इय्योब 38 - पवित्र शास्त्र RV (Re-edited) Bible (BSI)

देव ईयोबाला त्याचे अज्ञान पटवून देतो

¹ तेव्हा परमेश्वराने वावटळीतून ईयोबाला उत्तर दिले; तो म्हणाला,

² “अज्ञानाचे शब्द बोलून दिव्य संकेतावर अंधकार पाडणारा हा कोण?

³ आता मर्दाप्रमाणे आपली कंबर बांध; मी तुला हे विचारतो; मला सांग.

⁴ मी पृथ्वीचा पाया घातला तेव्हा तू कोठे होतास? तुला समजण्याची अक्कल असेल तर सांग.

⁵ तिचे मोजमाप कोणी ठरवले बरे? तिला मापनसूत्र कोणी लावले? हे तुला ठाऊक आहे काय?

⁶ तिच्या स्तंभाचा पाया कशावर घातला? तिची कोनशिला कोणी बसवली?

⁷ त्या समयी प्रभातनक्षत्रांनी मिळून गायन केले. व सर्व देवकुमारांनी जयजयकार केला.

⁸ समुद्र उफाळून गर्भाशयातून पडावा असा बाहेर पडला, तेव्हा त्याला कवाडे लावून तो कोणी अडवला?

⁹ त्या समयी मी त्याला मेघवस्त्राचे पांघरूण घातले, दाट अभ्रांचे त्याला बाळंते केले;

¹⁰ मी त्याची मर्यादा फोडून काढली आणि त्याला अडसर व दरवाजे लावले;

¹¹ आणि मी म्हणालो, ‘तू येथवरच ये; ह्यापलीकडे तू येता कामा नये; येथे तुझ्या उन्मत्त लहरी थांबल्या पाहिजेत.’

¹² तू जन्मात कधी प्रातःसमयाचे नियमन केले आहेस काय? प्रभातेला आपले स्थान दाखवून दिले आहेस काय?

¹³ ह्यासाठी की त्याने पृथ्वीच्या दिगंतास धरून तिच्यावरील दुष्टांना झटकून टाकावे;

¹⁴ तेव्हा मुद्रेच्या ठशाने जसा मातीला आकार येतो, तसा प्रभातेने पृथ्वीचा आकार व्यक्त होतो; सर्व वस्तू जशा काय त्याच्या पेहरावाप्रमाणे ठळक दिसतात.

¹⁵ दुष्टांकडून त्यांचा प्रकाश काढून घेतला जाईल; त्यांचा उगारलेला हात मोडतो.

¹⁶ समुद्राच्या झर्‍यापर्यंत तुझा कधी रिघाव झाला आहे काय? सागराच्या खोल प्रदेशी तू कधी भ्रमण केले आहेस काय?

¹⁷ मृत्यूची द्वारे तुला प्रकट झाली आहेत काय? तू अधोलोकाची द्वारे पाहिली आहेत काय?

¹⁸ पृथ्वीच्या विस्ताराचे तुला आकलन झाले आहे काय? तुला हे सर्व ठाऊक असेल तर सांग.

¹⁹ प्रकाश वसतो तिकडची वाट कोणती? अंधकाराचे स्थान कोठे आहे?

²⁰ त्याला त्याच्या प्रदेशात सीमेपर्यंत नेऊन तुला पोचवता येईल काय? त्याच्या गृहाच्या वाटा तू ओळखतोस काय?

²¹ हे सर्व तुला ठाऊक असेलच; कारण त्या वेळी तू जन्मला असावास; तू बहुत दिवसांचा म्हणायचा.

²² तू हिमाच्या भांडारात जाऊन शिरला आहेस काय? तू गारांची भांडारे पाहिली आहेत काय?

²³ ती मी संकटसमयासाठी, लढाई व युद्ध ह्यांच्या प्रसंगासाठी राखून ठेवली आहेत.

²⁴ प्रकाशाची वाटणी कशी झाली आहे? पूर्वेचा वारा पृथ्वीवर कसा पसरतो?

²⁵ पर्जन्याचा लोट खाली यावा म्हणून पाट कोण फोडतो? गर्जणार्‍या विद्युल्लतेला मार्ग कोणी करून दिला?

²⁶ अशासाठी की निर्जन प्रदेशात, मनुष्यहीन अरण्यात पाऊस पडावा,

²⁷ उजाड व वैराण प्रदेश तृप्त करावा, कोवळी हिरवळ उगवेशी करावी.

²⁸ पर्जन्याला कोणी पिता आहे काय? दहिवरबिंदूंना कोण जन्म देतो?

²⁹ हिम कोणाच्या गर्भाशयातून निघते? आकाशातील हिमकणांना कोण जन्म देतो?

³⁰ जल थिजून पाषाणाप्रमाणे घट्ट होते; जलाशयाचा पृष्ठभाग गोठून जातो.

³¹ कृत्तिकांचा गुच्छ तुला गुंफता येईल काय? मृगशीर्षाचे बंध तुला सोडता येतील काय?

³² राशिचक्र योग्य समयी तुला उदयास आणता येईल काय? सप्तऋषींना त्यांच्या समूहासह तुला मार्ग दाखवता येईल काय?

³³ आकाशमंडळाचे नियम तुला माहीत आहेत काय? पृथ्वीवर त्याची सत्ता तुला नेमून देता येईल काय?

³⁴ तुझ्यावर विपुल जलवर्षाव व्हावा म्हणून मेघांना तुला पुकारून सांगता येईल काय?

³⁵ विद्युल्लता तुझ्या आज्ञेत आहेत काय? आणि त्या येऊन, ‘काय आज्ञा,’ असे तुला म्हणतात काय?

³⁶ घनमेघांत अक्कल कोणी घातली? अभ्रांना समज कोणी दिली?

³⁷ कोणाला आपल्या बुद्धिसामर्थ्याने मेघांची हजेरी घेता येते? आकाशाचे बुधले कोण ओततो?

³⁸ तेव्हा धूळ भिजून गोळा बनतो. व ढेकळे विरघळून एकमेकांना चिकटून जातात.

³⁹ तुला सिंहिणीची शिकार करता येते काय? तरुण सिंहाची क्षुधा तुला तृप्त करता येते काय?

⁴⁰ ते गुहांत दबा धरून बसतात, जाळीत दडून टपून बसतात.

⁴¹ कावळ्याची पिले देवाला हाका मारतात; ती अन्नान्न करीत चोहोकडे भटकतात.