यशायाह 21 - पवित्र शास्त्र RV (Re-edited) Bible (BSI)

समुद्रालगतच्या रानाविषयी देववाणी

¹ समुद्रालगतच्या रानाविषयीची देव वाणी : दक्षिणेकडून जशा वावटळी झपाट्याने येतात, तसे रानातून, भयानक देशातून अरिष्ट येते.

² मला कष्टप्रद दृष्टान्त झाला आहे; लुटारू लुटत आहे, ठक ठकबाजी करीत आहे. हे एलामा, चढाई कर; हे मादया, वेढा घाल; त्याच्यामुळे लोक टाकत असलेले सर्व उसासे मी थांबवतो.

³ हे पाहून माझ्या कंबरेस कळा लागल्या आहेत; प्रसूत होणार्‍या स्त्रीच्या वेदनांप्रमाणे मला वेदना होत आहेत; मी एवढे आळेपिळे देत आहे की मला ऐकू येत नाही; मी इतका घाबरलो आहे की मला दिसत नाही.

⁴ माझे हृदय धडधडते; भीतीने मी त्रस्त झालो आहे; माझी आवडती वेळ संध्याकाळ मला कंपित करणारी झाली आहे.

⁵ ते मेजवानीची तयारी करतात; ते पहारेकरी ठेवतात; खातातपितात; सरदारहो, उठा, ढालीस तेल लावा.

⁶ परमेश्वर मला म्हणाला, “जा, एक टेहळणी करणारा ठेव; त्याच्या नजरेस पडेल ते त्याने कळवावे.”

⁷ रथ, जोडीजोडीने चालणारे घोडेस्वार, गाढवांवर बसलेले स्वार व सांडणीस्वार हे त्याच्या दृष्टीस पडले तेव्हा त्याने अतिशय उत्कंठेने कान लावले.

⁸ तो सिंहनाद करून म्हणाला, “प्रभू, मी दिवसा बुरुजावर एकसारखा उभा असतो, रात्रीच्या रात्री आपल्या चौकीवर काढतो.

⁹ तर पाहा, पायदळ, जोडीजोडीने चालणारे घोडेस्वार येत आहेत; ते उच्च स्वराने म्हणतात, बाबेल पडला हो पडला; त्याच्या देवांच्या सर्व मूर्ती जमिनीवर आपटून फोडल्या.”

¹⁰ हे माझ्या झोडलेल्या आणि खळ्यातल्या धान्या, इस्राएलाचा देव, सेनाधीश परमेश्वर, ह्याच्याकडून जे मी ऐकले ते मी तुम्हांला कळवले आहे.

दुमाविषयी देववाणी

¹¹ दुमाविषयीची देववाणी : सेईराहून मला शब्द ऐकू येतो की, “जागल्या, रात्र किती राहिली? जागल्या, रात्र किती राहिली?”

¹² जागल्या म्हणाला, “पहाट होत आहे, रात्रही होणार; तुम्हांला काही विचारायचे असेल तर विचारा; परत या.”

अरबस्तानाविषयी देववाणी

¹³ अरबस्तानाविषयीची देववाणी : ददानीच्या काफल्यांनो, तुम्हांला अरबस्तानातील रानात रात्र कंठावी लागेल.

¹⁴ तान्हेल्यांसाठी पाणी आणा; तेमा देशातील रहिवाशांनो, पळणार्‍यांच्या भेटीस भाकरी घेऊन या.

¹⁵ तलवारी, उपसलेल्या तलवारी, वाकवलेले धनुष्य व घोर संग्राम ह्यांपासून ते पळत आहेत.

¹⁶ कारण प्रभूने मला असे सांगितले आहे की, “सालदाराच्या मुदतीप्रमाणे एका वर्षाच्या मुदतीत केदाराचे सर्व वैभव लयास जाईल;

¹⁷ आणि केदार देशातील धनुर्धारी वीरांची संख्या थोडीच उरेल; कारण परमेश्वर, इस्राएलाचा देव, हे बोलला आहे.”