इय्योब 11 - पवित्र शास्त्र RV (Re-edited) Bible (BSI)

सोफर ईयोबावर दोषारोप लादतो

¹ मग सोफर नामाथी म्हणाला,

² “हा शब्दांचा पूर उत्तर दिल्यावाचून वाहू द्यावा काय? वाचाळ खरा ठरावा काय?

³ तुझ्या वटवटीने लोकांची तोंडे बंद होतील काय? तू निंदा करीत असता तुला कोणी फजीत करणार नाही काय?

⁴ तू म्हणतोस, ‘माझा सिद्धान्त शुद्ध आहे; देवाच्या दृष्टीने मी स्वच्छ आहे.’

⁵ देव जर बोलता, तुझ्याविरुद्ध आपले तोंड उघडता,

⁶ तो ज्ञानाचे रहस्य तुला निवेदन करता, आपले चातुर्य बहुगुणित आहे हे तुला तो दाखवता तर किती बरे होते! देव तुझ्या बहुत अपराधांकडे कानाडोळा करतो हे लक्षात आण.

⁷ देवाच्या रहस्याचा तुला थांग लागेल काय? सर्वसमर्थाच्या पूर्णतेचे तुला आकलन होईल काय?

⁸ ते गगनाइतके उंच आहे, तेथे तुझे काय चालणार? ते अधोलोकाहून खोल आहे, तुला ते काय कळणार?

⁹ त्याचे परिमाण म्हटले तर ते भूगोलाहून लांब व समुद्राहून रुंद आहे.

¹⁰ भ्रमण करीत असता त्याने एखाद्याला पकडून अटकेत टाकले, आणि न्यायसभा भरवली, तर त्याचा हात कोण धरील?

¹¹ आचारशून्य मनुष्याला तो ओळखतो; विचार करावा न लागता त्याला दुष्टता दिसून येते.

¹² रानगाढवाचा मनुष्य बनेल तर अक्कलशून्य मनुष्याला समज प्राप्त होईल.

¹³ आपले हृदय नीट करशील, देवाकडे आपले हात पसरशील,

¹⁴ तुझ्या हाती असलेला अधर्म तू दूर करशील, आपल्या डेर्‍यात अन्याय राहू देणार नाहीस,

¹⁵ तर निश्‍चये तू आपले निष्कलंक मुख वर करशील; तू स्थिर होशील, निर्भय होशील;

¹⁶ कारण तू आपले दुःख विसरशील; ओसरलेल्या पाण्यासारखे ते तुला आठवेल;

¹⁷ तुझे जीवित मध्यान्हसमयाहून तेजस्वी होईल; अंधकार असला तरी तो प्रभातेसारखा होईल.

¹⁸ तुला उमेद प्राप्त झाल्याने तू निर्भय होशील; तू चोहोकडे पाहून निर्धास्त आराम करशील.

¹⁹ तू झोपी जाशील तेव्हा तुला कोणी भिवविणार नाही; बहुत लोक तुझे आर्जव करतील.

²⁰ दुष्टांचे डोळे थकतील; त्यांना कोणतेही शरणस्थान राहणार नाही; प्राण सोडणे एवढीच काय ती त्यांना आशा वाटेल.”