२ इतिहास 4 - पवित्र शास्त्र RV (Re-edited) Bible (BSI)

¹ मग त्याने पितळेची एक वेदी केली, तिची लांबीरुंदी वीस-वीस हात व रुंदी दहा हात होती.

² आणखी त्याने पितळ ओतून गंगाळसागर केला; ह्या काठापासून त्या काठापर्यंत त्याचा व्यास दहा हात होता; त्याचा आकार वाटोळा होता, त्याची उंची पाच हात होती व त्याच्या परिघाला तीस हात सूत लागे.

³ त्याच्या खाली सभोवार एकेक हाताच्या अंतरावर दहा-दहा बैलांच्या आकृती केल्या होत्या; त्या गंगाळाच्या सभोवार होत्या; गंगाळ ओतले त्याबरोबर त्या बैलांच्या दोन रांगा ओतलेल्या होत्या.

⁴ ते गंगाळ बारा बैलांवर ठेवले होते, तीन बैल उत्तराभिमुख, तीन पश्‍चिमाभिमुख, तीन दक्षिणाभिमुख व तीन पूर्वाभिमुख होते; त्यांच्यावर गंगाळसागर ठेवला होता; त्यांची मागली अंगे आतल्या बाजूस होती.

⁵ त्याची जाडी चौंगाभर होती; त्याचे तोंड कटोर्‍याच्या तोंडासारखे असून त्यावर कमलपुष्पांचे काम केले होते; त्यात तीन हजार बथ2 पाणी मावे.

⁶ त्याने धुण्यासाठी आणखी दहा गंगाळे करून पाच उजवीकडे व पाच डावीकडे ठेवली; त्यांत होमबलीच्या वस्तू धूत असत, पण गंगाळसागर हा फक्त याजकांना धुण्यासाठी असे.

⁷ त्याने सोन्याच्या दहा समया विधीपूर्वक बनवल्या व त्या पाच उजवीकडे व पाच डावीकडे अशा मंदिरात ठेवून दिल्या.

⁸ तशीच त्याने दहा मेजे करून उजवीकडे पाच व डावीकडे पाच अशी मंदिरात ठेवली. त्याने सोन्याचे शंभर कटोरे केले.

⁹ आणखी त्याने याजकांचे अंगण व एक मोठे अंगण केले आणि अंगणाला दरवाजे करून त्यांची कवाडे पितळेने मढवली.

¹⁰ त्याने तो गंगाळसागर मंदिराच्या उजवीकडे आग्नेयेस ठेवून दिला.

¹¹ हूरामाने हंडे, फावडी व कटोरे केले. ह्या प्रकारे हूरामाने शलमोन राजासाठी देवमंदिराचे जे काम करायचे होते ते संपवले.

¹² दोन खांब, त्यांवरील गोठ, दोहो खांबांच्या शेंड्यांवरील कळस व ह्या खांबांच्या शेंड्यांवरच्या कळसांचे दोन गोठ वेष्टण्यासाठी दोन जाळ्या केल्या.

¹³ ह्या दोन जाळ्यांना चारशे डाळिंबे आणि खांबांच्या कळसांचे दोन गोठ झाकण्यासाठी एकेका जाळीसाठी डाळिंबांच्या दोन-दोन रांगा केल्या.

¹⁴ त्याने चौरंग करून त्यांवर गंगाळे बनवून ठेवली;

¹⁵ एक गंगाळसागर व त्याच्याखाली बारा बैल केले.

¹⁶ हंडे, फावडी, काटे, इत्यादी सर्व सामान हूरामाने शलमोन राजासाठी परमेश्वराच्या मंदिराकरिता उजळ पितळेचे केले.

¹⁷ राजाने ती यार्देन खोर्‍यात सुक्कोथ व सरेदा ह्यांच्यामधील प्रदेशातल्या चिकणमातीत ओतवली;

¹⁸ शलमोनाने ही पात्रे विपुल बनवली; पितळेचे वजन काढले नाही.

¹⁹ आणखी शलमोनाने देवमंदिरातील सर्व पात्रे, सोन्याची वेदी, व समर्पित भाकरी ठेवण्याची मेजे;

²⁰ दीपवृक्ष व त्यांचे शुद्ध सोन्याचे दिवे जे गाभार्‍यासमोर विधिपूर्वक जळत ठेवत असत ते;

²¹ निर्भेळ सोन्याची फुले, दिवे व चिमटे;

²² त्याप्रमाणेच शुद्ध सोन्याच्या कातरी, कटोरे, चमचे व धुपाटणीही बनवली; मग प्रवेशासाठी परमपवित्र-स्थानाच्या आतील कवाडे आणि मंदिराची कवाडे ही सोन्याची बनवली.