उत्पत्ती 40 - पवित्र शास्त्र RV (Re-edited) Bible (BSI)

कैद्यांच्या स्वप्नांचा योसेफाने सांगितलेला अर्थ

¹ ह्यानंतर असे झाले की, मिसराच्या राजाचा प्यालेबरदार व आचारी ह्या दोघांनी आपला स्वामी मिसराचा राजा ह्याचा काही अपराध केला.

² प्यालेबरदारांचा नायक व आचार्‍यांचा नायक ह्या त्याच्या दोघा सरदारांवर फारो रागावला.

³ तेव्हा त्याने त्यांना गारद्यांच्या सरदारांच्या वाड्यात कैदेत ठेवले; तेथेच योसेफही अटकेत होता.

⁴ गारद्यांच्या सरदाराने योसेफाला त्यांच्या तैनातीस दिले; व त्याने त्यांची सेवा केली; तेथे ते काही काळ अटकेत राहिले.

⁵ बंदिशाळेत पडलेले मिसरी राजाचे प्यालेबरदार व आचारी ह्या दोघांना एकाच रात्री त्यांना लागू पडतील अशाच अर्थाची स्वप्ने पडली.

⁶ सकाळी योसेफ त्यांच्याकडे जाऊन पाहतो तेव्हा ते खिन्न दिसले.

⁷ तेव्हा आपल्या धन्याच्या कारागृहात आपल्याबरोबर असलेल्या त्या फारोच्या सरदारांना त्याने विचारले, “आज तुमची तोंडे का उतरलेली दिसतात?”

⁸ ते त्याला म्हणाले, “आम्हांला स्वप्ने पडली आहेत व त्यांचा अर्थ सांगणारा कोणी नाही.” योसेफ त्यांना म्हणाला, “अर्थ सांगणे देवाकडे आहे ना? आपापले स्वप्न मला सांगा.”

⁹ प्यालेबरदारांच्या नायकाने योसेफाला आपले स्वप्न सांगितले ते असे : स्वप्नात माझ्यासमोर एक द्राक्षवेल होता;

¹⁰ त्या द्राक्षवेलाला तीन फाटे होते, त्याला कळ्या फुटून बहर आला व त्याच्या गुच्छांना द्राक्षे येऊन पिकली होती;

¹¹ आणि फारोचा प्याला माझ्या हातात होता; मी द्राक्षे घेऊन ती फारोच्या प्याल्यात पिळली व तो प्याला फारोच्या हाती दिला.”

¹² योसेफ त्याला म्हणाला, “ह्याचा अर्थ असा : ते तीन फाटे म्हणजे तीन दिवस;

¹³ तीन दिवसांच्या आत फारो तुझे शीर वर करून तुला तुझ्या हुद्द्यावर पूर्ववत नेमील आणि तू पूर्वीप्रमाणेच फारोचा प्यालेबरदार होऊन त्याच्या हाती प्याला देशील.

¹⁴ मात्र तुझे बरे झाले म्हणजे माझे स्मरण अवश्य ठेव आणि माझ्यावर कृपा करून फारोकडे माझी गोष्ट काढून ह्या घरातून माझी सुटका कर.

¹⁵ कारण इब्र्यांच्या देशाहून मला चोरून आणले आहे; आणि येथेही ह्या बंदिखान्यात टाकण्याजोगे मी काहीएक केलेले नाही.”

¹⁶ स्वप्नाचा अर्थ चांगला आहे हे पाहून आचार्‍यांचा नायक योसेफाला म्हणाला, “मलाही असे स्वप्न पडले की, पांढर्‍या रोट्यांच्या तीन टोपल्या माझ्या डोक्यावर होत्या,

¹⁷ आणि वरच्या टोपलीत फारोसाठी सर्व प्रकारची पक्वान्ने असून पक्षी माझ्या डोक्यावरील त्या टोपलीतले पदार्थ खात होते.”

¹⁸ योसेफाने उत्तर दिले, “ह्याचा अर्थ असा : त्या तीन टोपल्या म्हणजे तीन दिवस;

¹⁹ फारो तीन दिवसांच्या आत तुझे शीर वर करून उडवील, तुला झाडावर फाशी देईल आणि पक्षी तुझे मांस तोडून खातील.”

²⁰ तिसर्‍या दिवशी फारोचा वाढदिवस आला तेव्हा त्याने आपल्या सर्व चाकरांना मेजवानी दिली, आणि त्याने आपल्या प्यालेबरदारांचा नायक व आचार्‍यांचा नायक ह्यांना पुढे आणले.

²¹ त्याने प्यालेबरदारांच्या नायकाला त्याच्या हुद्द्यावर पूर्ववत नेमले, आणि तो फारोच्या हाती प्याला देण्याचे काम करू लागला;

²² पण त्याने आचार्‍यांच्या नायकाला फाशी दिली. योसेफाने त्यांच्या स्वप्नांचा अर्थ सांगितल्याप्रमाणे घडले.

²³ तथापि प्यालेबरदारांच्या नायकाने योसेफाचे स्मरण ठेवले नाही; तो त्याला विसरला.