यर्पणे म्हणून अर्पावेत.

⁶ याजकाने त्यांचे रक्त दर्शनमंडपाच्या दाराशी परमेश्वराच्या वेदीवर शिंपडावे आणि परमेश्वराला सुवास म्हणून त्यांच्या चरबीचा होम करावा.

⁷ आणि ह्यामुळे व्यभिचारी मतीने अजदैवतांच्या (बोकड) मागे लागून त्यांना त्यांनी आपले यज्ञपशू अर्पण करू नयेत; हा तुम्हांला पिढ्यानपिढ्या निरंतरचा विधी होय.

⁸ तू त्यांना सांग की, इस्राएल घराण्यापैकी अथवा त्यांच्यामध्ये राहणार्‍या परदेशीय लोकांपैकी कोणी होमार्पण अथवा यज्ञ केला,

⁹ आणि तो पशू दर्शनमंडपाच्या दाराशी परमेश्वराप्रीत्यर्थ अर्पण करण्यासाठी आणला नाही, तर त्याचा स्वजनातून उच्छेद व्हावा.

रक्ताचे सेवन करणे वर्ज्य

¹⁰ इस्राएल घराण्यापैकी अथवा त्यांच्यामध्ये राहणार्‍या परदेशीय लोकांपैकी कोणी कोणत्याही प्रकारचे रक्त सेवन केले तर रक्त सेवन करणार्‍या मनुष्याला मी विन्मुख होऊन त्याचा स्वजनातून उच्छेद करीन.

¹¹ शरीराचे जीवन तर रक्तात असते, आणि तुमच्या जिवांबद्दल वेदीवर प्रायश्‍चित्त करण्यासाठी ते मी तुम्हांला दिले आहे; कारण रक्तात जीवन असल्याकारणाने रक्तानेच प्रायश्‍चित्त होते.

¹² म्हणून मी इस्राएल लोकांना म्हटले आहे की, तुमच्यातील कोणी रक्त सेवन करू नये, आणि तुमच्यामध्ये राहणार्‍या परदेशीयांनीही रक्त सेवन करू नये.

¹³ इस्राएल लोकांपैकी कोणी अथवा त्यांच्यामध्ये राहणार्‍या परदेशीयांपैकी कोणी खाण्यालायक पशूची किंवा पक्ष्याची शिकार केली, तर त्याने त्याचे रक्त जमिनीवर ओतून मातीने झाकावे.

¹⁴ कारण प्राणिमात्रांच्या जीवनाविषयी म्हणाल तर त्यांचे रक्त हेच त्यांचे जीवन होय; ह्यास्तव इस्राएल लोकांना मी म्हटले आहे की, कोणत्याही प्राण्याचे रक्त सेवन करू नये, कारण सर्व प्राण्यांचे जीवन हेच त्यांचे रक्त होय; ते जो कोणी सेवन करील त्याचा उच्छेद व्हावा.

¹⁵ कोणा मनुष्याने, मग तो स्वदेशीय असो अथवा परदेशीय असो, मेलेल्या अथवा श्वापदांनी फाडून मारलेल्या पशूंचे मांस खाईल तर त्याने आपले कपडे धुऊन पाण्याने स्नान करावे व संध्याकाळपर्यंत अशुद्ध राहावे म्हणजे तो शुद्ध होईल.

¹⁶ त्याने आपले कपडे धुतले नाहीत व आपले शरीर धुतले नाही, तर त्याने आपल्या दुष्कर्माबद्दलची शिक्षा भोगावी.”