इय्योब 32 - पवित्र शास्त्र RV (Re-edited) Bible (BSI)

ईयोबाला प्रत्युत्तर करण्याचा आपला हक्क अलीहू सांगतो

¹ ईयोब स्वतःच्या दृष्टीने निर्दोष आहे हे पाहून त्या तिघा पुरुषांनी त्याला उत्तर देण्याचे सोडून दिले.

² मग राम घराण्यातील बरखेल बूजी ह्याचा पुत्र अलीहू ह्याचा राग भडकला; ईयोबाने देवाला निर्दोषी ठरवण्याचे सोडून स्वतःला निर्दोषी ठरवले, म्हणून त्याच्यावर त्याचा राग भडकला.

³ आपल्या तिघा मित्रांना ईयोबाला उत्तर द्यायला सापडले नसताही त्यांनी त्याला दोषी ठरवले म्हणून त्यांच्यावरही त्याचा राग भडकला.

⁴ ते वयाने मोठे होते म्हणून अलीहू ईयोबाशी भाषण करायला मिळेपर्यंत थांबला होता.

⁵ त्या तिघा पुरुषांच्या तोंडून काही प्रत्युत्तर निघेना हे पाहून त्याचा राग भडकला.

⁶ मग बरखेल बूजी ह्याचा पुत्र अलीहू ह्याने उत्तर दिले; तो म्हणाला, “मी अल्पवयी आहे व तुम्ही वयोवृद्ध आहात; म्हणून मी मुरवत धरली; आपले मत तुमच्यापुढे प्रकट करण्यास मी कचरलो.

⁷ मला वाटले, जास्त दिवस पाहिलेल्यांनी भाषण करावे, बहुत वर्षे घालवलेल्यांनी अक्कल सांगावी;

⁸ पण मानवाच्या ठायी आत्मा असतो; सर्वसमर्थाचा श्वास त्याला बुद्धी देतो.

⁹ माणसे वयाने मोठी असली तरच ती ज्ञानी असतात, वयोवृद्ध असली तरच त्यांना खरेखोटे समजते, असे नाही.

¹⁰ ह्याकरता मी म्हणतो की माझे ऐका; मीही आपले मत सांगतो.

¹¹ तुम्ही काही समर्पक उत्तरे शोधून काढाल ह्या आशेने मी तुमचे भाषण ऐकत राहिलो, तुमचे मुद्दे मी लक्षपूर्वक श्रवण केले.

¹² मी तुमचे बोलणे मन लावून ऐकले; तो पाहा, तुमच्यांतल्या कोणीही ईयोबाच्या पक्षाचे खंडण केले नाही. कोणी त्याला समर्पक उत्तर दिले नाही.

¹³ देवच त्याचे खंडण करील, मनुष्याच्याने होणार नाही, इतके ज्ञान त्याच्या ठायी आम्हांला आढळून आले आहे असे म्हणू नका;

¹⁴ कारण त्याने माझ्यावर वादाचा मोर्चा फिरवला नाही; तुमचे शब्द घेऊन मी त्यांना उत्तर देणार नाही.

¹⁵ ते थक्क झाले आहेत, काही उत्तर देत नाहीत; शब्द त्यांना सोडून गेले आहेत.

¹⁶ ते बोलत नाहीत, निरुत्तर होऊन उभे आहेत, म्हणून मी थांबावे काय?

¹⁷ मीही माझ्यातर्फे बोलतो, माझे मत प्रकट करतो.

¹⁸ माझ्या मनात शब्दांची गर्दी झाली आहे. माझा अंतरात्मा मला स्फूर्ती देत आहे.

¹⁹ पाहा, माझे अंतर्याम बंद करून ठेवलेल्या द्राक्षारसाप्रमाणे झाले आहे, नव्या द्राक्षारसाच्या बुधल्यांप्रमाणे ते फुटायला आले आहे.

²⁰ मी बोललो तरच मला चैन पडेल. मी आपले तोंड उघडीन, उत्तर देईन.

²¹ मी कोणाचा पक्ष धरणार नाही, कोणाची खुशामत करणार नाही.

²² खुशामत करण्याचे मला ठाऊक नाही, असेल तर माझा उत्पन्नकर्ता मला तत्काळ घेऊन जाईल.