आमोस 7 - पवित्र शास्त्र RV (Re-edited) Bible (BSI)

विनाशाचे तीन दृष्टान्त : टोळ, अग्नी व ओळंबा

¹ प्रभू परमेश्वराने मला दाखवले : तेव्हा पाहा, पडसाळ उगवण्याच्या सुमारास त्याने टोळ उत्पन्न केले; आणि पाहा, राजाकरता कापणी झाल्यावर उगवलेले ते गवत होते.

² आणि असे झाले की त्यांनी देशातील झाडपाला खाऊन फस्त केला तेव्हा मी म्हणालो, “हे प्रभू परमेश्वरा, मी विनंती करतो, क्षमा कर, याकोबाचा कसा टिकाव लागेल? कारण तो दुर्बळ आहे.”

³ तेव्हा परमेश्वराला ह्याबद्दल अनुताप झाला व तो म्हणाला, “असे घडायचे नाही.”

⁴ प्रभू परमेश्वराने मला दाखवले तेव्हा पाहा, शासन करण्यास त्याने अग्नीला बोलावले, तेव्हा त्याने महासागर खाऊन टाकला व भूमीही तो खाऊन टाकणार होता.

⁵ तेव्हा मी म्हणालो, “हे प्रभू परमेश्वरा, मी विनंती करतो की हे थांबव; याकोबाचा कसा टिकाव लागेल, कारण तो दुर्बळ आहे!”

⁶ तेव्हा परमेश्वराला ह्याबद्दल अनुताप झाला; प्रभू परमेश्वर म्हणाला, “हेही घडायचे नाही.”

⁷ त्याने मला दाखवले तेव्हा पाहा, ओळंबा लावून बांधलेल्या भिंतीवर प्रभू उभा आहे, त्याच्या हातात ओळंबा आहे.

⁸ परमेश्वर मला म्हणाला, “आमोसा, तुला काय दिसते?” मी म्हणालो, “ओळंबा.” प्रभू म्हणाला, “पाहा, माझे लोक इस्राएल ह्यांच्यामध्ये मी ओळंबा धरतो; मी ह्यापुढे त्यांची गय करणार नाही;

⁹ इसहाकाची उच्च स्थाने ओसाड होतील, इस्राएलाच्या पवित्र स्थानांची नासधूस होईल, आणि मी तलवार घेऊन यराबामाच्या घराण्यावर उठेन.”

आमोस व अमस्या

¹⁰ मग बेथेल येथील याजक अमस्या ह्याने इस्राएलाचा राजा यराबाम ह्याला निरोप पाठवला की, “इस्राएल घराण्याच्या भरवस्तीत आमोसाने फितुरी केली आहे, त्याची सर्व वचने देशाला सहन होत नाहीत.

¹¹ कारण आमोस म्हणतो, ‘यराबाम तलवारीने मरेल, व इस्राएलास त्याच्या देशातून खातरीने पकडून नेतील.”’

¹² मग अमस्या आमोसाला म्हणाला, “अरे द्रष्ट्या, जा, यहूदा देशात पळून जा; तेथे संदेश सांगून पोट भर;

¹³ पण बेथेलात ह्यापुढे संदेश सांगू नकोस, कारण हे राजाचे पवित्रस्थान, ही राजधानी आहे.”

¹⁴ तेव्हा आमोस अमस्याला म्हणाला, “मी संदेष्टा नाही किंवा संदेष्ट्याचा पुत्र नाही; तर मी गुराखी, उंबरांच्या झाडांची निगा राखणारा आहे.

¹⁵ मी कळपांमागे असता परमेश्वराने मला निवडले; परमेश्वर मला म्हणाला, ‘जा, माझे लोक इस्राएल ह्यांना संदेश सांग.’

¹⁶ तर परमेश्वराचे वचन ऐक; तू म्हणतोस ‘इस्राएलाविरुद्ध संदेश सांगू नकोस, इसहाकाच्या घराण्याविरुद्ध शब्द काढू नकोस.”’

¹⁷ ह्यास्तव परमेश्वर म्हणतो की, “तुझी बायको नगरात वेश्या होईल, तुझे पुत्र व तुझ्या कन्या तलवारीने पडतील. तुझी जमीन सूत्र लावून वाटून टाकतील, तू स्वतः अमंगळ देशात मरशील, आणि इस्राएलास त्याच्या देशातून खातरीने बंदिवान करून नेतील.”