यहेज्केल 35 - पवित्र शास्त्र RV (Re-edited) Bible (BSI)

सेईर पर्वताविषयी भविष्य

¹ परमेश्वराचे वचन मला प्राप्त झाले ते असे :

² “मानवपुत्रा, सेईर डोंगराकडे आपले तोंड कर व त्याच्याविरुद्ध संदेश दे;

³ त्याला सांग, प्रभू परमेश्वर म्हणतो, हे सेईर डोंगरा, पाहा, मी तुझ्याविरुद्ध आहे; मी आपला हात तुझ्यावर चालवीन आणि तुला वैराण व उद्ध्वस्त करीन.

⁴ मी तुझी नगरे ओस करीन व तू उजाड होशील; तेव्हा तुला समजेल की मी परमेश्वर आहे.

⁵ तू कायमचे वैर धरलेस आणि इस्राएल लोकांवर संकट आले तेव्हा, त्यांचा पापमूलक अंतसमय आला तेव्हा, त्यांना तलवारीच्या धारेच्या हवाली केलेस;

⁶ म्हणून प्रभू परमेश्वर म्हणतो, माझ्या जीविताची शपथ, मी तुझ्या रक्तपाताची तयारी करीन व रक्तपात तुझा पिच्छा पुरवील; तू रक्तपाताविषयी नापसंती दाखवली नाहीस म्हणून रक्तपात तुझ्या पाठीस लागेल.

⁷ मी सेईर डोंगर उद्ध्वस्त व वैराण करीन; त्यात येणार्‍याजाणार्‍यांचा उच्छेद करीन.

⁸ त्याच्या वधलेल्या लोकांनी मी त्याचे डोंगर व्यापून टाकीन; तुझ्या टेकड्यांवर, तुझ्या खोर्‍यात व तुझ्या नाल्यांत तलवारीने वधलेले पडतील.

⁹ मी तुला कायमचे उद्ध्वस्त करीन, तुझी नगरे पुन्हा वसायची नाहीत; तेव्हा तुम्हांला समजेल की मी परमेश्वर आहे.

¹⁰ ‘ही दोन राष्ट्रे, हे दोन देश माझे आहेत, आपण त्यांचा ताबा घेऊ,’ असे तेथे परमेश्वर असता तू म्हणालास,

¹¹ म्हणून प्रभू परमेश्वर म्हणतो, माझ्या जीविताची शपथ, तू जो द्वेष दाखवलास, तू त्यांचा द्वेष करून जो हेवा प्रकट केलास, त्यानुसार मी तुझ्याबरोबर वागेन; मी न्याय करून तुला शासन करीन, तेव्हा मी त्यांना प्रकट होईन.

¹² तू इस्राएलाच्या पर्वतांविरुद्ध म्हणालास की, ‘ते उद्ध्वस्त झाले आहेत, ते आम्हांला भक्षण करण्यासाठी दिले आहेत,’ हे तुझे सर्व दुर्भाषण मी परमेश्वराने ऐकले आहे हे तुला कळेल.

¹³ ह्या प्रकारे तुम्ही आपल्या तोंडाने माझ्याविरुद्ध आपली थोरवी मिरवलीत, माझ्याविरुद्ध हवे तितके बोललात; ते मी ऐकले आहे.

¹⁴ म्हणून प्रभू परमेश्वर म्हणतो, सर्व पृथ्वी आनंद करीत असता मी तुला उजाड करीन.

¹⁵ इस्राएल घराण्याचे वतन उद्ध्वस्त झाले तेव्हा तुला हर्ष वाटला, म्हणून मी तुझेही तसेच करीन; हे सेईर डोंगरा, तू वैराण होशील, एकदम सारा अदोम ओसाड होईल; तेव्हा त्यांना समजेल की, मी परमेश्वर आहे.