इय्योब 36 - पवित्र शास्त्र RV (Re-edited) Bible (BSI)

देवाच्या माहात्म्याचे अलीहू वर्णन करतो

¹ अलीहू आपले भाषण पुढे चालवून म्हणाला,

² “अंमळ थांब; देवाच्या वतीने आणखी काही बोलण्याजोगे आहे, असे मी तुला दाखवतो.

³ मी दुरून आपले ज्ञान आणून आपल्या उत्पन्नकर्त्याचे न्याय्यत्व स्थापित करीन.

⁴ माझे शब्द वास्तविक खोटे नाहीत; हा पूर्ण ज्ञानी पुरुष तुझ्यापुढे उभा आहे.

⁵ पाहा, देव समर्थ आहे तरी तो कोणाला तुच्छ मानत नाही; त्याचे ज्ञानबल प्रचंड आहे.

⁶ तो अधर्म्यांना वाचवत नाही; तो दीनांचा न्याय करतो.

⁷ तो नीतिमानांवरील आपली दृष्टी काढत नाही, तर त्यांना राजांबरोबर सिंहासनावर अक्षय स्थापतो, व त्यांची उन्नती होते.

⁸ त्यांना बेड्यांनी जखडले, दुःखरूप रज्जूंनी त्यांना बांधून ठेवले,

⁹ तर त्यांची कृती व त्यांचे अपराध ह्यांची त्यांना जाणीव करून देतो, त्यांनी उन्मत्तपणाचे वर्तन केले असे त्यांना दाखवून देतो.

¹⁰ त्यांचे कान उघडून ते बोध घेतील असे तो करतो, आणि त्यांना अधर्म सोडायला सांगतो.

¹¹ हे ऐकून ते अंकित झाले तर ते आपले दिवस सुस्थितीत घालवतील, आपली वर्षे सुखाने काढतील;

¹² पण त्यांनी ऐकले नाही तर ते शस्त्राने ठार होतील; ज्ञानप्राप्तीवाचून त्यांचा प्राणान्त होईल.

¹³ जे मनाने अधर्मी असतात ते हृदयात क्रोध बाळगतात; त्याने त्यांना बांधले असता ते धावा करीत नाहीत.

¹⁴ ते भरज्वानीत मरतात; त्यांचा प्राण अमंगळ पुरुषांप्रमाणे नाश पावतो;

¹⁵ तो दुःखितांना त्यांच्या दुःखाच्या द्वारे सोडवतो; विपत्तीच्या द्वारे त्यांची कानउघाडणी करतो.

¹⁶ तो तुलाही दुःखाच्या जबड्यातून सोडवून संकोच नाही अशा प्रशस्त स्थली नेतो; तुझ्या मेजावर मिष्टान्नाची रेलचेल होईल.

¹⁷ तू दुष्टांसारखा दोषारोप करीत राहशील; तर दोषारोप व न्यायदंड ह्यांच्या तावडीत तू सापडशील.

¹⁸ आपल्या क्रोधाने मोहात पडून तू अपमान करण्यास प्रवृत्त होऊ नकोस; हा खंड भारी आहे म्हणून बहकू नकोस.

¹⁹ तुझ्या अपार संपत्तीचा तुझ्या संपत्तीच्या सार्‍या बळाचा काही उपयोग होईल काय?

²⁰ लोक जागच्या जागी नष्ट होतील अशा रात्रीची उत्कंठा धरू नकोस.

²¹ सांभाळ, दुष्टतेकडे वळू नकोस; ती तुला दुःखापेक्षा पसंत वाटत आहे.

²² पाहा, देव आपल्या सामर्थ्याने थोर कृत्ये करतो; त्याच्यासमान शिक्षण देणारा कोण आहे?

²³ त्याला मार्ग लावून देणारा कोण आहे? ‘तू अधर्म केला आहे’ असे त्याला कोण म्हणणार?

²⁴ लोकांनी गायनरूपे त्याच्या करणीचा महिमा वर्णन केला आहे, त्या गाण्याचे स्मरण ठेव.

²⁵ सर्व माणसे ती करणी पाहत राहतात; मानव ती करणी दुरून पाहतो.

²⁶ पाहा, देव थोर आहे, तो आम्हांला अगम्य आहे; त्याच्या वर्षांची संख्या अगण्य आहे.

²⁷ तो जलबिंदू आकर्षतो; त्यांची वाफ होऊन ते पर्जन्यरूपाने पडतात;

²⁸ मेघ त्यांची वृष्टी करतात; ते लोकसमूहावर विपुल वर्षाव करतात.

²⁹ मेघांचा पसारा, मेघमंडपातील गडगडाट ह्याचे ज्ञान कोणाला होईल?

³⁰ पाहा, तो आपणाभोवती प्रकाश पसरतो; त्याने समुद्रतल व्यापतो.

³¹ ह्यांच्या योगाने तो राष्ट्रांचा न्याय करतो, अन्नाची विपुलता करतो.

³² तो विद्युल्लता आपल्या हाती धरून तिने अचूक आघात करावा अशी तिला आज्ञा करतो.

³³ मेघगर्जना त्याच्या येण्याची खबर देते; गुरेढोरेही तो येत आहे असे कळवतात.