२ इतिहास 17 - पवित्र शास्त्र RV (Re-edited) Bible (BSI)

यहोशाफाटाच्या राज्याची मजबुती

¹ त्याचा पुत्र यहोशाफाट त्याच्या जागी राजा झाला; इस्राएलाशी सामना करता यावा म्हणून त्याने आपली मजबुती केली.

² त्याने यहूदाच्या सर्व तटबंदी नगरांतून लष्कर ठेवले; यहूदा देशात आणि एफ्राइमातील जी नगरे त्याचा बाप आसा ह्याने हस्तगत केली त्यांत त्याने ठाणी बसवली.

³ यहोशाफाट आपला पूर्वज दावीद प्रथमारंभी जसे वागला तसा वागला; तो बआलमूर्तीच्या नादी लागला नाही, म्हणून परमेश्वर त्याच्याबरोबर असे;

⁴ तो आपल्या बापाच्या देवाला शरण गेला व त्याच्या आज्ञांप्रमाणे वागला; इस्राएलांच्या कृतीप्रमाणे तो वागला नाही.

⁵ ह्यास्तव परमेश्वराने त्याच्या हातांनी राज्याची मजबुती केली; सर्व यहूदी लोक त्याला भेटी आणत, तो धन व मान ह्यांमुळे संपन्न झाला.

⁶ परमेश्वराच्या मार्गांनी चालण्यात त्याच्या मनास उत्साह वाटे; त्याने यहूदातून उच्च स्थाने व अशेरा मूर्ती काढून टाकल्या.

⁷ त्याने आपल्या कारकिर्दीच्या तिसर्‍या वर्षी आपले सरदार बेन-हईल, ओबद्या, जखर्‍या, नथनेल व मीखाया ह्यांना यहूदाच्या नगरांना शिस्त लावण्यासाठी पाठवले;

⁸ त्यांच्याबरोबर शमाया, नथन्या, जबद्या, असाएल, शमीरामोथ, यहोनाथान, अदोनीया, तोबीया, तोब-अदोनीया हे लेवी आणि अलीशामा व अहोराम हे याजक त्याने पाठवले.

⁹ त्यांनी आपल्याबरोबर परमेश्वराच्या नियमशास्त्राचा ग्रंथ घेऊन यहूदाच्या नगरात जाऊन शिक्षण दिले; यहूदाच्या सर्व नगरांत फिरून त्यांनी लोकांना शिकवले.

¹⁰ यहूदाच्या आसपासच्या सर्व देशांच्या राजांना परमेश्वराचा असा धाक बसला की त्यांनी यहोशाफाटाशी युद्ध केले नाही.

¹¹ कित्येक पलिष्ट्यांनी यहोशाफाटास भेटी व खंडणी म्हणून चांदी आणली; अरबी लोक सात हजार सातशे मेंढरे व सात हजार सातशे बकरी ह्यांचे कळप घेऊन त्याच्याकडे आले.

¹² यहोशाफाट फार थोर झाला व त्याने यहूदात गढ्या व भांडारनगरे बांधली.

¹³ यहूदाच्या नगरात त्याची मोठमोठी कामे चालत; यरुशलेमेत त्याचे शूर वीर राहत.

¹⁴ त्यांच्या पितृकुळांप्रमाणे त्यांची गणती ही : यहूदाच्या सहस्रपतींचा अदना नायक असून त्याच्याबरोबर तीन लक्ष शूर वीर होते;

¹⁵ त्याच्या खालोखाल यहोहानान नायक असून त्याच्याबरोबर दोन लक्ष ऐंशी हजार पुरुष होते,

¹⁶ त्याच्या खालोखाल जिख्रीचा पुत्र अमस्या हा असून त्याने आपल्या खुशीने स्वतःस परमेश्वराला वाहून घेतले होते; त्याच्याबरोबर दोन लक्ष शूर वीर होते;

¹⁷ बन्यामिन्यांपैकी एल्यादा हा एक महान योद्धा असून त्याच्याबरोबर धनुर्धारी व लढवय्ये दोन लक्ष लोक होते;

¹⁸ त्याच्या खालोखाल यहोजाबाद हा असून त्याच्याबरोबर युद्धास तयार असे एक लक्ष ऐंशी हजार पुरुष होते;

¹⁹ हे सर्व राजाच्या तैनातीस असत; राजाने यहूदाच्या सर्व तटबंदी नगरांतून लष्कर ठेवले होते ते वेगळेच.