इय्योब 37 - पवित्र शास्त्र RV (Re-edited) Bible (BSI)

¹ हे ऐकून माझे हृदय थरथरून स्थानभ्रष्ट होते.

² ऐका हो ऐका! त्याच्या वाणीची गर्जना ऐका, त्याच्या मुखातून निघणारा ध्वनी ऐका.

³ तो त्याला नभोमंडळाखाली सर्वत्र धाडतो, विद्युल्लतेसह पृथ्वीच्या दिगंतरी त्याला पाठवतो.

⁴ तिच्यामागून गर्जनेचा ध्वनी होतो; तो आपल्या प्रतापी ध्वनीने गर्जतो; त्याचा शब्द ऐकू येतो तेव्हा तो विद्युल्लतेचे चमकणे थांबवत नाही.

⁵ देव अदुभुत शब्दाने गर्जतो; आम्हांला अगम्य अशी मोठी कृत्ये तो करतो.

⁶ तो हिमाला म्हणतो, ‘पृथ्वीवर पड;’ पावसाच्या सरीला व भारी पर्जन्यवृष्टीला तो असेच म्हणतो.

⁷ त्याने उत्पन्न केलेल्या सर्व मानवांनी त्याला ओळखावे, म्हणून तो प्रत्येक मनुष्याच्या हातचा व्यवसाय बंद करतो.

⁸ तेव्हा वनपशू आडोसा शोधतात व आपल्या गुहांत पडून राहतात.

⁹ वावटळ दक्षिणेकडून येते. उत्तरेकडील वार्‍यांमुळे थंडी येते.

¹⁰ देवाच्या श्वासाच्या फुंकराने हिम होते, तेव्हा विस्तीर्ण जलाशय गोठून जातात.

¹¹ तो मेघ जलपूर्ण करतो; तो आपल्या विद्युल्लतेचे अभ्र चोहोकडे पसरतो;

¹² ते त्याच्या सूत्राने चोहोकडे फिरतात; म्हणजे अर्थात त्यांना आज्ञापिलेले कार्य ते अखिल भूपृष्ठावर करतात;

¹³ शिक्षेसाठी असो, त्याच्या ह्या पृथ्वीच्या हितासाठी असो, किंवा दया करण्यासाठी असो, तो त्यांना पाठवतो.

¹⁴ ईयोबा, कान देऊन हे ऐक; स्तब्ध राहून देवाच्या अद्भुत कृत्यांचे मनन कर.

¹⁵ देव मेघांना आज्ञा देऊन त्यांचा प्रकाश चमकायला कसा लावतो, हे तुला कळते काय?

¹⁶ मेघ कसे समतोल राहतात हे तुला कळते काय? त्या सर्वज्ञाच्या अद्भुत कृत्यांचे मर्म तू जाणतोस काय?

¹⁷ दक्षिणेकडील वार्‍याने पृथ्वी निर्वात होते तेव्हा तुझी वस्त्रे कशी तापतात?

¹⁸ ओतीव आरशासारखे भक्कम नभोमंडळ त्याच्याप्रमाणे तुला विस्तारता येईल काय?

¹⁹ त्याच्याशी काय बोलावे हे आम्हांला शिकव; अंधकारामुळे आम्हांला शब्दयोजना करता येत नाही.

²⁰ ‘मी बोलणार’ असे त्याला सांगायचे काय? असे सांगून कोणी आपला नाश करून घेईल काय?

²¹ आता लोकांना मेघमंडळातील देदीप्यमान सूर्यप्रकाश दिसत नाही; पण वारा सुटून ते स्वच्छ करतो.

²² उत्तर दिशेकडून सुवर्णप्रभा येते, देव भयजनक तेजाने मंडित आहे.

²³ सर्वसमर्थ तर अगम्य आहे, त्याचे सामर्थ्य अप्रतिम आहे; तो न्याय व महान नीतिमत्ता विपरीत करीत नाही;

²⁴ म्हणून माणसे त्याचे भय धरतात; जे शहाणपणाचा अभिमान वाहतात, त्यांच्याकडे तो लक्ष देत नाही.”