उत्पत्ती 5 - पवित्र शास्त्र RV (Re-edited) Bible (BSI)

आदामाचे वंशज

¹ आदामाच्या वंशावळीची नोंद येणेप्रमाणे : देवाने मनुष्य उत्पन्न केला त्या वेळी त्याने तो आपल्याशी सदृश केला;

² त्याने त्यांना नर व नारी असे उत्पन्न केले. त्यांना आशीर्वाद दिला; त्यांना उत्पन्न केले त्या वेळी त्यांना आदाम (मानव) हे नाव दिले.

³ आदाम एकशे तीस वर्षांचा झाल्यावर त्याला त्याच्याशी सदृश, त्याच्या प्रतिरूपाचा मुलगा झाला, त्याचे नाव त्याने शेथ ठेवले;

⁴ शेथ झाल्यावर आदाम आठशे वर्षे जगला, व त्याला आणखी मुलगे व मुली झाल्या.

⁵ आदाम एकंदर नऊशे तीस वर्षे जगला; मग तो मरण पावला.

⁶ शेथ एकशे पाच वर्षांचा झाल्यावर त्याला अनोश झाला;

⁷ अनोश झाल्यावर शेथ आठशे सात वर्षे जगला व त्याला आणखी मुलगे व मुली झाल्या;

⁸ शेथाचे एकंदर आयुष्य नऊशे बारा वर्षांचे झाले; मग तो मरण पावला.

⁹ अनोश नव्वद वर्षांचा झाल्यावर त्याला केनान झाला;

¹⁰ केनान झाल्यावर अनोश आठशे पंधरा वर्षे जगला व त्याला आणखी मुलगे व मुली झाल्या;

¹¹ अनोशाचे एकंदर आयुष्य नऊशे पाच वर्षांचे झाले; मग तो मरण पावला.

¹² केनान सत्तर वर्षांचा झाल्यावर त्याला महललेल झाला;

¹³ महललेल झाल्यावर केनान आठशे चाळीस वर्षे जगला व त्याला आणखी मुलगे व मुली झाल्या;

¹⁴ केनानाचे एकंदर आयुष्य नऊशे दहा वर्षांचे झाले, मग तो मरण पावला.

¹⁵ महललेल पासष्ट वर्षांचा झाल्यावर त्याला यारेद झाला;

¹⁶ यारेद झाल्यावर महललेल आठशे तीस वर्षे जगला व त्याला आणखी मुलगे व मुली झाल्या;

¹⁷ महललेल ह्याचे एकंदर आयुष्य आठशे पंचाण्णव वर्षांचे झाले, मग तो मरण पावला.

¹⁸ यारेद एकशे बासष्ट वर्षांचा झाल्यावर त्याला हनोख झाला;

¹⁹ हनोख झाल्यावर यारेद आठशे वर्षे जगला व त्याला आणखी मुलगे व मुली झाल्या;

²⁰ यारेदाचे एकंदर आयुष्य नऊशे बासष्ट वर्षांचे झाले. मग तो मरण पावला.

²¹ हनोख पासष्ट वर्षांचा झाल्यावर त्याला मथुशलह झाला;

²² मथुशलह झाल्यावर हनोख तीनशे वर्षे देवाबरोबर चालला, व त्याला आणखी मुलगे व मुली झाल्या;

²³ हनोखाचे एकंदर आयुष्य तीनशे पासष्ट वर्षांचे झाले;

²⁴ हनोख देवाबरोबर चालला. त्यानंतर तो नव्हता; कारण देवाने त्याला नेले.

²⁵ मथुशलह एकशे सत्त्याऐंशी वर्षांचा झाल्यावर त्याला लामेख झाला;

²⁶ लामेख झाल्यावर मथुशलह सातशे ब्याऐंशी वर्षे जगला, व त्याला आणखी मुलगे व मुली झाल्या;

²⁷ मथुशलहाचे एकंदर आयुष्य नऊशे एकोणसत्तर वर्षांचे झाले. मग तो मरण पावला.

²⁸ लामेख एकशे ब्याऐंशी वर्षांचा झाल्यावर त्याला मुलगा झाला;

²⁹ त्याचे नाव त्याने नोहा असे ठेवले; तो म्हणाला, “जी भूमी परमेश्वराने शापित केली तिच्यासंबंधाचे आमचे काम व आमच्या हातचे कष्ट ह्यांविषयी हा आमचे सांत्वन करील.”

³⁰ नोहा झाल्यावर लामेख पाचशे पंचाण्णव वर्षे जगला, त्याला आणखी मुलगे व मुली झाल्या.

³¹ लामेखाचे एकंदर आयुष्य सातशे सत्त्याहत्तर वर्षांचे झाले. मग तो मरण पावला.

³² नोहा पाचशे वर्षांचा झाला तेव्हा त्याला शेम, हाम व याफेथ हे झाले.