निर्गम 25 - पवित्र शास्त्र RV (Re-edited) Bible (BSI)

इस्राएल लोकांनी आणायचे दान

¹ परमेश्वर मोशेला म्हणाला :

² इस्राएल लोकांना असे सांग की त्यांनी माझ्यासाठी अर्पण आणावे; ज्या कोणाची मनापासून अर्पण करण्याची इच्छा असेल त्या प्रत्येकापासून माझ्यासाठी अर्पण स्वीकारावे.

³ ज्या वस्तूंची अर्पणे त्यांच्यापासून स्वीकारायची त्या ह्या : सोने, चांदी, पितळ;

⁴ निळ्या, जांभळ्या आणि किरमिजी रंगाचे सूत व तलम सणाचे कापड, बकर्‍यांचे केस;

⁵ लाल रंग दिलेली मेंढ्यांची कातडी, तहशाची1 कातडी, बाभळीचे लाकूड;

⁶ दिव्यांसाठी तेल, अभिषेकाच्या तेलासाठी आणि सुगंधी धूपासाठी मसाले;

⁷ एफोद2 व ऊरपट ह्यांत जडवण्यासाठी गोमेद मणी आणि इतर रत्ने.

⁸ मी त्यांच्यामध्ये निवास करावा म्हणून त्यांनी माझ्यासाठी एक पवित्रस्थान तयार करावे.

⁹ निवासमंडपाचा नमुना व त्यातील सगळ्या साहित्याचा नमुना तुला दाखवतो त्या सगळ्यांप्रमाणे तुम्ही ते तयार करावे.

साक्षीचा कोश

¹⁰ बाभळीच्या लाकडाचा एक कोश बनवावा; त्याची लांबी अडीच हात, रुंदी दीड हात व उंची दीड हात असावी.

¹¹ तो आतूनबाहेरून शुद्ध सोन्याने मढवावा आणि कोशावर सभोवती सोन्याचा कंगोरा करावा;

¹² त्याच्या चार्‍ही पायांना लावण्यासाठी सोन्याच्या चार कड्या ओतून एका बाजूला दोन व दुसर्‍या बाजूला दोन अशा लावाव्यात.

¹³ आणि बाभळीच्या लाकडाचे दांडे करून तेही सोन्याने मढवावेत.

¹⁴ तो कोश उचलण्यासाठी हे दांडे त्याच्या दोहो बाजूंच्या कड्यात घालावेत.

¹⁵ हे दांडे कोशाच्या कड्यातच राहावेत; त्यातून ते काढू नयेत.

¹⁶ आणि जो साक्षपट मी तुला देईन तोही त्या कोशात ठेवावा.

¹⁷ तू शुद्ध सोन्याचे एक दयासन1 बनवावेस; त्याची लांबी अडीच हात व रुंदी दीड हात असावी;

¹⁸ आणि सोन्याचे दोन करूब2 दयासनाच्या दोन्ही टोकांसाठी कर; ते घडीव कामाचे असावेत.

¹⁹ एक करूब एका टोकासाठी व दुसरा करूब दुसर्‍या टोकासाठी बनवावा; हे करूब दयासनाशी अखंड ठेवून दोन्ही टोकांना बनवावेत.

²⁰ त्या करूबांचे पंख असे पसरलेले असावेत की त्यांनी ते दयासन झाकले जावे आणि त्यांची तोंडे समोरासमोर असून त्यांची दृष्टी दयासनाकडे लागलेली असावी.

²¹ दयासन कोशावर लावावे आणि जो साक्षपट मी तुला देईन तो त्या कोशात ठेवावा.

²² तेथे तुला मी भेटत जाईन; आणि इस्राएल लोकांसाठी ज्या काही गोष्टीसंबंधाने मी तुला आज्ञा देणार आहे, त्या सर्वांविषयी मी दयासनावरून त्या साक्षपटाच्या कोशावरील दोन्ही करूबांमधून तुझ्याशी बोलत जाईन.

समक्षतेच्या भाकरींसाठी मेज

²³ तसेच बाभळीच्या लाकडाचे एक मेज बनव; त्याची लांबी दोन हात, रूंदी एक हात व उंची दीड हात असावी.

²⁴ ते शुद्ध सोन्याने मढवून त्याच्या सभोवती सोन्याचा कंगोरा करावा,

²⁵ आणि त्याच्यासाठी चार बोटे रुंदीची एक पाळ करून तिच्या सभोवती सोन्याचा कंगोरा करावा.

²⁶ सोन्याच्या चार कड्या करून त्याच्या चार्‍ही पायांवरच्या चार कोपर्‍यांना त्या असाव्यात.

²⁷ ह्या कड्या पाळीच्या लगत असाव्यात. मेज उचलण्यासाठी त्यात दांडे घालावेत.

²⁸ मेज उचलण्याचे हे दांडे बाभळीच्या लाकडाचे करून सोन्याने मढवावेत;

²⁹ त्यावरची तबके, धूपपात्रे, सुरया आणि पेयार्पणे ओतण्याकरता वाट्या बनव; ही शुद्ध सोन्याची बनवावीत.

³⁰ आणि मेजावर माझ्यापुढे समक्षतेची भाकर नित्य ठेवावी.

सोन्याचा दीपवृक्ष

³¹ आणि शुद्ध सोन्याचा एक दीपवृक्ष तू बनवावास; हा दीपवृक्ष घडीव कामाचा असावा; त्याची बैठक, त्याचा दांडा, त्याच्या वाट्या, त्याची बोंडे व त्याची फुले ही सर्व एकाच अखंड तुकड्याची असावीत;

³² आणि ह्या दीपवृक्षाला सहा शाखा असाव्यात; त्याच्या एका बाजूला तीन शाखा व दुसर्‍या बाजूला तीन शाखा असाव्यात;

³³ प्रत्येक शाखेला बदामाच्या फुलांसारख्या तीन-तीन वाट्या बोंडाफुलांसह असाव्यात, दुसर्‍या बाजूच्या त्याच्या जोडीच्या प्रत्येक शाखेलाही बदामाच्या फुलांसारख्या तीन-तीन वाट्या बोंडाफुलांसह असाव्यात; दीपवृक्षामधून निघालेल्या सहा शाखांची रचना अशीच असावी;

³⁴ आणि दीपवृक्षाच्या दांड्याला बदामाच्या फुलां-सारख्या बोंडाफुलांसह चार वाट्या असाव्यात;

³⁵ आणि दीपवृक्षामधून निघणार्‍या सहा शाखांपैकी दोन-दोन शाखा आणि त्यांच्याखाली असलेले एकेक बोंड ही एकाच अखंड तुकड्याची असावीत.

³⁶ त्याची बोंडे व त्याच्या शाखा ही सर्व एकाच अखंड तुकड्याची असावीत, तो सबंध दीपवृक्ष शुद्ध सोन्याचा एकच घडीव तुकडा असावा.

³⁷ आणि त्याच्यासाठी सात दिवे करून दीपवृक्षाच्या पुढच्या बाजूला त्यांचा प्रकाश पडेल अशा रीतीने त्याच्यावर ठेवावेत.

³⁸ त्याचे चिमटे आणि त्याच्या ताटल्या ही सर्व शुद्ध सोन्याची असावीत.

³⁹ ह्या सर्व उपकरणांसहित हा दीपवृक्ष एक किक्कार3 शुद्ध सोन्याचा करावा.

⁴⁰ पर्वतावर तुला दाखवलेल्या नमुन्यांप्रमाणे ह्या सर्व वस्तू बनवण्याकडे तू लक्ष दे.