इय्योब 18 - पवित्र शास्त्र RV (Re-edited) Bible (BSI)

दुष्टाच्या अंताचे बिल्दद वर्णन करतो

¹ मग बिल्दद शूही म्हणाला,

² “तुम्ही कोठवर शब्द शोधून योजत बसाल? तुम्ही समज घ्या, मग आम्ही बोलू.

³ तुमच्या हिशोबी आम्ही पशू का ठरलो? तुमच्या दृष्टीने आम्ही अशुद्ध का झालो?

⁴ अरे क्रोधाने स्वतःस फाडून टाकणार्‍या, तुझ्यामुळे पृथ्वी ओस पडेल काय? खडक आपल्या ठिकाणचा ढळेल काय?

⁵ तरी दुष्टाचा दीप मालवेल, त्याच्या अग्नीची ज्वाला झळकणार नाही.

⁶ त्याच्या डेर्‍यातला प्रकाशाचा अंधकार होईल, त्याचा लामणदिवा विझून जाईल.

⁷ त्याच्या जोराच्या ढांगा संकोच पावतील, त्याचीच युक्ती त्याचा निःपात करील.

⁸ तो आपल्या पायांनी जाळ्यात अडकतो, तो पाशात पाऊल टाकत आहे.

⁹ त्याची टाच सापळ्यात अडकते; पाश त्याला धरून ठेवतो.

¹⁰ त्याच्यासाठी पाश जमिनीत गुप्त ठेवला आहे; त्याच्या मार्गात सापळा ठेवला आहे.

¹¹ त्याला दहशत चोहोकडून घाबरे करते; ती त्याचा पिच्छा पुरवते.

¹² त्याची शक्ती क्षुधिताप्रमाणे क्षीण होईल; तो केव्हा पडेल ह्याची अरिष्ट वाट पाहत आहे.

¹³ ते त्याच्या शरीराचे अवयव तोडून खाईल; मृत्यूचा ज्येष्ठ पुत्र त्याचे अवयव ग्रासील.

¹⁴ ज्या डेर्‍याचा तो भरवसा धरी त्यातून त्याला ओढून काढतील; त्याला भयाच्या राजापुढे हजर करतील.

¹⁵ जे त्याचे नव्हत ते त्याच्या डेर्‍यात वास करतील त्याच्या वसतिस्थानांवर गंधक उधळतील.

¹⁶ खालून त्याचे मूळ सुकेल, व वरून त्याची डाहळी छाटतील.

¹⁷ देशातून त्याची आठवण बुजेल, व पेठेत त्याचे नाव राहणार नाही.

¹⁸ ते त्याला प्रकाशातून अंधकारात लोटतील, त्याला जगातून पळवतील.

¹⁹ त्याच्या लोकांत त्याचे कोणी पुत्रपौत्र आढळणार नाहीत; त्याच्या बिर्‍हाडात कोणी उरणार नाही.

²⁰ त्याचा दुर्दिन पाहून पश्‍चिमेकडे राहणारे चकित होतील, पूर्वेकडे राहणारे कंपित होतील.

²¹ कुटिलाच्या निवासांचे निःसंशय असेच होणार; देवाला न ओळखणार्‍याच्या स्थानाचे असेच होणार.”