यहेज्केल 41 - पवित्र शास्त्र RV (Re-edited) Bible (BSI)

¹ नंतर त्याने मला मंदिराच्या गाभार्‍यात नेले; त्याने तेथले खांब मापले तेव्हा त्यांची रुंदी एका बाजूस सहा हात व दुसर्‍या बाजूस सहा हात भरली; ह्या गाभार्‍याची रुंदी मंडपाच्या रुंदीइतकी होती.

² द्वाराची रुंदी दहा हात होती, आणि त्याची एक बाजू पाच हात व दुसरी पाच हात होती; त्याने गाभार्‍याची लांबी चाळीस हात व रुंदी वीस हात मापली.

³ मग आत जाऊन त्याने दरवाजाचा प्रत्येक खांब मापला तो दोन हात भरला; दरवाजाची उंची सहा हात व रुंदी सात हात भरली.

⁴ त्याने गाभार्‍यासमोरच्या जागेची लांबी वीस हात व रुंदी वीस हात मापली; तो मला म्हणाला, “हे परमपवित्रस्थान होय.”

⁵ त्याने मंदिराची भिंत सहा हात मापली; मंदिरासभोवती प्रत्येक बाजूस खोल्या होत्या; त्या प्रत्येकीची रुंदी चार हात भरली.

⁶ बाजूस असलेल्या खोल्या एकीवर एक अशा तीन मजली असून त्या रांगेने तीस होत्या; मंदिराच्या आसपास असलेल्या खोल्यांसाठी जी भिंत होती तिला त्या लागलेल्या होत्या, तरी मंदिराच्या भिंतीला त्या लागलेल्या नव्हत्या.

⁷ बाजूच्या कोठड्या इमारतीच्या सभोवार वरवर गेल्या तसतशा त्या रुंद होत गेल्या, आणि सभोवतालचा भाग वरवर गेला तसतसा तो रुंद होत गेला; म्हणून ह्या इमारतीची रुंदी वरच्या बाजूस अधिक होती, अशी ती रुंदी खालच्यापेक्षा मधल्या मजल्यात व तेथल्यापेक्षा वरच्या मजल्यात वाढत गेली.

⁸ मंदिराला उंच पाया होता असे मी पाहिले; बाजूच्या कोठड्यांचे पाये सहा मोठ्या हातांची एक काठी भरले.

⁹ बाजूच्या कोठड्यांच्या बाहेरील भिंतीची जाडी पाच हात होती; मंदिराच्या बाजूच्या कोठड्यांना लागून एक जागा खुली राहिली होती.2

¹⁰ खोल्यांबाहेर मंदिराच्या आसपास वीस हातांचे अंतर होते.

¹¹ बाजूच्या कोठड्यांचे दरवाजे खुल्या जागेकडे होते; एक दरवाजा उत्तरेकडे व दुसरा दरवाजा दक्षिणेकडे होता; ह्या खुल्या जागेची रुंदी चोहोंकडून पाच हात होती.

¹² मंदिराच्या पश्‍चिमेस सोडलेल्या जागेसमोर जी इमारत होती तिची रुंदी सत्तर हात होती, तिची भिंत चोहोकडून पाच हात जाड होती, व तिची लांबी नव्वद हात होती.

¹³ त्याने मंदिर शंभर हात मापले; आणि ती सोडलेली जागा व भिंतीसह इमारत ही शंभर हात लांब भरली.

¹⁴ मंदिराची पुढली बाजू व पूर्वेकडील सोडलेली जागा ह्यांची रुंदी शंभर हात होती.

¹⁵ मंदिरामागे असलेल्या त्या सोडलेल्या जागेपुढील इमारतीची लांबी व दोन्ही बाजूंना असलेले सज्जे, आतला गाभारा व अंगणातील देवड्या ही सगळी त्याने शंभर हात मापली.

¹⁶ तीनही मजल्यांवर असलेले द्वारांचे उंबरठे, झरोके आणि उंबरठ्याभोवतालचे सज्जे ह्यांना तक्तपोशी होती; जमिनीपासून झरोक्यांपर्यंत भिंतीला तक्तपोशी केली होती व झरोकेही भरून काढले होते;

¹⁷ मंदिरातल्या व बाहेरल्या बाजूची द्वारावरची जागा, सभोवतालच्या भिंतीचे आतले व बाहेरले अंग ही सगळी योग्य प्रमाणात होती.

¹⁸ त्यांवर करूब व खजुरीची झाडे कोरली होती; दोन-दोन करूबांमध्ये एक-एक खजुरीचे झाड होते व प्रत्येक करुबाला दोन तोंडे होती;

¹⁹ करूबाला एक खजुरीच्या झाडाकडे मनुष्याचे मुख व दुसर्‍या खजुरीच्या झाडाकडे तरुण सिंहाचे मुख होते; मंदिरावर चोहोकडे अशा प्रकारचे काम होते.

²⁰ जमिनीपासून दरवाजांच्या वरल्या भागापर्यंत गाभार्‍याच्या भिंतीवर करूब व खजुरीची झाडे कोरली होती.

²¹ गाभार्‍याच्या द्वारांचे खांब चौरस होते; परमपवित्र-स्थानाच्या पुढल्या बाजूचे स्वरूप गाभार्‍याच्या सारखेच होते.

²² वेदी लाकडाची असून तीन हात उंच व दोन हात लांब होती. तिचे कोपरे, तिची बैठक व तिच्या भिंती लाकडाच्या होत्या; त्याने मला म्हटले, “परमेश्वरापुढे असणारे हे मेज आहे.”

²³ गाभार्‍यास व परमपवित्रस्थानास दोन कवाडे होती.

²⁴ एका कवाडास दोन व दुसर्‍यास दोन अशा उघडझाक करता येणार्‍या दोन-दोन झडपा होत्या.

²⁵ भिंतीवरल्याप्रमाणे त्यांच्यावर म्हणजे गाभार्‍याच्या कवाडांवर करूब व खजुरीची झाडे कोरली होती, आणि बाहेरील देवडीच्या बाहेरच्या बाजूस मोठमोठ्या तुळया होत्या.

²⁶ देवडीच्या दोन्ही बाजूंना झरोके असून त्यांच्यावर खजुरीची झाडेही कोरली होती. मंदिराच्या बाजूच्या खोल्या व मोठमोठ्या तुळया अशा तर्‍हेच्या होत्या.