ZEPHANIAH 3 - KHYINGEI PU'TLOU Bible (BSI)

Jerusalemei Mral Heirou Aya Kalpikur

¹ Lhangaimakni borhyerbi, heirou thuithini marhotbi klei khukarthil neinungei kounakkei laknawo!

² Huikhatdei tlouya ane ninglhakbi chanthungkhou toukhi maklei; ari thimi hukhatdei shunmatupi tloukhi loulhakkhoumak; Umpuya uklum toukhi mak ari; heirou Dunpuei pongra yenkarnakkhi toukhoumak ari.

³ Aiyei Krung rapri yangkong'naksine rangbidik leilei; heirou aiyei lhou'urpu rapri masayei raancha yekshangnakne, ningshun nung-warbongyen anthru lunmairilnakne hoiyura.

⁴ Aiyei thimkhui rapri huyakhi lhou hoipimaklei, heiya lhangaimak thimirap hoiwurchiya; aiyei suipipu rapne Pucheemya borhyerwurchila; yani chaylamya toubaiwurla.

⁵ Tharmu chim Umpuri heiyei rilla thrungbine leilei, Anungei klal touri koukhi maklei; Ane ningshunser Aiyei tharmu chimmei picharya kandangthutpilei; Anungei shuikur toukhi maklei, heirou tharmu chimmak thimi rapne rikrai koukhi mupimaklei.

⁶ “Lim rapya Keine namsundabi maangyerwurla; yaiyei raalpal rapya nangbaiwurla; yaiyei khukarthillei khullamra hukhatkhi raanchamakura, yaiyei khukarthilri deekmaangurchiya; heingamei heiyei rillari thimi huchakhatkhi horkhoumakura, hukhatyakhi heirouwei leiyermakura.

⁷ Khukarthil heinungei Keine shunpikur, ‘Tanghakpane nangne Keiya chi-rikraini, Keiyei shunmatupiya ninglhaklanungri, khukarthil heirouwei klei thimi rapya maangyermakrou, heirou Keiyei tantikhi aidoura yongdayermakrou.’ Heiya yaneri ukningra duiduini marmokyerbi lhangaimak lhouyatom touwurla.

⁸ Ngam heineri Keiya loungaklak,” toubi Umpune shunlei, “Keiya loukarngeilak, Keine neidoura pichar tourou younei tlaini heiwaya karngeibine louleilak; kouweiyo toulanungri, Keine mardingurla, touri lim rapya ungkartilbine, heirou Krungbom rapyakhi Keine khumtilbine yaidoura Keiyei malungkhanei meiya shungsundapirou; heirouri tlaipangpal nammaya Keiyei malungkhanei meiwaira kaangtlumyerbi maangyerrouwa.

⁹ Heirouri Keine lim rapbei murpalya marthingpirou, heitoubi ya nammane Umpuei minya ungbine, heirou yane ukning khatsi khoine kantlangni Aya watlhou tourouwa.

¹⁰ Heirou Ethiopia'yei kung kraalne leikur Keiya khrumbi klei thimi rapnekhi, heirou hulchekkurbi leikur Keiyei thimi rapnekhi Keinungei ruiput makatdeirou.

¹¹ Heiyei tlaini heirouri Jerusalem nangne Keiya karhani borh lhou touwurkhou heinungei'tlim neiyari rikrai phayerpimarou; ngamri neiyei thimi rapne yaihangra napal toubi nungwaiwurkhou heirapya Keine louthutdurouwa; heirouri nane Keiyei Khying Lhungdoura leibi nane napal toubi tangcha manimarou.

¹² Heitoubi ukning khnim, heirou ukning khying thimi rapya naihangra Keine horkhoupirou, heirou yani Umpuya uklumbi kallenanungei Aya rapharou.

¹³ Heirouri Israel rapbei himalei thimi rapne borh toumarou, heirou yane mandalkhi yunmakarou; heirou yaiyei murrouwei minamnei tloukhi mayekphamarou; ngamri, yane watmakni chamaibi nungkngaini mathrilrouwa; hunekhi yayari marhotpimarou.”

Hakraowei Laa Sha

¹⁴ “Langthouni laa shalaklo, O Zion'yei chanapuiya, hakraone ungraolaklo, O Israelrap; naiyei ukning lhawai kyaone nungwaiyalo, O Jerusalemei chanapuiyarap.

¹⁵ Ngamri Umpune naidoura tanti heiri louthutdurla, heirou Ane naiyei yeekna thimi rapya hulthutdurla; Umpune naihangra Israellei Krung khoine thrungbini leilei, hannui kallengne naidoura klah dayermakarou.

¹⁶ Heiyei tlaini heirouri Jerusalem'nung atoubi shunrou, ‘Nangri chimaklo, O Zion, heirou neiyei hutbangkhi masewurbi manthuisundamakalo!’

¹⁷ Naihangra klei Umpu, naiyei Dunpu heiri mantrang klei Pume; Ane naya kalpirou; Ane naidoura malung khrahni langthoulei; Aiyei malungshina daakra naya khoupilei, heirou naidoura hakraowei laa shabine nungwailei.

¹⁸ Tlaini heirouri naiyei putkhrit hoikna klah-knangya Keine louthutdurbi, hakrao-nungkngai hoiyerpirou.

¹⁹ Thilak, heinaksi tlainirouri, naya marhotkhou thimi rapya Keine thilhakrouwa; heirou hodeek thimi rapya heirou marhotbi hulthutdurpi thimi rapya Keine kalthutpibi khum'mallongpirou, heitoubi rikrai phayerwurkhou thimi rapyakhi Keine maipaknara hollhakyerbi thimi rapbei hangra Keine yaya tangne mathangbaangpirou.

²⁰ Kheen heirouri Keine naya khumtilthurou; heitoubi naiyei cheemra yenrui'mallengthurou; heirou tlaipangpallei thimirap namyei maibongra naya Keine min chayerbi rikrai khrumyerrou; Keine naiyei likarsui lhangaiyerrei kheenrou naimitni kanre-kandangne murouwa,” toubi Umpune shunlei.