शास्ते 12 - पवित्र शास्त्र RV (Re-edited) Bible (BSI)

इफ्ताह आणि एफ्राईम

¹ मग एफ्राइमी लोक जमा होऊन साफोन येथे गेले. ते इफ्ताहाला म्हणाले, “तू अम्मोन्यांशी लढायला गेलास तेव्हा तुझ्याबरोबर येण्यासाठी आम्हांला का नाही बोलावलेस? आम्ही तुझ्या घरासकट तुला जाळून टाकतो.”

² इफ्ताह त्यांना म्हणाला, “माझ्या व माझ्या लोकांच्या अम्मोनी लोकांशी चकमकी झडत असताना मी तुमची कुमक मागितली होती तेव्हा तुम्ही त्यांच्या हातून मला सोडवले नाही.

³ तुम्ही मला सोडवत नसल्याचे मी पाहिले तेव्हा मी तळहातावर शिर घेऊन अम्मोनी लोकांवर चालून गेलो आणि परमेश्वराने त्यांना माझ्या हाती दिले. आज तुम्ही माझ्याशी लढायला का चालून आलात?”

⁴ नंतर इफ्ताहाने गिलादाची सर्व सेना जमा करून एफ्राइमाशी युद्ध केले. गिलादाच्या सैनिकांनी एफ्राइमाचा पराभव केला; कारण ते म्हणत होते, “एफ्राईम व मनश्शे ह्यांच्यामध्ये राहणार्‍या गिलाद्यांनो, तुम्ही एफ्राइमातून आलेले पळपुटे आहात.”

⁵ गिलाद्यांनी एफ्राइमी लोकांना अडवण्यासाठी यार्देनेचे उतार रोखून धरले. आणि कोणी एफ्राइमी पळपुट्या त्यांना म्हणे, “मला पलीकडे जाऊ द्या,” तेव्हा गिलादी लोक त्याला विचारत, “तू एफ्राइमी आहेस काय?”

⁶ त्याने “नाही” असे म्हटले तर ते त्याला म्हणत, “शिब्बोलेथ म्हण”; तेव्हा तो “सिब्बोलेथ” म्हणे. त्या शब्दाचा उच्चार त्याला करता येत नसे म्हणून ते त्याला धरून यार्देनेच्या उताराजवळ मारून टाकत. त्या प्रसंगी एफ्राइमातले बेचाळीस हजार प्राणास मुकले.

⁷ इफ्ताहाने सहा वर्षे इस्राएलाचा न्यायनिवाडा केला. इफ्ताह गिलादी मरण पावला आणि त्याला गिलादातल्या त्याच्या नगरात मूठमाती देण्यात आली. इस्राएल लोकांचे शास्ते इब्सान, एलोन व अब्दोन

⁸ त्याच्यानंतर इब्सान बेथलेहेमकर ह्याने इस्राएलाचा न्यायनिवाडा केला.

⁹ त्याला तीस मुलगे होते. त्याने आपल्या तीस मुली परगावी देऊन टाकल्या होत्या आणि आपल्या मुलांसाठी त्याने परगावांहून तीस मुली आणल्या होत्या. त्याने इस्राएलाचा सात वर्षे न्यायनिवाडा केला.

¹⁰ इब्सान मरण पावला व त्याला बेथलेहेम येथे मूठमाती देण्यात आली.

¹¹ त्यानंतर एलोन जबुलूनी ह्याने इस्राएलाचा न्यायनिवाडा केला. तो दहा वर्षे इस्राएलाचा शास्ता होता.

¹² एलोन जबुलूनी मृत्यू पावला आणि त्याला जबुलूनातील अयालोन येथे मूठमाती देण्यात आली.

¹³ त्याच्यानंतर हिल्लेल पिराथोनी ह्याचा मुलगा अब्दोन हा इस्राएलाचा शास्ता झाला.

¹⁴ त्याला चाळीस मुलगे व तीस नातू होते. ते सत्तर गाढवांवर स्वार होत. त्याने आठ वर्षे इस्राएलाचा न्यायनिवाडा केला.

¹⁵ मग हिल्लेल पिराथोनीचा मुलगा अब्दोन मृत्यू पावला आणि त्याला एफ्राईम प्रांतातील अमालेक्यांच्या डोंगराळ प्रदेशात पिराथोन येथे मूठमाती देण्यात आली.