लेवीय 15 - पवित्र शास्त्र RV (Re-edited) Bible (BSI)

शरीरातून वाहणारा अशुद्ध स्राव

¹ परमेश्वर मोशे व अहरोन ह्यांना म्हणाला,

² “इस्राएल लोकांना सांगा की, एखाद्या पुरुषाच्या शरीरातून स्राव होत असल्यास त्या स्रावामुळे तो अशुद्ध होय.

³ त्याचा शारीरिक स्राव वाहत असो किंवा बंद पडो, ती त्याची अशुद्धताच होय, त्याच्या स्रावामुळे झालेल्या अशुद्धतेविषयीचा नियम हा :

⁴ स्राव होणारा मनुष्य ज्या बिछान्यावर निजेल तो प्रत्येक अशुद्ध होय आणि ज्या वस्तूवर तो बसेल तीही अशुद्ध होय.

⁵ जो त्याच्या बिछान्याला शिवेल त्याने आपले कपडे धुवावेत, पाण्याने स्नान करावे आणि संध्याकाळपर्यंत अशुद्ध राहावे.

⁶ स्राव होणारा मनुष्य बसलेल्या वस्तूवर कोणी बसला, तर त्याने आपले कपडे धुवावेत, पाण्याने स्नान करावे आणि संध्याकाळपर्यंत अशुद्ध राहावे.

⁷ स्राव होणार्‍या मनुष्याच्या अंगाला कोणी शिवला तर त्याने आपले कपडे धुवावेत, पाण्याने स्नान करावे आणि संध्याकाळपर्यंत अशुद्ध राहावे.

⁸ स्राव होणारा मनुष्य एखाद्या शुद्ध मनुष्यावर थुंकला तर त्या मनुष्याने आपले कपडे धुवावेत, पाण्याने स्नान करावे आणि संध्याकाळपर्यंत अशुद्ध राहावे.

⁹ स्राव होणारा मनुष्य ज्या वाहनाचा उपयोग करील ते अशुद्ध होय.

¹⁰ त्याच्या अंगाखालच्या कोणत्याही वस्तूला कोणी शिवला तर त्याने संध्याकाळपर्यंत अशुद्ध राहावे, व त्या वस्तू जो उचलील त्याने आपले कपडे धुवावेत, पाण्याने स्नान करावे आणि संध्याकाळपर्यंत अशुद्ध राहावे.

¹¹ स्राव होणारा मनुष्य पाण्याने हात न धुता एखाद्याला शिवला, तर त्याने आपले कपडे धुवावेत, पाण्याने स्नान करावे आणि संध्याकाळपर्यंत अशुद्ध राहावे.

¹² स्राव होणारा मनुष्य एखाद्या मातीच्या पात्राला शिवला तर ते फोडून टाकावे; मात्र प्रत्येक लाकडी पात्र पाण्याने धुवावे.

¹³ स्राव होणारा मनुष्य आपल्या स्रावापासून बरा झाल्यावर आपल्या शुद्धीकरणासाठी त्याने मोजून सात दिवस थांबावे आणि मग आपले कपडे धुऊन वाहत्या पाण्यात आपले शरीर धुवावे म्हणजे तो शुद्ध ठरेल.

¹⁴ आठव्या दिवशी त्याने दोन होले अथवा पारव्याची दोन पिले घेऊन दर्शनमंडपाच्या दाराशी परमेश्वरासमोर जाऊन याजकाकडे ती द्यावीत;

¹⁵ मग याजकाने त्यांतील एकाचे पापार्पण व दुसर्‍याचे होमार्पण करावे आणि त्याच्या स्रावाबद्दल परमेश्वरासमोर त्याच्यासाठी प्रायश्‍चित्त करावे.

¹⁶ एखाद्या पुरुषाचा वीर्यपात झाला तर त्याने आपले सर्वांग पाण्याने धुऊन संध्याकाळपर्यंत अशुद्ध राहावे.

¹⁷ ज्या कपड्याला किंवा चामड्याला वीर्य लागले असेल तेही पाण्याने धुऊन संध्याकाळपर्यंत अशुद्ध समजावे.

¹⁸ स्त्रीशी संभोग करताना पुरुषाचा वीर्यपात झाला तर त्या दोघांनी पाण्याने स्नान करून संध्याकाळपर्यंत अशुद्ध राहावे.

¹⁹ एखादी स्त्री ऋतुमती झाली तर तिने सात दिवस दूर बसावे; जो कोणी तिला शिवेल त्याने संध्याकाळपर्यंत अशुद्ध राहावे;

²⁰ ती दूर असेपर्यंत ज्यावर ती निजेल ते अशुद्ध होय; तसेच ज्यावर ती बसेल तेही अशुद्ध होय.

²¹ जो कोणी तिच्या अंथरुणाला शिवेल त्याने आपले कपडे धुवावेत, पाण्याने स्नान करावे आणि संध्याकाळपर्यंत अशुद्ध राहावे.

²² ती ज्यावर बसली असेल त्याला जो कोणी शिवेल त्याने आपले कपडे धुवावेत, पाण्याने स्नान करावे आणि संध्याकाळपर्यंत अशुद्ध राहावे.

²³ तिच्या अंथरुणाला किंवा ज्यावर ती बसली असेल त्याला शिवणार्‍याने संध्याकाळपर्यंत अशुद्ध राहावे.

²⁴ तिच्याशी संभोग करताना पुरुषाला तिचा विटाळ लागला तर त्याने सात दिवस अशुद्ध राहावे व ज्या अंथरुणावर तो निजेल तेही अशुद्ध समजावे.

²⁵ एखाद्या स्त्रीचा ऋतुकाल नसताना जर अनेक दिवस तिला रक्तस्राव होत असला अथवा मुदतीच्या बाहेर ती ऋतुमती राहिली, तर तिचे स्रावाचे सर्व दिवस तिच्या ऋतुकालाच्या दिवसांप्रमाणे समजावेत. ती अशुद्ध होय.

²⁶ ती ऋतुमती असेल तितके सगळे दिवस ती ज्या अंथरुणावर निजेल ते तिच्या विटाळाचे अंथरूण समजावे; त्याचप्रमाणे ती ज्यावर बसेल ते तिच्या ऋतुकालाच्या विटाळाप्रमाणे अशुद्ध समजावे.

²⁷ जो कोणी त्या वस्तूंना शिवेल तो अशुद्ध होय. त्याने आपले कपडे धुवावेत, पाण्याने स्नान करावे आणि संध्याकाळपर्यंत अशुद्ध राहावे.

²⁸ पण त्या स्त्रीने आपल्या स्रावापासून शुद्ध झाल्यावर मोजून सात दिवस थांबावे; त्यानंतर ती शुद्ध ठरेल.

²⁹ आठव्या दिवशी तिने दोन होले अथवा पारव्याची दोन पिले घेऊन दर्शनमंडपाच्या दाराशी याजकाकडे जावे.

³⁰ मग याजकाने एकाचे पापार्पण व दुसर्‍याचे होमार्पण करावे आणि तिच्या स्रावाच्या अशुद्धतेमुळे तिच्यासाठी परमेश्वरासमोर प्रायश्‍चित्त करावे.

³¹ ह्या प्रकारे तुम्ही इस्राएल लोकांना त्यांच्या अशुद्धतेपासून दूर ठेवावे म्हणजे त्यांच्यामध्ये असलेले माझे निवासस्थान ते भ्रष्ट करणार नाहीत, आणि आपल्या अशुद्धावस्थेत मरायचे नाहीत.”

³² स्राव होऊन किंवा वीर्यपात होऊन जो पुरुष अशुद्ध होतो,

³³ अथवा जी स्त्री ऋतुमती होते, तसेच ज्या पुरुषाला अथवा स्त्रीला स्राव होतो आणि जो कोणी पुरुष ऋतुमती स्त्रीशी संभोग करतो त्यांच्यासंबंधीचा हा नियम.