इय्योब 26 - पवित्र शास्त्र RV (Re-edited) Bible (BSI)

ईयोब देवाच्या सार्वभौमत्वाचे प्रतिपादन करतो

¹ मग ईयोबाने प्रत्युत्तर केले,

² “तू निर्बळास केवढेसे साहाय्य केले? शक्तिहीन बाहूला तू कितीसा आधार दिलास?

³ बुद्धिहीनास कशी काय मसलत दिली? तू कितीसे मोठे ज्ञान प्रकट केलेस?

⁴ तू कोणापुढे हे शब्द बोललास? कोणाचे मनोगत तुझ्या तोंडून निघाले?

⁵ मृतांचे आत्मे जलनिधीच्या व जलचरांच्या खाली थरथरा कापत आहेत.

⁶ देवापुढे अधोलोक उघडा आहे; विनाशस्थान1 आच्छादित नाही.

⁷ त्याने उत्तरेकडील नभोमंडळ शून्य अवकाशावर पसरले आहे; त्याने पृथ्वी निराधार टांगली आहे.

⁸ तो पाणी मेघमंडळात कोंडून ठेवतो; मेघ त्याच्या भाराने भंग पावत नाहीत.

⁹ तो आपल्या सिंहासनापुढे आपले मेघ पसरून ते झाकून टाकतो;

¹⁰ प्रकाश व अंधकार ह्यांमधील हद्दीशी त्याने जलनिधीची सीमा भिडवली आहे.

¹¹ त्याच्या धाकाने गगनस्तंभ थरथर कापतात व भयचकित होतात.

¹² तो आपल्या सामर्थ्याने समुद्र शमवतो;2 तो आपल्या बुद्धिबलाने राहाब छिन्नभिन्न करतो;

¹³ त्याच्या नि:श्वासाने आकाशाची शोभा प्रकट होते; त्याच्या हाताने धावता राक्षसी सर्प विंधला आहे;

¹⁴ पाहा, ह्या त्याच्या कार्यक्षेत्राच्या केवळ सीमा आहेत; त्याची केवळ चाहूल आपल्या कानी येते; पण त्याच्या प्रभावाच्या गर्जनेचा अंत कोणाला लागेल?”