निर्गम 26 - पवित्र शास्त्र RV (Re-edited) Bible (BSI)

निवासमंडप

¹ निवासमंडप दहा पडद्यांचा कर. ते कातलेल्या तलम सणाच्या कापडाचे आणि निळ्या, जांभळ्या व किरमिजी रंगांच्या सुताचे तयार करावेत व त्यांवर कुशल कारागिरांकडून करूब काढवावेत.

² एकेका पडद्याची लांबी अठ्ठावीस हात आणि रुंदी चार हात असावी; ते सर्व पडदे एकाच मापाचे असावेत.

³ त्यांतले पाच पडदे एकमेकांना जोडलेले असावेत व दुसरे पाच पडदे एकमेकांना जोडलेले असावेत.

⁴ जेथे एक पडदा दुसर्‍याशी जोडला जाईल तेथे किनारीवर निळ्या सुताची बिरडी कर; तसेच दुसर्‍या पडद्यावरील किनारीवरही तशीच बिरडी कर.

⁵ एका पडद्याला पन्नास बिरडी कर आणि दुसर्‍या पडद्याच्या किनारीला पन्नास बिरडी कर. ही बिरडी समोरासमोर असावीत.

⁶ तसेच सोन्याचे पन्नास आकडे बनवावेत आणि ह्या आकड्यांनी पडदे एकमेकांना अशा प्रकारे जोडावेत की सर्व मिळून निवासमंडप अखंड होईल.

⁷ निवासमंडपावरच्या तंबूसाठी बकर्‍यांच्या केसांचे पडदे करावेत; हे पडदे अकरा असावेत.

⁸ एकेका पडद्याची लांबी तीस हात व रुंदी चार हात असावी; हे अकरा पडदे एकाच मापाचे असावेत.

⁹ पाच पडदे एकत्र जोडावेत आणि सहा पडदे एकत्र जोडावेत; सहावा पडदा तंबूच्या पुढल्या बाजूने दुमडावा.

¹⁰ अशा रीतीने जोडून केलेल्या एका कनातीच्या बाहेरील शेवटच्या पडद्याच्या किनारीवर पन्नास बिरडी करावीत, दुसर्‍या कनातीच्या बाहेरील शेवटच्या पडद्याच्या किनारीवरही तशीच पन्नास बिरडी करावीत.

¹¹ आणि पितळेचे पन्नास आकडे करावेत, ते बिरड्यांत घालून तंबू असा जोडावा की तो अखंड होईल.

¹² तंबूच्या पडद्यांचा लोंबत राहिलेला भाग म्हणजे उरलेला अर्धा पडदा निवासमंडपाच्या मागच्या बाजूला लोंबता सोडावा;

¹³ आणि तंबूचे पडदे लांबीकडून हातभर ह्या बाजूला व हातभर त्या बाजूला असे निवासमंडप झाकण्यासाठी त्याच्या दोन्ही बाजूंना लोंबते ठेवावेत.

¹⁴ तंबूसाठी तांबडा रंग दिलेल्या मेंढ्यांच्या कातड्याचे एक आच्छादन आणि त्याच्यावर तहशांच्या कातड्याचे एक आच्छादन करावे.

¹⁵ मग निवासमंडपासाठी बाभळीच्या लाकडाच्या उभ्या फळ्या कराव्यात.

¹⁶ प्रत्येक फळीची लांबी दहा हात व रुंदी दीड हात असावी.

¹⁷ एक फळी दुसरीशी जोडण्यासाठी तिला दोन-दोन कुसे असावीत; निवासमंडपाच्या सर्व फळ्या अशाच कराव्यात.

¹⁸ निवासमंडपासाठी ज्या फळ्या तू करशील त्यांपैकी वीस फळ्या दक्षिण बाजूसाठी असाव्यात.

¹⁹ ह्या वीस फळ्यांच्या खाली लावण्यासाठी चांदीच्या चाळीस उथळ्या बनवाव्यात म्हणजे एकेका फळीच्या खाली कुसांसाठी दोन-दोन उथळ्या असतील.

²⁰ तसेच निवासमंडपाच्या दुसर्‍या म्हणजे उत्तर बाजूसाठी वीस फळ्या कराव्यात,

²¹ त्यांच्यासाठी चांदीच्या चाळीस उथळ्या बनवाव्यात म्हणजे एकेका फळीच्या खाली दोन-दोन उथळ्या असतील.

²² निवासमंडपाच्या मागील म्हणजे पश्‍चिम बाजूसाठी सहा फळ्या कराव्यात,

²³ मागच्या बाजूला निवासमंडपाच्या कोपर्‍यांसाठी दोन फळ्या कराव्यात.

²⁴ ह्या दोन फळ्या खालच्या बाजूस सुट्या ठेवून वरच्या भागी एकेका कडीने जोडाव्यात. कोपर्‍याच्या दोन्ही फळ्या अशाच असाव्यात; दोन्ही कोपर्‍यांसाठी अशा फळ्या असाव्यात.

²⁵ आठ फळ्या व त्यांना चांदीच्या सोळा उथळ्या असाव्यात, म्हणजेच एकेका फळीच्या खाली दोन-दोन उथळ्या असाव्यात.

²⁶ बाभळीच्या लाकडाचे अडसर तयार करावेत; निवासमंडपाच्या एका बाजूच्या फळ्यांसाठी पाच,

²⁷ आणि दुसर्‍या बाजूच्या फळ्यांसाठी पाच आणि त्याच्या पश्‍चिमेला म्हणजे मागच्या बाजूसाठी पाच अडसर बनवावेत.

²⁸ मधला अडसर एका टोकापासून दुसर्‍या टोकापर्यंत पोहचेल असा असावा.

²⁹ त्या फळ्या सोन्याने मढवाव्यात आणि अडसर लावण्याच्या कड्या सोन्याच्या बनवाव्यात, अडसरही सोन्याने मढवावेत.

³⁰ मी तुला पर्वतावर दाखवलेल्या नमुन्याप्रमाणे निवासमंडप उभारावा.

³¹ तसेच निळ्या, जांभळ्या आणि किरमिजी रंगाच्या सुताचा व कातलेल्या तलम सणाच्या कापडाचा एक अंतरपट बनवावा व त्यावर कुशल कारागिराकडून करूब काढवावेत;

³² हा पट सोन्याने मढवलेल्या बाभळीच्या लाकडाच्या चार खांबांवर लटकवावा, त्याच्या आकड्या सोन्याच्या असाव्यात व ते खांब चांदीच्या चार उथळ्यांत उभे करावेत.

³³ अंतरपट आकड्यांत लटकवून त्याच्याआड आतल्या बाजूला साक्षपटाचा कोश ठेवावा; तुमच्याकरता हा अंतरपट पवित्रस्थान व परमपवित्रस्थान ही अलग करील.

³⁴ मग परमपवित्रस्थानात साक्षपटाच्या कोशावर दयासन ठेवावे.

³⁵ आणि त्या अंतरपटाच्या बाहेर निवासमंडपाच्या उत्तर बाजूला मेज ठेवावे. दक्षिण बाजूला मेजासमोर दीपवृक्ष ठेवावा.

³⁶ तंबूच्या दारासाठी निळ्या, जांभळ्या व किरमिजी रंगाच्या सुताचा व कातलेल्या तलम सणाच्या कापडाचा वेलबुट्टीदार पडदा बनवावा.

³⁷ ह्या पडद्यासाठी बाभळीच्या लाकडाचे पाच खांब करावेत. ते सोन्याने मढवावेत. त्याच्या आकड्या सोन्याच्या असाव्यात आणि त्यांच्यासाठी पितळेच्या पाच उथळ्या ओताव्यात.