ZEPHANIAH 2 - KHYINGEI PU'TLOU Bible (BSI)

Ukning Hungnanungei Shunpi

¹ Naitam lokpane kartillaka; heirou naitam markhullaka, O chorit naimak limrap.

² Chaker homthaikur heinaksini naya hulthutbongnung, Umpuei malungkha heiwani naidoura yongdabongnung, heirou Umpuei meithukkei malungkha heiwani naidoura dabaangnung;

³ heirou tlaipangpallei ukning marnim thimi, na nammane Umpuya raphalaklo; Aiyei Chaytlouya chanthungbi, tharmu chimmei lhouya toulaklo; ukning khnimya marnolak, heiyanungri Umpuei malungkhanei tlainirouri naya kalpi phayerpirou.

Limdei Rapya Pichar Tounei

⁴ Kouweiyo toulanungri, Gaza'ya khingurbi lakurkhourouwa, heirou Ashkelon'yari raalla yultlai takyerrouwa; Ashdod'rei thimi rapyari nunghang tlaikalnung hulmatrairouwa; heitoubi Ekron'yari yrungphane phuithutyerrouwa.

⁵ Samadru ruithung yuldabi klei, Cherethia limyei thimirap, nanungeiri kounak laknayei shakrung hoikurawo! Kouweiyo toulanungri, Umpune naidoura yanimakni shunleime: “O Philistia ramrei Canaan, neiyari Keine maangyerrouwa, neiyei ramra thimi hukhatkhi lakkhoumakni yultlai taakyerrouwa.

⁶ Heitoubi Samadru ruiyei ram rapri yaosil thimi rapbei yuldananungei ram hoirouwa, heirou yaiyei rehnanungei shungrap heiri yaosilna ramhangnungei hoiyerrouwa.

⁷ Heitoubi Samadru ruirei ramrap heiri Judah'yei himaleithungkur thimi rapbei yuldana ram hoirouwa; yani bi heirou leibi, yaiyei yaorul rapya silbine, heitoubi masanungni yani Ashkelon rapbei cheem rapbei rilla ipmathrillou; heirou yaiyei Dunpu, Umpune yaya yilthipirou, heitoubi yaiyei raal manlouheinarei Ane yaya lhukthutpirou.

⁸ “Moab'ne khremknayei kyun tlouya Keine mayekkurla, heirou Ammonyei chanao rapbei laoknayei tlou rapkhi Keine mayekkurla; heisitoubi yani Keiyei thimi rapya laonabi thuithini mareknapiwurla, heitoubi yane tangchane, yaiyei ramkhi ri tonduibine lunglouheila.

⁹ Heingamei Keine ringleiyenri, Moab'ri Sodom'nakni mangrouwa; heitoubi Ammon'yei chanao rapri Gomorrah'naksine tlum'maangrouwa; heirouri yaiyei ram heiri mitti thukna sini thim'rouwa, heirou ramtrung-loutrung rapne pukphopburbi chaanser-tlaser klui naimakni mantrangkur ram hoirouwa; heitoubi Keiyei himalei thimi rapne yayari kul chalphopbi yaidoura pu khoini paalrouwa,” toubi Thangwan-Shimleiyei Pu Umpu, Israel rapbei Dunpuni shunlei.

¹⁰ Heisi toubine yaiyei tangchanei man khoini yani pharouwa; ngamri yani Thangwan-Shimleiyei Pu Umpuei thimi rapya yanimakne khremknane laonawurbi thuithini mareknakur.

¹¹ Umpuri yanungei beimakne chi'knayei shakrung hoirou; kouweiyo toulanungri, tlaipangpallei thrairap nammaya maangyerrouwa; heirouri thimi rapne Ayatom khrumrouwa; heirou lim namyerrei thimi kantangnikhi Ayatom khrumheirou.

¹² O Ethiopia'yei thimirap, nayakhi Keiyei raalshon'ne shaat'hatdeirou.

¹³ Heirouri Ane khalu lhangrei rammei doura karhane Aihut tlangthutrou heitoubi Assyria'ya maangyerrou; heitoubi Nineveh'ya yultlai takyerwurbi, shitnrui ram naksine taaryerrou.

¹⁴ Heirou yaorul, halrul rapne bi heirou changbini rehrouwa; yaalim-yoolim kantangnikhi bi heiyei rilla wachangbi yarekrouwa; heitoubi Krungkullei cheem lhoong doura malaangne, heirou pulaang rapne rabu sheembini leirouwa; masanungri khamputra tikini khungbi leirou; heitoubi raalpal shumtrum doura aakni chubi khungrou; kouweiyo toulanungri, khukarthillei manklu cheemrei Cedar heengrorap heiri nammaya lunglouheirouwa.

¹⁵ Khukarthil heiwari koukhatkhi tlou hoimakne langthoubi leikhou khukarthil khat; heirou aiyei ukningra atoubine kyun, ‘Kei ariyame, heirou keiya duirouri hu leileiyo?’ Heiya asinungri kou hungthukkura! Khukarthil heiwari deekbai thukwurbi, yaalim-yoolim rapne yarekna bi hoiwurbi, heiwaya heiral thimi rapne thibi mulanungri huttum rumbine, ‘Tat, kouthukka!’ toubine dechakhoubi heiraalwurlei.