इय्योब 35 - पवित्र शास्त्र RV (Re-edited) Bible (BSI)

¹ अलीहू आणखी म्हणाला,

² “‘देवावरील माझी फिर्याद न्यायाची आहे,’ असे तू म्हणतोस काय? हे तुला म्हणण्याचा हक्क आहे असे तुला वाटते काय?

³ ह्यास्तव तू म्हणतोस की ‘तुला1 काय लाभ होणार? मी पाप केले असते तर माझे काय कमी झाले असते?’

⁴ मी तुला व तुझ्याबरोबर तुझ्या मित्रांनाही उत्तर देतो;

⁵ आकाशाकडे दृष्टी देऊन पाहा; हे नभोमंडळ पाहा, हे तुझ्याहून उंच आहे.

⁶ तू पाप केलेस तर देवाचे काय जाते? तुझे अपराध बहुत असले तर त्याचे काय बिघडणार?

⁷ तू नीतिमान असलास तर तू त्याला काय देणार? तुझ्यापासून त्याला काय मिळणार?

⁸ तुझ्या अधर्माचे फळ तुझ्यासारख्या मानवालाच बाधेल; तुझ्या नीतिमत्त्वाचे फळ मानवसंततीलाच लाभेल;

⁹ अतिशय जुलूम झाला म्हणजे लोक आक्रोश करतात; जबरदस्त लोकांचा हात त्यांच्यावर पडला म्हणजे ते साहाय्यासाठी आरोळी मारतात.

¹⁰ तरीपण असे कोणीही म्हणत नाही की ‘जो रात्रीची स्तोत्रे गायला देतो, तो माझा निर्माणकर्ता कोठे आहे?’

¹¹ जो आम्हांला पृथ्वीवरील पशूंहून अधिक शिकवतो, आणि आकाशातील पक्ष्यांहून अधिक ज्ञान देतो, तो कोठे आहे?’

¹² दुर्जनांच्या उन्मत्तपणामुळे ते असा आक्रोश करतात, पण कोणी ऐकत नाही.

¹³ देव निरर्थक ओरड खरोखर ऐकत नाही; सर्वसमर्थ तिच्याकडे लक्ष देत नाही.

¹⁴ तू म्हणतोस की त्याचे दर्शन मला घडत नाही; पण हा तुझा वाद त्याच्यासमोरच आहे, तर तू त्याची वाट पाहत राहा;

¹⁵ पण आता त्याने कोपून दंड केला नाही, त्याने अपराधांकडे फारसे लक्ष पुरवले नाही;

¹⁶ म्हणून ईयोब आपले तोंड उघडून निरर्थक भाषण करतो, आणि अज्ञानाने वाद माजवतो.”