यहेज्केल 43 - पवित्र शास्त्र RV (Re-edited) Bible (BSI)

परमेश्वराच्या तेजाने मंदिर भरते

¹ मग पूर्वाभिमुख असलेल्या द्वाराकडे त्याने मला नेले;

² तेव्हा पाहा, इस्राएलाच्या देवाचे वैभव पूर्वेकडून प्रकट झाले; त्याचा शब्द महापुराच्या ध्वनीसारखा होता; व त्याच्या वैभवाने पृथ्वी प्रकाशित झाली.

³ मी नगराचा नाश करण्यास आलो होतो तेव्हाच्या दृष्टान्ता-सारखा दृष्टान्त मी पाहिला; खबार नदीतीरी जो दृष्टान्त मी पाहिला तसे दृष्टान्त माझ्या दृष्टीस पडले; तेव्हा मी उपडा पडलो.

⁴ पूर्वाभिमुख असलेल्या द्वारावाटे परमेश्वराचे तेज मंदिरात आले.

⁵ तेव्हा आत्म्याने मला उचलून आतील अंगणात नेले, तेव्हा पाहा, परमेश्वराच्या तेजाने मंदिर भरून गेले होते

⁶ आणि मंदिरातून कोणी माझ्याबरोबर बोलत आहे असे मी ऐकले आणि माझ्याजवळ एक पुरुष उभा होता.

⁷ तो मला म्हणाला, “मानवपुत्रा, हे माझ्या सिंहासनाचे स्थळ, माझ्या पदासनाचे स्थळ आहे; तेथे मी इस्राएल वंशजांमध्ये सर्वकाळ राहीन; इस्राएल घराण्याचे लोक व त्यांचे राजे आपल्या व्यभिचाराने व त्यांच्या राजांनी स्थापलेल्या प्रेतवत मूर्तींनी आपल्या उच्च स्थानांवर ह्यापुढे माझ्या2 पवित्र नामाला बट्टा लावणार नाहीत;

⁸ त्यांनी आपला उंबरठा माझ्या उंबरठ्याशेजारी, आपले द्वारस्तंभ माझ्या द्वारस्तंभाशेजारी उभारले आणि माझ्या व त्यांच्यामध्ये केवळ एक भिंत होती; अमंगळ कृत्ये करून त्यांनी माझ्या पवित्र नामास बट्टा लावला म्हणून मी रागाने त्यांचा नाश केला.

⁹ आता त्यांनी आपला व्यभिचार व त्यांच्या राजांनी स्थापलेल्या प्रेतवत मूर्ती माझ्यापासून दूर घालवाव्यात, मग मी त्यांच्यामध्ये सर्वकाळ राहीन.

मंदिर व वेदीसंबंधी नियम

¹⁰ हे मानवपुत्रा, इस्राएल घराण्यास हे मंदिर दाखव, म्हणजे ते आपल्या पातकांबद्दल लज्जित होतील व त्यांनी ह्या नमुनेदार इमारतीचे माप घ्यावे.

¹¹ त्यांनी केलेल्या सर्व कृत्यांबद्दल ते लज्जित झाले म्हणजे त्यांना ह्या मंदिराचा आकार, त्याची रचना, त्यात जाण्यायेण्याचे मार्ग, त्यातील सर्व आकृती, त्याचे सर्व विधी व त्याचे सर्व नियम त्यांना दाखव व त्यांच्यासमोर लिहून ठेव म्हणजे त्याच्या सर्व नियमांचे व विधींचे अवलंबन करून त्याप्रमाणे ते वागतील.

¹² मंदिराचा हा नियम आहे; पर्वताच्या माथ्यावरील भोवतालचा सर्व प्रदेश अत्यंत पवित्र आहे. पाहा, मंदिराचा हा नियम आहे.

¹³ हातांनी वेदीची मापे ही आहेत. (हा हात म्हणजे एक हात व चार अंगुळे); तिचा तळभाग हातभर उंच, हातभर रुंद आणि तिचा कडेचा पाटथरा वीतभर; हा वेदीचा पाया.

¹⁴ तिच्या तळभागापासून खालच्या बैठकीपर्यंत उंची दोन हात व रुंदी एक हात आणि खालच्या बैठकीपासून वरच्या बैठकीपर्यंत उंची चार हात व रुंदी एक हात.

¹⁵ वेदीच्या वरच्या भागाची उंची चार हात; वेदीच्या अग्निकुंडाला लागून वर गेलेली चार शृंगे होती.

¹⁶ वेदीचे अग्निकुंड बारा हात लांब व बारा हात रुंद होते; ते समचौरस होते.

¹⁷ तिची बैठक चौदा हात लांब व चौदा हात रुंद अशी चौरस होती; तिच्याभोवतालचा पाटथरा अर्धा हात, आणि तिचा तळभाग सभोवार एक हात उंच होता; तिच्या पायर्‍या पूर्वाभिमुख होत्या.”

¹⁸ तेव्हा तो मला म्हणाला, “मानवपुत्रा, प्रभू परमेश्वर म्हणतो, ह्या वेदीवर होमार्पण करावे व रक्त शिंपडावे म्हणून ती बांधून काढतील. त्यानंतरच्या दिवसांचे तिच्यासंबंधीचे विधी हे :

¹⁹ माझी सेवा करण्यास माझ्यासमीप येणार्‍या लेवी वंशातला सादोकाच्या कुळातील याजक ह्याला पापार्पण करण्यासाठी तू एक गोर्‍हा दे, असे प्रभू परमेश्वर म्हणतो.

²⁰ तू त्याचे रक्त घेऊन वेदीच्या चार्‍ही शृंगांवर, बैठकीच्या चार्‍ही कोपर्‍यांवर व भोवतालच्या पाटथर्‍यावर शिंपड; अशा प्रकारे प्रायश्‍चित्त करून ती शुद्ध कर.

²¹ नंतर तू पापार्पणाचा बैल घे व त्याने पवित्रस्थानाच्या बाहेर मंदिराच्या नेमलेल्या जागी त्याचा होम करावास.

²² दुसर्‍या दिवशी पापार्पण करण्यासाठी एक निर्दोष बोकड घे; बैलाच्या होमाने जशी वेदी शुद्ध केली तशी ह्यानेही केली पाहिजे.

²³ शुद्धीकरण संपले म्हणजे एक निर्दोष गोर्‍हा व कळपातला एक निर्दोष एडका अर्पण कर.

²⁴ तू ते परमेश्वरासमोर आण; मग याजक त्यांच्यावर मीठ टाकतील व त्यांचे हवन करून ते परमेश्वरास अर्पण करतील.

²⁵ तू सात दिवस रोज एकेका निर्दोष बकर्‍याचे पापार्पण कर; एक गोर्‍हा व कळपातील एक निर्दोष एडका हेही त्यांनी अर्पण करावे.

²⁶ ह्याप्रमाणे सात दिवस वेदीबद्दल प्रायश्‍चित्त करून तिची शुद्धी करावी; असा तिचा संस्कार व्हावा.

²⁷ ह्या दिवसांच्या कार्याची समाप्ती झाल्यावर आठव्या दिवशी व त्यापुढे याजक तुमची होमार्पणे व तुमची शांत्यर्पणे वेदीवर अर्पण करतील आणि मी तुमच्यावर प्रसन्न होईन, असे प्रभू परमेश्वर म्हणतो.”