इय्योब 29 - पवित्र शास्त्र RV (Re-edited) Bible (BSI)

ईयोब आपले पूर्वीचे सुख आठवतो

¹ ईयोब आपला वाद पुढे चालवून म्हणाला,

² “पूर्वीचे महिने मला प्राप्त होते, पूर्वीच्यासारखे माझे दिवस असते, तर किती बरे होते! त्या दिवसांत देव माझे रक्षण करीत असे.

³ त्याचा दीप माझ्या शिरावर प्रकाशत असे; व त्याच्या तेजाने मी अंधकारात चालत असे;

⁴ त्या काळी मी भर उमेदीत होतो; देवाचा सहवास मला माझ्या डेर्‍यात घडे;

⁵ सर्वसमर्थ त्या काळी माझ्यासन्निध असे; माझी मुलेबाळे माझ्या सभोवती असत;

⁶ दह्यालोण्यात माझी पावले भिजत; खडकातून तेलाचे प्रवाह माझ्यासाठी निघत.

⁷ मी नगराच्या वेशीनजीक जाऊन, चौकात माझे आसन मांडी,

⁸ तेव्हा तरुण मला पाहून लपत, वृद्ध उठून उभे राहत;

⁹ सरदार बोलायचे थांबत व तोंडावर हात ठेवत;

¹⁰ अमीरउमराव स्तब्ध राहत; त्यांची जीभ त्यांच्या टाळूस चिकटून राही.

¹¹ कोणाच्या कानी माझे वर्तमान गेले असता तो मला धन्य म्हणे; कोणाच्या दृष्टीस मी पडलो असता तो माझ्याविषयी ग्वाही देई;

¹² कारण करुणा भाकणारा दीन, अनाथ व निराश्रित ह्यांचा मी उद्धार करी.

¹³ नाश होण्याच्या लागास आलेल्याचा मी आशीर्वाद घेई; विधवेचे मन आनंदित होऊन तिला मी गायला लावी.

¹⁴ नीतिमत्ता माझे पांघरूण होई आणि ती मला आच्छादून टाकी; माझी नीतिमत्ता हाच माझा झगा व शिरोभूषण होत असे.

¹⁵ मी आंधळ्याला नेत्र होई; लंगड्याला पाय होई.

¹⁶ मी लाचारांचा पिता असे; अपरिचितांच्या फिर्यादीची मी दाद घेई.

¹⁷ मी दुष्टांचे दात पाडी, त्याच्या दातांतून शिकार सोडवी.

¹⁸ तेव्हा मी म्हणे की, ‘माझ्या घरकुलातच राहून मला मरण येईल, व माझे दिवस वाळूच्या कणांप्रमाणे1 बहुगुणित होतील;

¹⁹ माझे मूळ पाण्याजवळ पसरेल; माझ्या फांदीवर रात्रभर दहिवर राहील.

²⁰ माझे वैभव माझ्या ठायी जसेच्या तसेच टवटवीत राहील;’ माझे धनुष्य माझ्या हाती सर्वदा नवेच राहील.’

²¹ लोक माझे भाषण कान देऊन ऐकत राहत, माझा निर्णय ऐकायला ते स्तब्ध राहत.

²² माझे बोलणे संपल्यावर ते पुन्हा बोलत नसत; माझे भाषण त्यांना पर्जन्यवृष्टीसारखे होई.

²³ लोक माझ्या बोलण्याची पावसाप्रमाणे वाट पाहत; जसे काय अखेरच्या पावसासाठी तोंड पसरून ते अपेक्षा करीत.

²⁴ ते निराश झाले असता मी त्यांच्याकडे हास्यवदन करून पाही; त्यांना माझे मुखतेज उतरवता येत नसे.

²⁵ मी त्यांचा मार्गदर्शक होई व त्यांच्यामध्ये अग्रस्थानी बसे; सैन्यात जसा राजा, शोकग्रस्तांत जसा समाधान करणारा, तसा मी त्यांच्यामध्ये असे.”