1 थेस्सल 5 - पवित्र शास्त्र RV (Re-edited) Bible (BSI)

प्रभूचे आगमन व जागृतीची आवश्यकता

¹ बंधूंनो, काळ व समय ह्यांविषयी तुम्हांला काही लिहिण्याची गरज नाही.

² कारण तुम्हा स्वत:ला पक्के माहीत आहे की जसा रात्री चोर येतो, तसाच प्रभूचा दिवस येतो.

³ “शांती आहे, सुरक्षितता आहे” असे ते म्हणतात, तेव्हा गरोदर स्त्रीला ज्याप्रमाणे अकस्मात वेदना होतात त्याप्रमाणे त्यांचा अकस्मात नाश होतो, आणि ते निभावणारच नाहीत.

⁴ बंधुजनहो, त्या दिवसाने चोरासारखे तुम्हांला गाठावे असे तुम्ही अंधारात नाही.

⁵ कारण तुम्ही सगळे प्रकाशाची प्रजा व दिवसाची प्रजा आहात; आपण रात्रीचे व अंधाराचे नाही.

⁶ ह्यावरून आपण इतरांसारखी झोप घेऊ नये, तर जागे व सावध राहावे.

⁷ झोप घेणारे रात्री झोप घेतात, आणि झिंगणारे रात्रीचे झिंगतात.

⁸ परंतु जे आपण दिवसाचे आहोत त्या आपण सावध असावे; विश्वास व प्रीती हे उरस्त्राण व तारणाची आशा हे शिरस्त्राण घालावे.

⁹ कारण आपल्यावर क्रोध व्हावा म्हणून नव्हे, तर आपला प्रभू येशू ख्रिस्त ह्याच्या द्वारे आपले तारण व्हावे म्हणून देवाने आपल्याला नेमले आहे.

¹⁰ प्रभू येशू ख्रिस्त आपणांसाठी मरण पावला, ह्यासाठी की, आपण जागे असलो किंवा झोप घेत असलो तरी आपण त्याच्याबरोबर जिवंत असावे.

¹¹ म्हणून तुम्ही एकमेकांचे सांत्वन करा व एकमेकांची उन्नती करा; असे तुम्ही करतच आहात.

निरनिराळे सद्बोध व पत्राची समाप्ती

¹² बंधुजनहो, आम्ही तुम्हांला विनंती करतो की, तुमच्यामध्ये जे श्रम करतात, प्रभूमध्ये तुमच्यावर असतात व तुम्हांला बोध करतात त्यांचा तुम्ही सन्मान करावा;

¹³ आणि त्यांच्या कामामुळे त्यांना प्रीतीने अत्यंत मान द्यावा. तुम्ही आपसांत शांतीने राहा.

¹⁴ बंधूंनो, आम्ही तुम्हांला बोध करतो की, अव्यवस्थित लोकांना ताकीद द्या, जे अल्पधीराचे आहेत त्यांना धीर द्या. अशक्तांना आधार द्या, सर्वांबरोबर सहनशीलतेने वागा.

¹⁵ कोणी कोणाचे वाइटाबद्दल वाईट करू नये म्हणून जपून राहा आणि सर्वदा एकमेकांचे व सर्वांचे चांगले करत राहा.

¹⁶ सर्वदा आनंदित असा;

¹⁷ निरंतर प्रार्थना करा;

¹⁸ सर्व स्थितीत उपकारस्तुती करा; कारण तुमच्याविषयी ख्रिस्त येशूमध्ये देवाची इच्छा हीच आहे.

¹⁹ आत्म्याला विझवू नका;

²⁰ संदेशांचा धिक्कार करू नका;

²¹ सर्व गोष्टींची पारख करा; चांगले ते बळकट धरा;

²² वाइटाच्या प्रत्येक प्रकारापासून दूर राहा.

²³ शांतीचा देव स्वत: तुम्हांला परिपूर्णपणे पवित्र करो; आणि आपला प्रभू येशू ख्रिस्त ह्याच्या आगमनसमयी तुमचा आत्मा, जीव व शरीर ही निर्दोष अशी संपूर्णपणे राखली जावोत.

²⁴ तुम्हांला पाचारण करणारा विश्वसनीय आहे; तो हे करीलच.

²⁵ बंधूंनो, आमच्यासाठी प्रार्थना करा.

²⁶ पवित्र चुंबनाने सर्व बंधुवर्गाला सलाम करा.

²⁷ मी तुम्हांला प्रभूच्या नावाने निक्षून सांगतो की, हे पत्र सर्व पवित्र बंधूंना वाचून दाखवण्यात यावे.

²⁸ आपला प्रभू येशू ख्रिस्त ह्याची कृपा तुमच्याबरोबर असो.