निर्गम 37 - पवित्र शास्त्र RV (Re-edited) Bible (BSI)

कोशाची रचना

¹ मग बसालेलाने बाभळीच्या लाकडाचा एक कोश बनवला. त्याची लांबी अडीच हात, रुंदी दीड हात आणि उंची दीड हात होती;

² त्याने तो आतून बाहेरून शुद्ध सोन्याने मढवला, पण त्याच्या सभोवती सोन्याचा कंगोरा केला.

³ त्याच्या चार्‍ही पायांना लावण्यासाठी त्याने सोन्याच्या चार कड्या ओतून एका बाजूला दोन व दुसर्‍या बाजूला दोन अशा लावल्या.

⁴ त्याने बाभळीच्या लाकडाचे दांडे करून तेही सोन्याने मढवले.

⁵ कोश उचलण्यासाठी ते दांडे त्याने त्याच्या दोन्ही बाजूच्या कड्यांत घातले.

⁶ त्याने शुद्ध सोन्याचे दयासन बनवले; त्याची लांबी अडीच हात व रुंदी दीड हात होती.

⁷ त्याने सोने घडवून दोन करूब बनवले; ते दयासनाच्या दोन्ही टोकांसाठी बनवले;

⁸ त्याने एक करूब एका टोकासाठी व दुसरा करूब दुसर्‍या टोकासाठी बनवला; करूब व दयासन अखंड असून ते करूब त्याने दोन्ही टोकांना बनवले.

⁹ त्या करूबांचे पंख असे पसरले होते की, त्यांनी ते दयासन झाकले होते; त्यांची तोंडे समोरासमोर असून त्यांची दृष्टी दयासनासमोर लागलेली होती.

मेजाची रचना

¹⁰ त्याने बाभळीच्या लाकडाचे मेज बनवले, त्याची लांबी दोन हात व रुंदी एक हात व उंची दीड हात होती;

¹¹ त्याने ते शुद्ध सोन्याने मढवले व त्याच्या सभोवती सोन्याचा कंगोरा केला;

¹² आणि त्याने त्याच्यासाठी चार बोटे रुंदीची एक पाळ केली. त्या पाळीस सभोवती सोन्याचा कंगोरा केला.

¹³ त्याच्यासाठी सोन्याच्या चार कड्या ओतून तयार केल्या. त्याच्या चार्‍ही पायांवरल्या चार कोपर्‍यांना त्या लावल्या.

¹⁴ ह्या कड्या त्या पाळीच्या लगत होत्या; त्या मेज उचलायच्या दांड्यांसाठी होत्या.

¹⁵ मेज उचलण्यासाठी त्याने बाभळीच्या लाकडाचे दांडे केले व ते सोन्याने मढवले.

¹⁶ आणि त्याने मेजावरली पात्रे म्हणजे तबके, धूपपात्रे, सुरया व पेयार्पणे ओतण्याकरता कटोरे ही सर्व शुद्ध सोन्याची बनवली.

दीपवृक्षाची रचना

¹⁷ त्याने शुद्ध सोन्याचा एक दीपवृक्ष बनवला. हा दीपवृक्ष, त्याची बैठक, त्याचा दांडा, त्याच्या वाट्या, त्याची बोंडे व त्याची फुले ही सर्व एकाच अखंड तुकड्याची घडवली.

¹⁸ ह्या दीपवृक्षाला सहा शाखा होत्या; एका बाजूला तीन शाखा व दुसर्‍या बाजूला तीन शाखा;

¹⁹ प्रत्येक शाखेला बदामाच्या फुलांसारख्या तीन-तीन वाट्या बोंडाफुलांसह केल्या. आणि दुसर्‍या बाजूच्या त्याच्या जोडीच्या प्रत्येक शाखेलाही बदामाच्या फुलांसारख्या तीन-तीन वाट्या बोंडाफुलांसह केल्या; दीपवृक्षामधून निघालेल्या सहा शाखांची रचना अशीच होती.

²⁰ दीपवृक्षाच्या दांड्याला बदामाच्या फुलांसारख्या बोंडाफुलांसह चार वाट्या होत्या.

²¹ दीपवृक्षामधून निघणार्‍या सहा शाखांपैकी दोन-दोन शाखा आणि त्याच्या खाली असलेले एकेक बोंड ही एकाच अखंड तुकड्यांची होती.

²² बोंडे व शाखा ही सर्व अखंड असून तो सबंध दीपवृक्ष शुद्ध सोन्याचा एकच घडीव तुकडा केला.

²³ त्याने त्या दीपवृक्षाचे सात दिवे, त्याचे चिमटे व ताटल्या शुद्ध सोन्याच्या केल्या.

²⁴ त्याने तो दीपवृक्ष व त्याची सर्व उपकरणे एक किक्कार शुद्ध सोन्याची केली.

धूपवेदीची रचना

²⁵ मग त्याने बाभळीच्या लाकडांची धूपवेदी केली; तिची लांबी एक हात व रुंदी एक हात अशी ती चौरस होती. तिची उंची दोन हात होती व तिची शिंगे अंगचीच होती.

²⁶ त्याने त्या वेदीचा वरचा भाग, तिच्या चार्‍ही बाजू व तिची शिंगे शुद्ध सोन्याने मढवली आणि तिला सभोवती सोन्याचा कंगोरा केला.

²⁷ वेदी उचलून नेण्याचे दांडे घालता येण्यासाठी त्याने सोन्याच्या कड्या करून त्या कंगोर्‍याच्या खाली तिच्या दोन्ही अंगांना, दोन कोनांस दोन-दोन अशा लावल्या.

²⁸ त्याने बाभळीच्या लाकडाचे दांडे करून ते सोन्याने मढवले.

अभिषेकाचे तेल आणि सुगंधी द्रव्य तयार करण्याची कृती

²⁹ त्याने अभिषेकाचे पवित्र तेल आणि सुगंधी द्रव्ययुक्त शुद्ध धूप गांधी बनवतात तसा बनवला.