इय्योब 27 - पवित्र शास्त्र RV (Re-edited) Bible (BSI)

दुष्टाला मिळणार्‍या प्रतिफळाचे ईयोब वर्णन करतो

¹ ईयोब आपला वाद पुढे चालवून म्हणाला,

² “ज्या देवाने मला न्यायास मुकवले, ज्या सर्वसमर्थाने माझ्या जिवास क्लेश दिला, त्याच्या जीविताची शपथ;

³ (अद्यापि माझा श्वासोच्छ्वास बरोबर चालत आहे, देवाने घातलेला श्वास माझ्या नाकपुड्यांत आहे;)

⁴ माझे तोंड कुटिल भाषण करीत नाही; माझी जिव्हा कपटाचे बोल बोलत नाही.

⁵ तुमचा वाद खरा आहे असे मी कदापि मान्य करणार नाही; माझा प्राण जाईतोवर मी आपले सत्त्वसमर्थन सोडणार नाही.

⁶ मी नीतिमान आहे हे माझे म्हणणे मी धरून राहणार; ते मी सोडणार नाही; माझ्या आयुष्यातील कोणत्याही दिवसाविषयी माझे मन मला खात नाही;3

⁷ माझा शत्रू दुष्टासमान, माझा विरोधी अनीतिमानासमान ठरो.

⁸ देव अनीतिमानाचा उच्छेद करून प्राण हरण करील, तेव्हा त्याची काय आशा राहणार?

⁹ त्याच्यावर संकट येईल, तेव्हा त्याची आरोळी देव ऐकेल काय?

¹⁰ तो सर्वसमर्थाच्या ठायी आनंद पावेल काय? तो सर्व प्रसंगी देवाचा धावा करील काय?

¹¹ देवाच्या करणीविषयी मी तुम्हांला बोध करीन; सर्वसमर्थाचे रहस्य मी छपवून ठेवणार नाही.

¹² पाहा, तुम्ही सर्व हे पाहून चुकला आहात; तर तुम्ही अशा पोकळ गोष्टी का बोलून दाखवता?

¹³ दुष्ट मनुष्याला देवाकडून मिळणारा वाटा हाच; जुलम्याला सर्वसमर्थाकडून वतन मिळते ते हेच;

¹⁴ त्याची संतती वाढली तर ती तलवारीला बळी पडायची; त्याच्या संतानास पोटभर भाकर मिळणार नाही.

¹⁵ त्याच्या मागे राहिलेले मरीच्या तडाख्याने मातीआड होतील; त्याच्या विधवा विलाप करणार नाहीत.

¹⁶ त्याने रुप्याचा संचय धुळीसारखा केला, वस्त्रे चिखलासारखी विपुल केली;

¹⁷ तरी तो वस्त्रे करील ती नीतिमान अंगावर घालील. निर्दोषी त्याचे रुपे वाटून घेईल.

¹⁸ तो आपले घर कोळ्याच्या जाळ्यासारखे बांधतो; ते जागल्याने बांधलेल्या खोपटीसारखे असते.

¹⁹ तो संपन्न स्थितीत अंग टाकतो, पण त्याला पुरण्यात येणार नाही. तो डोळे उघडतो आणि तो आटोपेल

²⁰ घोर संकटे पुराप्रमाणे त्याच्यावर गुदरतात; रात्रीच्या समयी तुफान त्याला उडवून नेते.

²¹ पूर्वेचा वारा त्याला उडवून नेतो. आणि तो नाहीसा होतो. त्याचा सपाटा त्याला त्याच्या स्थानावरून काढून टाकतो.

²² कारण देव त्याच्यावर मारा करील. त्याची गय करणार नाही; तो त्याच्या हातून निसटून जाण्यास पाहील.

²³ लोक टाळ्या पिटून त्याची छीथू करतील, त्याच्या स्थानातून त्याला हुसकून लावतील.”