इय्योब 28 - पवित्र शास्त्र RV (Re-edited) Bible (BSI)

मानवाचा ज्ञानासाठी शोध

¹ “खरोखर रुप्याची खाण असते; लोक जे सोने शुद्ध करतात त्याचेही ठिकाण असते.

² लोखंड मातीतून काढतात, पाषाण वितळवून तांबे काढतात.

³ मनुष्य अंधकाराचे निवारण करतो, अगदी शेवटापर्यंत जाऊन निबिड अंधकारातील व मृत्युच्छायेतील पाषाणांचा तो शोध करीत असतो.

⁴ तो लोकवस्तीपासून दूर खाण खणतो; तेथे जमिनीवर चालणार्‍यांच्या गावीही नसता त्याच्यापासून दूर खाली ते लटकत व लोंबकळत असतात.

⁵ ही पृथ्वी पाहा; हिच्यापासून भाकर मिळते; पण खाली पाहावे तर अग्नीने जशी काय तिची उलटापालट होते.

⁶ तिच्यातले पाषाण म्हणजे नीलमण्यांचे घर होत; तिच्यात सोन्याची मातीही असते.

⁷ ती वाट कोणा हिंस्र पक्ष्यास ठाऊक नाही; कोणा घारीचीही दृष्टी तिच्यावर गेली नाही.

⁸ तिच्यावर कोणा उन्मत्त पशूने पाय ठेवला नाही; तिच्यावरून उग्र सिंह कधी चालला नाही.

⁹ मनुष्य गारेच्या पाषाणाला हात घालतो; तो पर्वत समूळ उलथून टाकतो;

¹⁰ तो खडकांतून भुयारे खोदून काढतो; सर्व प्रकारच्या मोलवान वस्तू त्याच्या नजरेस पडतात.

¹¹ झरे बंद करून त्यांचे पाणी तो बाहेर झिरपू देत नाही, गुप्त आहे ते तो उजेडात आणतो.

¹² तरीपण ज्ञान कोठून मिळेल? बुद्धीचे स्थान कोणते?

¹³ त्याचे मोल मानवाला कळत नाही; ते जिवंताच्या भूमीत सापडत नाही.

¹⁴ अगाध जलाशय म्हणतो, ‘ते माझ्या ठायी नाही;’ समुद्रही म्हणतो, ‘ते माझ्याजवळ नाही.’

¹⁵ उत्कृष्ट सुवर्ण देऊन ते मिळत नाही; चांदी तोलून देऊन त्याचे मोल होत नाही.

¹⁶ ओफीरचे सोने, गोमेद व नीलमणी ही भारंभार देऊनही त्याचे मोल होत नाही.

¹⁷ सोने व काचमणी ही त्याच्या बरोबरीची नाहीत; उंची सोन्याच्या नगांनी त्याचा मोबदला होत नाही.

¹⁸ प्रवाळ व स्फटिक ह्यांची काय कथा? ज्ञानाचे मोल मोत्यांहून अधिक आहे.

¹⁹ कूश देशाचा पुष्कराज त्याच्या तोडीचा नाही; बावनकशी सोने त्याच्याशी तुल्य नाही.

²⁰ तर मग ज्ञान कोठून येते? बुद्धीचे स्थान कोणते?

²¹ ते सर्व जिवंतांच्या नेत्रांना अगोचर आहे; आकाशातील पक्ष्यांना ते गुप्त आहे.

²² विनाशस्थान1 व मृत्यू म्हणतात, आमच्या कानी त्याची केवळ वार्ता आली आहे.

²³ देवच त्याचा मार्ग जाणतो; त्याचे स्थान त्यालाच ठाऊक आहे.

²⁴ कारण त्याची दृष्टी पृथ्वीच्या दिगंतांना पोचते; तो आकाशमंडळाखालचे सर्वकाही पाहतो.

²⁵ त्याने वायूचे वजन ठरवले व जल मापून दिले;

²⁶ त्याने पर्जन्यास नियम लावून दिला; गर्जणार्‍या विद्युल्लतेस मार्ग नेमून दिला;

²⁷ तेव्हा त्याने ज्ञान पाहून त्याचे वर्णन केले; त्याने ते स्थापित केले व त्याचे रहस्य जाणले.

²⁸ तो मानवाला म्हणाला, ‘पाहा, प्रभूचे भय धरणे हेच ज्ञान होय; दुष्टतेपासून दूर राहणे हेच सुज्ञान होय.”’