इय्योब 7 - पवित्र शास्त्र RV (Re-edited) Bible (BSI)

ईयोब परमेश्वराशी वाद घालतो

¹ “ह्या जगात मनुष्याला कष्ट करण्याची मुदत ठेवली आहे ना? एखाद्या मजुराप्रमाणे त्याला दिवस कंठावे लागतात ना?

² आपल्याला सावलीत कधी बसायला मिळेल म्हणून दास उत्कंठित होतो, मजूर आपल्या वेतनाची वाट पाहतो,

³ त्याप्रमाणे निराशेत महिन्यांचे महिने मला घालायचे आहेत, कष्टाच्या रात्री माझ्या वाट्याला आहेत.

⁴ मी पडलो असता म्हणतो, ‘मी केव्हा उठेन? रात्र केव्हा निघून जाईल?’ दिवस उजाडेपर्यंत मी एकसारखा तळमळत राहतो.

⁵ माझा देह किड्यांनी व धुळीच्या थरांनी भरला आहे; माझी त्वचा बरी होते आणि पुन्हा चिघळते.

⁶ माझे दिवस साळ्याच्या धोट्यापेक्षा त्वरित जातात; ते निराशेने निघून जातात.

⁷ माझा प्राण केवळ वायू आहे, माझ्या डोळ्यांना पुन्हा कल्याण दिसणार नाही, हे लक्षात आणा.

⁸ जो मला आता पाहत आहे त्याच्या डोळ्यांना मी पुन्हा दिसणार नाही; तुझे नेत्र माझा शोध करतील, पण मी नसणार.

⁹ मेघ ज्याप्रमाणे वितळून नाहीसा होतो, तसा अधोलोकात जाणारा परत वर येत नाही,

¹⁰ तो पुन्हा आपल्या घरी येणार नाही, त्याचे वसतिस्थान त्याला पुन्हा ओळखणार नाही.

¹¹ ह्यामुळे मी आपले तोंड आटोपणार नाही; मी आपल्या मनाचा खेद उघड करून सांगेन; माझ्या जिवास क्लेश होतात म्हणून मी गार्‍हाणे करीन.

¹² मी काय सागर किंवा समुद्रातला राक्षस आहे म्हणून तू माझ्यावर सक्त नजर ठेवतोस?

¹³ माझा बिछाना मला शांती देईल, ‘माझा पलंग माझा खेद काहीसा हलका करील’ असे मी म्हणतो;’

¹⁴ तेव्हा तू मला स्वप्ने पाडून घाबरे करतोस, मला दृष्टान्त दाखवून भयभीत करतोस;

¹⁵ म्हणून माझ्या अस्थिपंजरापेक्षा माझा गळा दाबून मला मारले तर ते मला बरे!

¹⁶ मला आपल्या जिवाचा वीट आला आहे; सर्वकाळ जगणे मला नको. माझे नाव सोडून दे, कारण माझे दिवस श्वासवत आहेत.

¹⁷ मानव तो काय की तू त्याला थोर मानावे, आपले चित्त त्याच्यावर ठेवावे,

¹⁸ रोज सकाळी त्याचा समाचार घ्यावा, व क्षणोक्षणी त्याची कसोटी पाहावी?

¹⁹ तू माझ्यावरची आपली नजर काढत नाहीस, अवंढा घोटायलाही अवसर देत नाहीस, असे कोठवर चालणार?

²⁰ हे मानवरक्षका! मी पाप केले असले तर त्यात तुझे काय गेले? तू मला आपले निशाण का करून ठेवले आहेस? मी आपणाला भार मात्र झालो आहे.

²¹ तू माझा अपराध का क्षमा करत नाहीस? माझ्या ठायीचा दोष का घालवत नाहीस? आता तर मी धुळीत पडून राहणार तू माझा पुष्कळ शोध करशील पण मी नसणार.”