यहेज्केल 10 - पवित्र शास्त्र RV (Re-edited) Bible (BSI)

देवाचे तेज मंदिरातून निघून जाते

¹ मी पाहिले तेव्हा करूबांवरल्या छतांवर नीलमण्यासारखे काही दिसले, ते सिंहासनाच्या प्रतिमेसारखे होते.

² मग परमेश्वर तागाचे वस्त्र ल्यालेल्या त्या मनुष्याला म्हणाला, “करूबांखाली चाकांच्या मध्ये जाऊन करूबांच्या मधून इंगळांनी आपली ओंजळ भर व ते नगरावर विखर.” तेव्हा तो माझ्यादेखत गेला.

³ तो मनुष्य गेला तेव्हा करूब मंदिराच्या उजवीकडे उभे होते आणि आतले अंगण मेघाने व्यापून टाकले होते.

⁴ परमेश्वराचे तेज करूबांवरून निघून मंदिराच्या उंबरठ्यावर आले होते; मंदिर मेघाने व्यापले होते व अंगण परमेश्वराच्या तेजाच्या प्रभेने भरून गेले होते.

⁵ करूबांच्या पंखांचा ध्वनी बाहेरच्या अंगणात ऐकू जात होता; सर्वसमर्थ देवाच्या वाणीसारखा तो होता.

⁶ त्याने शुभ्र तागाचे वस्त्र ल्यालेल्या मनुष्याला आज्ञा देऊन सांगितले की, “त्या चाकांमधून, करूबांच्या मधून, इंगळ घे;” तेव्हा तो जाऊन चाकाच्या बाजूला उभा राहिला.

⁷ मग त्या करूबांमधल्या एकाने आपला हात लांबवून करूबांमधल्या विस्तवास तो लावला; त्याने त्यातून काही इंगळ घेऊन तागाचे वस्त्र ल्यालेल्या त्या मनुष्याच्या हातात दिले; तो ते घेऊन निघून गेला.

⁸ तेथे करूबांजवळ त्यांच्या पंखांखाली मनुष्याच्या हाताच्या आकृतीसारखे काही दृष्टीस पडले.

⁹ मी पाहिले तर प्रत्येक करूबाच्या बाजूस एक अशी सगळ्या करूबांच्या बाजूला चार चाके होती; ती चाके वैडूर्यमण्यांसारखी दिसत होती.

¹⁰ दिसायला त्या चार चाकांचा डौल सारखा होता; ती जशी काय चाकाआड चाक अशी होती.

¹¹ ते चालत तेव्हा चार्‍ही दिशांपैकी पाहिजे त्या दिशेला जात; चालताना वळत नसत; प्रत्येक मस्तकाच्या कोणत्याही रोखाने ते जात; चालताना वळत नसत.

¹² त्यांचे सर्व शरीर, पाठ, हात, पंख व चार चाके ह्यांना सर्वत्र डोळे होते.

¹³ चाकांना गरगर फिरणारी चाके असे म्हटलेले मी ऐकले.

¹⁴ त्या प्रत्येकाला चार मुखे होती; पहिले मुख करूबाच्या मुखासारखे होते, दुसरे मनुष्याच्या मुखासारखे होते, तिसरे सिंहाच्या मुखासारखे होते व चौथे गरुडाच्या मुखासारखे होते.

¹⁵ ते करूब उडून वर गेले; मी खबार नदीच्या तीरी पाहिला तो हा प्राणी होय.

¹⁶ करूब चालले म्हणजे चाके त्यांच्याबरोबर चालत आणि भूमीवरून उंच उडण्यासाठी ते आपले पंख उचलत तेव्हा ती चाके वेगळी होत नसत.

¹⁷ ते थांबले म्हणजे ती थांबत, ते वर उडाले म्हणजे त्यांच्याबरोबर ती वर जात; कारण त्या प्राण्यांचा आत्मा त्यांत होता.

¹⁸ तेव्हा परमेश्वराचे तेज मंदिराच्या उंबरठ्यावरून निघून करूबांवर जाऊन राहिले.

¹⁹ निघतेवेळी करूबांनी आपले पंख उचलले व ते माझ्यादेखत भूमीवरून वर चढून गेले; त्यांच्याबरोबर चाकेही गेली; ते परमेश्वराच्या मंदिराच्या पूर्वद्वारापुढे थांबले; त्यांच्यावर इस्राएलाच्या देवाचे तेज होते.

²⁰ खबार नदीच्या तीरी मी इस्राएलाच्या देवाच्या आसनाखाली पाहिला होता तो हा प्राणी होय; ते करूब आहेत हे मला कळले.

²¹ त्या प्रत्येकाला चार मुखे होती व प्रत्येकाला चार पंख होते; त्यांच्या पंखांखाली मनुष्याच्या हातासारखी आकृती होती.

²² त्यांच्या चेहर्‍यांविषयी म्हणाल, तर खबार नदीच्या तीरी मी पाहिलेल्या चेहर्‍यांसारखेच ते होते; त्यांची स्वरूपे व ते स्वतः तसेच होते; ते नीट आपल्यासमोर चालत.