१ राजे 16 - पवित्र शास्त्र RV (Re-edited) Bible (BSI)

¹ हनानीचा पुत्र येहू ह्याला बाशाच्या विरुद्ध परमेश्वराचे वचन प्राप्त झाले ते असे :

² “मी तुला धुळीतून वर काढून माझ्या इस्राएल लोकांचा अधिपती केले आहे, तरी तू यराबामाच्या मार्गाने चालला आहेस, तू माझ्या इस्राएल लोकांकडून पाप करवले आहेस, व त्यांनी आपल्या पातकांनी मला संतप्त केले आहे.

³ तर पाहा, बाशा व त्याचे घराणे ह्यांचा मी अगदी नायनाट करीन; आणि नबाटाचा पुत्र यराबाम ह्याच्या घराण्यासारखे तुझ्या घराण्याचे करीन.

⁴ बाशाचा जो कोणी नगराच्या आत मरेल त्याला कुत्री खाऊन टाकतील; त्यांच्यातला जो कोणी रानावनात मरेल त्याला आकाशातील पक्षी खाऊन टाकतील.”

⁵ बाशाने केलेल्या बाकीच्या गोष्टी, त्याने जे काही केले ते व त्याचा पराक्रम ह्या सर्वांचे वर्णन इस्राएलाच्या राजांच्या बखरीत केले आहे, नाही काय?

⁶ बाशा आपल्या पितरांजवळ जाऊन निजला व तिरसा येथे त्याला मूठमाती दिली; आणि त्याच्या जागी त्याचा पुत्र एला राजा झाला.

⁷ परमेश्वराचे वचन हनानीचा पुत्र येहू संदेष्टा ह्याच्या द्वारे बाशा व त्याचे घराणे ह्यांच्याविरुद्ध प्राप्त झाले; ह्याचे कारण हे की बाशाने यराबामाच्या घराण्याप्रमाणे परमेश्वराच्या दृष्टीने वाईट ते करून परमेश्वराला संताप आणला व त्याने नादाबास ठार मारले.

एलाची कारकीर्द

⁸ यहूदाचा राजा आसा ह्याच्या कारकिर्दीच्या सव्विसाव्या वर्षी बाशाचा पुत्र एला हा तिरसा येथे इस्राएलांवर राज्य करू लागला; त्याने इस्राएलांवर दोन वर्षे राज्य केले.

⁹ त्याचा चाकर जिम्री, जो त्याच्या निम्म्या रथांवर अधिकारी होता, त्याने त्याच्याविरुद्ध फितुरी केली. एला तिरसा येथे असताना तिरसातल्या मंदिराचा त्याचा कारभारी अरसा ह्याच्या घरी दारू पिऊन तो मस्त झाला;

¹⁰ तेव्हा जिम्रीने आत जाऊन त्याला ठार मारले; यहूदाचा राजा आसा ह्याच्या कारकिर्दीच्या सत्ताविसाव्या वर्षी हे झाले.

¹¹ तो राज्य करू लागला, आणि गादीवर बसताच त्याने बाशाच्या सर्व घराण्याचा संहार केला; त्याच्या आप्तमित्रांपैकी एक मुलगादेखील त्याने सोडला नाही.

¹² ह्या प्रकारे परमेश्वराने जे वचन येहू संदेष्ट्याच्या द्वारे बाशाच्या विरुद्ध सांगितले होते त्यानुसार जिम्रीने त्याच्या सर्व घराण्याचा नाश केला;

¹³ बाशाची सर्व पातके व त्याचा पुत्र एला ह्याचीही सर्व पातके जी त्यांनी स्वतः केली व इस्राएलाकडून करवून त्यांना व्यर्थ गोष्टींच्या नादी लावून इस्राएलाचा देव परमेश्वर ह्याला संताप आणला त्यामुळे असे झाले.

¹⁴ एलाने केलेल्या बाकीच्या गोष्टींचे व त्याने जे काही केले त्या सर्वांचे वर्णन इस्राएलाच्या राजांच्या बखरीत केले आहे, नाही काय?

जिम्रीची कारकीर्द

¹⁵ यहूदाचा राजा आसा ह्याच्या कारकिर्दीच्या सत्ताविसाव्या वर्षी जिम्री हा तिरसा येथे राज्य करू लागला; त्याने तिरसात सात दिवस राज्य केले. ह्या वेळी लोक पलिष्ट्यांच्या ताब्यातल्या गिब्बथोन नगराजवळ ठाणे देऊन राहिले होते.

¹⁶ जिम्रीने फितुरी करून राजाला मारून टाकले आहे असे ह्या ठाणे देऊन राहिलेल्या लोकांनी ऐकले त्याच दिवशी सर्व इस्राएलाने अम्री नामे मुख्य सेनापतीला छावणीतच इसाएलाचा राजा केले.

¹⁷ अम्रीने सर्व इस्राएलास बरोबर घेऊन गिब्बथोन सोडून तिरसास वेढा घातला.

¹⁸ नगर हस्तगत झाले असे जिम्रीने पाहिले तेव्हा तो राजवाड्याच्या बुरुजात गेला व त्याने राजवाड्यास आग लावून दिली आणि त्यात तो स्वतःही जळून मेला.

¹⁹ त्याने यराबामाचे अनुकरण केले व जे पाप त्याने इस्राएलाकडून करवले त्याच पापाच्या मार्गाने तो चालला; अशी पातके करून परमेश्वराच्या दृष्टीने जे वाईट ते त्याने केले म्हणून असे झाले.

²⁰ जिम्रीने केलेल्या बाकीच्या गोष्टी, त्याने केलेली फितुरी ह्या सर्वांचे वर्णन इस्राएलांच्या राजांच्या बखरीत केले आहे, नाही काय?

अम्रीची कारकीर्द

²¹ तेव्हा इस्राएल लोकांचे दोन भाग झाले; अर्धे लोक गीनथाचा पुत्र तिब्नी ह्याला राजा करावे म्हणून त्याच्या पक्षाचे झाले, व अर्धे लोक अम्रीच्या पक्षाचे झाले.

²² अम्रीच्या पक्षाच्या लोकांनी गीनथपुत्र तिब्नी ह्याच्या पक्षाचा पराभव केला; तिब्नी प्राणास मुकला आणि अम्रीला राजपद मिळाले.

²³ यहूदाचा राजा आसा ह्याच्या कारकिर्दीच्या एकतिसाव्या वर्षी अम्री इस्राएलावर राज्य करू लागला; त्याने बारा वर्षे राज्य केले; पहिली सहा वर्षे त्याने तिरसा येथे राज्य केले.

²⁴ त्याने शेमर ह्याच्याकडून शोमरोन डोंगर दोन किक्कार1 रुपे देऊन घेतला; त्या डोंगरावर त्याने एक नगर वसवले आणि त्या वसवलेल्या नगराला त्या डोंगराचा मूळचा मालक शेमर ह्याच्या नावावरून शोमरोन असे नाव दिले.

²⁵ परमेश्वराच्या दृष्टीने जे वाईट ते अम्रीने केले; त्याच्यापूर्वी जे होऊन गेले त्या सर्वांहून अधिक दुष्टाचार त्याने केला.

²⁶ नबाटाचा पुत्र यराबाम ह्याच्या सर्व मार्गांचे त्याने अवलंबन केले आणि जी पातके यराबामाने स्वतः करून इस्राएलाकडून करवली व त्यांना व्यर्थ गोष्टींच्या नादी लावून इस्राएलाचा देव परमेश्वर ह्याला संताप आणला, ती सर्व पातके त्याने केली.

²⁷ अम्रीने केलेल्या बाकीच्या गोष्टी व त्याने दाखवलेला पराक्रम ह्या सर्वांचे वर्णन इस्राएलाच्या राजांच्या बखरीत केले आहे; नाही काय?

²⁸ अम्री आपल्या पितरांजवळ जाऊन निजला, आणि त्याला शोमरोन येथे मूठमाती दिली, आणि त्याच्या जागी त्याचा पुत्र अहाब राजा झाला.

अहाबाची कारकीर्द

²⁹ यहूदाचा राजा आसा ह्याच्या कारकिर्दीच्या अडतिसाव्या वर्षी अम्रीचा पुत्र अहाब इस्राएलावर राज्य करू लागला; त्याने इस्राएलावर शोमरोन येथे बावीस वर्षे राज्य केले.

³⁰ अम्रीचा पुत्र अहाब ह्याने परमेश्वराच्या दृष्टीने जे वाईट ते केले; आपल्यापूर्वी होऊन गेलेल्या सर्वांपेक्षा अधिक वाईट वर्तन त्याने केले.

³¹ नबाटाचा पुत्र यराबाम ह्याच्या पापकर्मांचे अनुकरण करणे ही क्षुल्लक गोष्ट आहे असे त्याला वाटले. त्याने सीदोन्यांचा राजा एथबाल ह्याची कन्या ईजबेल हिच्याशी लग्न केले, आणि तो बआलमूर्तीची सेवा व पूजा करू लागला.

³² त्याने बआलाचे एक भवन शोमरोन येथे बांधले व त्यात बआलाप्रीत्यर्थ एक वेदी बांधली.

³³ अहाबाने अशेरा मूर्तीची स्थापना केली. त्याने इस्राएलाचा देव परमेश्वर ह्याला संताप आणण्याजोगी कामे आपल्यापूर्वी होऊन गेलेल्या इस्राएलाच्या सर्व राजांहून अधिक केली.

³⁴ त्याच्या कारकिर्दीत बेथेलकर हिएल ह्याने यरीहो नगर पुन्हा वसवले. त्याने त्याचा पाया घातला तेव्हा त्याचा ज्येष्ठ पुत्र अबीराम मरण पावला; आणि त्याने त्याच्या वेशी उभारल्या तेव्हा त्याचा कनिष्ठ पुत्र सगूब मरण पावला; परमेश्वराने नूनाचा पुत्र यहोशवा ह्याच्या द्वारे सांगितले होते त्याप्रमाणे हे झाले.