यहेज्केल 45 - पवित्र शास्त्र RV (Re-edited) Bible (BSI)

जमिनीची विभागणी व खरी वजने व मापे

¹ तुम्ही चिठ्ठ्या टाकून वतनासाठी देशाची वाटणी कराल तेव्हा परमेश्वराप्रीत्यर्थ समर्पित अंश अर्पावा; जमिनीचा एक वाटा पवित्र म्हणून वेगळा काढून ठेवावा; त्याची लांबी पंचवीस हजार हात1 व रुंदी वीस हजार हात1 असावी; हे सारे क्षेत्र चोहोंकडून पवित्र ठेवावे.

² ह्यापैकी पाचशे हात लांब व पाचशे हात रुंद एवढी समचौरस जागा पवित्रस्थानासाठी ठेवून तिच्याभोवती पन्नात हात खुली जागा राखून ठेवावी, ती सभोवती समचौरस असावी.

³ त्या मापलेल्या जमिनीतून तू पंचवीस हजार हात लांब व दहा हजार हात रुंद क्षेत्र मापून काढ; ह्या क्षेत्रात पवित्रस्थान होणार; ते परमपवित्र होय.

⁴ हे क्षेत्र पवित्र राहावे; सेवा करण्यास परमेश्वरासमीप जाणार्‍या पवित्रस्थानाच्या सेवकांसाठी म्हणजे याजकांसाठी ते असावे; त्यात त्यांच्या घरांसाठी जागा व पवित्रस्थानासाठी पवित्र जागा असावी.

⁵ पंचवीस हजार हात लांब व दहा हजार हात1 रुंद एवढी जागा मंदिराची सेवाचाकरी करणार्‍या लेव्यांची व्हावी; वसतिस्थानासाठी हे त्यांचे वतन होय.

⁶ समर्पित अंश म्हणून जी जागा निराळी ठेवायची तिला लागून पाच हजार हात रुंद व पंचवीस हजार हात लांब एवढी जमीन नगरासाठी वतन म्हणून द्यावी; ही सगळ्या इस्राएल घराण्याची व्हावी.

⁷ समर्पित अंश म्हणून ठेवलेला भाग व नगरास दिलेला भाग ह्यांना लागून दोहों बाजूंकडील म्हणजे पश्‍चिमेकडील व पूर्वेकडील जागा अधिपतीस द्यावी; पश्‍चिम सीमेपासून पूर्व सीमेपर्यंत तिची लांबी इस्राएली वंशांना वाटून दिलेल्या भागाच्या लांबीइतकी असावी.

⁸ ही जमीन इस्राएलात अधिपतींचे वतन व्हावी, म्हणजे ह्यापुढे माझ्या अधिपतींनी माझ्या लोकांवर जुलूम करू नये; तर इस्राएल घराण्यातील निरनिराळ्या वंशाना दिलेली जमीन ज्याची त्याच्याकडे राहू द्यावी.

⁹ प्रभू परमेश्वर म्हणतो, इस्राएलाच्या अधिपतींनो, झाले ते पुरे; आता तुम्ही बलात्कार व जुलूम ह्यांपासून दूर राहा, न्याय व नीती ह्यांचे पालन करा, आणि माझ्या लोकांना त्यांच्या वतनांतून घालवून देण्याचे सोडा, असे प्रभू परमेश्वर म्हणतो.

¹⁰ खरी तागडी, खरी एफा2 व खरी बथ3 वापरा.

¹¹ एफा व बथ ह्या दोन्ही एकाच परिमाणाच्या असाव्यात; बथ होमराचा1 दहावा भाग; तशीच एफाही होमराचा दहावा भाग; ह्या होमराच्या प्रमाणाने असाव्यात.

¹² शेकेल2 वीस गेरांचा2 असावा आणि माने2 वीस शेकेलांचा, पंचवीस शेकेलांचा किंवा पंधरा शेकेलांचा असावा.

अर्पणे व सण

¹³ समर्पित अंश म्हणून अर्पायची तुमची अर्पणे येणेप्रमाणे असावीत : गव्हाच्या एका होमरामागे एक षष्ठांश एफा गहू आणि जवाच्या एका होमरामागे एक षष्ठांश जव द्यावे;

¹⁴ तेलाचा नियमित अंश द्यायचा तो दहा बथांचा कोर1 म्हणजे एक होमर ह्यामागे एक दशांश बथ असावा; दहा बथांचा एक होमर होतो.

¹⁵ इस्राएल देशातील पाणथळाच्या कुरणांतील कळपांतून दोनशे मेंढरांमागे एक कोकरू द्यावे; लोकांप्रीत्यर्थ प्रायश्‍चित्त करावे म्हणून अन्नार्पण, होमार्पण व शांत्यर्पणे ही द्यावीत, असे प्रभू परमेश्वर म्हणतो.

¹⁶ इस्राएलाच्या अधिपतीला देशाच्या सर्व लोकांनी ही समर्पित अंशाची अर्पणे पुरवली पाहिजेत.

¹⁷ उत्सव, चंद्रदर्शने, शब्बाथ व इस्राएल घराण्याचे सर्व सण ह्यांत होमार्पण, अन्नार्पण व पेयार्पण ह्यांची तरतूद करणे हे अधिपतींचे काम आहे; इस्राएल घराण्यासाठी प्रायश्‍चित्त करावे म्हणून त्याने पापार्पण, अन्नार्पण, होमार्पण व शांत्यर्पणे ही सिद्ध करावीत.

¹⁸ प्रभू परमेश्वर म्हणतो, पहिल्या महिन्याच्या प्रतिपदेस एक निर्दोष गोर्‍हा घेऊन पवित्रस्थान शुद्ध करावे.

¹⁹ तेव्हा याजकाने पापार्पणाच्या पशूचे रक्त घेऊन ते मंदिराच्या दरवाजाच्या बाह्यांवर वेदीच्या बैठकीच्या चार्‍ही कोपर्‍यांवर व आतील अंगणाच्या दरवाजाच्या बाह्यांवर शिंपडावे.

²⁰ तसेच त्या महिन्याच्या सप्तमीस भ्रांतीत पडलेल्या किंवा मूढ झालेल्या प्रत्येक माणसाप्रीत्यर्थ असेच करावे; ह्या प्रकारे तुम्ही मंदिरासाठी प्रायश्‍चित्त करावे.

²¹ पहिल्या महिन्याच्या चतुर्दशीस तुम्ही वल्हांडण, म्हणजे पूर्ण एक सप्तकाचा सण पाळावा; ह्या सणात बेखमीर भाकर खावी.

²² त्या दिवशी स्वतःसाठी व देशाच्या सर्व लोकांसाठी पापार्पण करावे म्हणून अधिपतीने एक गोर्‍हा सिद्ध करावा;

²³ परमेश्वराला होमार्पण करण्यासाठी सणाचे सात दिवस त्याने सात निर्दोष गोर्‍हे व सात मेंढे सिद्ध करावेत आणि पापार्पणासाठी रोज एक बोकड सिद्ध करावा;

²⁴ आणि अन्नार्पण म्हणून दर गोर्‍ह्यामागे व दर मेंढ्यामागे एफाभर अन्न व दर एफाबरोबर एक हिनभर1 तेल अर्पावे.

²⁵ सातव्या महिन्याच्या पौर्णिमेपासून सणाचे सात दिवस पापबली, होमबली, अन्नबली आणि तेल ही ह्याप्रमाणेच अर्पण करावीत.