यहेज्केल 42 - पवित्र शास्त्र RV (Re-edited) Bible (BSI)

¹ तेव्हा त्याने मला उत्तरेकडच्या रस्त्याने बाहेरच्या अंगणात नेले आणि ती सोडलेली जागा व उत्तरेकडील इमारत ह्यांच्यासमोरील खोल्या असलेल्या इमारतीत नेले.

² तिचा दरवाजा उत्तराभिमुख असून तिची लांबी शंभर हात व रुंदी पन्नास हात होती.

³ आतील वीस हाताच्या अंगणासमोर व बाहेरील अंगणाच्या फरसबंदीसमोर तिसर्‍या मजल्याला समोरासमोर सज्जे होते.

⁴ खोल्यांसमोर दहा हात रुंद व शंभर1 हात लांब अशी एक वाट होती; त्यांचे दरवाजे उत्तराभिमुख होते.

⁵ वरच्या मजल्याची जागा सज्जांत गुंतली होती म्हणून तेथल्या खोल्या खालच्या व मधल्या मजल्यांवरील खोल्यांच्या मानाने लहान होत्या.

⁶ कारण त्या खोल्यांचे तीन मजले होते; अंगणातल्या-प्रमाणे त्यांना खांब नव्हते; म्हणून खालच्या व मधल्या मजल्यांच्या जागेपेक्षा वरली जागा संकुचित होती;

⁷ आणि त्या खोल्यांशी समांतर अशी खोल्यांसमोरील बाहेरच्या अंगणाकडे गेलेली एक भिंत होती; तिची लांबी पन्नास हात होती.

⁸ कारण बाहेरील अंगणाच्या खोल्यांची एकंदर लांबी पन्नास हात होती आणि पाहा, गाभार्‍यापुढे ती शंभर हात होती.

⁹ ह्या खोल्यांच्या खाली पूर्वेस प्रवेशद्वार होते, त्यातून बाहेरच्या अंगणातून येणारे त्या खोल्यांत जात असत.

¹⁰ दक्षिणेकडील2 अंगणाच्या लांबीकडील भिंतीला लागून त्या सोडलेल्या जागेसमोर व इमारतीसमोर खोल्या होत्या.

¹¹ उत्तरेकडील खोल्यांसमोर जसा रस्ता होता तसा त्याच्या समोरही रस्ता होता; त्यांची लांबीरुंदी, त्यांच्या बाहेर जाण्याच्या सर्व वाटा व त्यांची एकंदर व्यवस्था त्यांच्या-प्रमाणेच होती.

¹² त्यांच्या दरवाजांप्रमाणे दक्षिणाभिमुख असलेल्या खोल्यांचे दरवाजे होते; रहदारीच्या रस्त्याच्या तोंडाजवळ म्हणजे उजव्या भिंतीजवळील वाटेवर एक द्वार होते; त्यांतून पूर्वेकडून येणारे लोक प्रवेश करीत.

¹³ तो मला म्हणाला, “सोडलेल्या जागेसमोरील उत्तरेकडल्या खोल्या व दक्षिणेकडल्या खोल्या पवित्र असून त्यांत परमेश्वरासमोर जाणारे याजक ह्यांनी परमपवित्र पदार्थांचे सेवन करावे; तेथे त्यांनी अन्नबली, पापबली, दोषबली वगैरे परमपवित्र पदार्थ ठेवावेत; कारण ते स्थान पवित्र आहे.

¹⁴ याजक आत गेल्यावर पवित्रस्थानातून बाहेरच्या अंगणात त्यांनी तसेच जाऊ नये; तर सेवेच्या वेळची आपली वस्त्रे त्यांनी त्या खोल्यांत ठेवावीत कारण ती पवित्र आहेत; मग त्यांनी दुसरी वस्त्रे घालून सार्वजनिक स्थानी जावे.”

¹⁵ त्याने मंदिराचे आतले माप घेण्याचे संपवले तेव्हा त्याने पूर्वाभिमुख असलेल्या द्वाराने मला बाहेर नेले व ते बाहेरून चोहोबाजूंनी मापले.

¹⁶ त्याने मापण्याच्या काठीने पूर्वभाग एकंदर पाचशे हात3 मापला.

¹⁷ त्याने मापण्याच्या काठीने उत्तरभाग एकंदर पाचशे हात मापला.

¹⁸ तसाच मापण्याच्या काठीने दक्षिणभाग एकंदर पाचशे हात मापला.

¹⁹ त्याने पश्‍चिमेकडे वळून मापण्याच्या काठीने तो भाग एकंदर पाचशे हात मापला.

²⁰ त्याने ते चार्‍ही बाजूंनी मापले; पवित्र स्थळे व सामान्य स्थळे एकमेकांपासून वेगळी ठेवण्यासाठी त्याला सभोवार एक भिंत होती; तिची लांबी पाचशे हात व रुंदी पाचशे हात होती.