ZEPHANIAH 1 - KHYINGEI PU'TLOU Bible (BSI)

¹ Judah'yei Krungbomra Amon'yei chanapawa Josiah'ne Krung hoiyei kheenrou, Hezekiah'yei chanapawa Amariah, Amariah'yei chanapawa Gedaliah, Gedaliah'yei chanapawa Cushi, Cushi'yei chanapawa Zephaniah'nung Umpuei paolaa atoubi shunthutpikur.

Umpu ne Pichar Tounei Tlaini

² “Tlaipangpalla ringbi klei putlim namyerwa Keine yertleng tlum'maangyerrouwa,” toubi Umpune paothutlei.

³ “Keine tlaipang thimile ramyaa rapyakhi tumni maangyerrouwa; nungthourei traichabi klei ramwaa rapyakhi, heirou Samadru rillei thanga rapyakhi namyerwaya maangyerouwa; heirou khril lhangaimak thimi rapkhi Keine namsundarouwa; heirou tlaipang thleimaira thimi lim rapya Keine maangyerouwa,” toubi Umpune paothutlei.

⁴ “Judah'yei doura karhani Keiyei hutbang tlangthutrouwa, heitoubi Jerusalem'ra klei thimirap namyerrei dourakhi wa'tlungyerrou; heirou Baal thraiya khrumbi klei thimi rapya khatchatomkhi bi heirouwei lakkhoumakni Keine louthutrou; heitoubi thrailha rapya khrumbi klei Chemrim touri suipipu rapbei minkhi kontlumbi maangyerrouwa.

⁵ Heirou cheem bungkhum doura kakabi nungthourei lharap touri kinni, tangla, sorwa lha rapya khrumbi klei thimirap, heirou Umpuei maibongra khrumbini Molechyei thrai Milcom'yei min tlangbini tlou kantomkur thimi rapya Keine maangyerchirouwa.”

⁶ Heitoubi Umpurei kallekthutdurbi, Aya raphanimak thimirap, heirou Anungei ngailounimak thimi rapyakhi Keine maangyerrouwa.

⁷ Dunpu, Umpuei maibongrari koutloukhi yunmakni mul-leiyalo; kouweiyo toulanungri, Umpuei tlainiri yennakurame; ngamri Umpune Aiyei khrumna put makatnungei marshikkurla; heitoubi Aiyei thimi rapya unglhakbini leiyurame.

⁸ Heirouri Umpuei khrumnaput makatninungri asitoubine hungthukrou-- “Krung rapyale, yaiyei chanao rapyakhi, heirou yaihangra younakhoumak shamb rapya bangbini chorit naimak lhoutou thimi rapyakhi Keine tanti piheirou.

⁹ Heiyei tlainihakrou Pucheem mangkhalla nuy-kallaochani chuncha thimi rapya heirou Pucheem rilla thimi hatbi hou toulungkur thimi rapyakhi Keine tanti piheirou.

¹⁰ Heiyei tlaini heirouri atoubi hungthukheirou,” toubi Umpune shunlei, “thanga lha yekbangna Jerusalemei shumtrum lhangrari ungraochabi chapnei houni thim'rouwa; heithangei ril'lhangei shumtrumrani kna'nrienei houya mayekrou; heitoubi lhungdourani thlei chinglhangurnei houya tangne mayekrou.

¹¹ Maktesh touri khate lhangei Mortar'ra klei thimirap, nane kanrelne ungraochabi chaplakalo, ngamri lal'hol thimirap, heirou sina-lapara dun thimirap namma maangchirouwa.

¹² Heitoubi kheen heirouri asitoubi hungthukheirou, Keine Jerusalem'ra meishar warbini raphaheirou, heitoubi tul malipnakni minung-minungei cheemwaira omphumbini, ukningra ningchabi, ‘Umpuri koukhi toumakrou, heirou lhangaikhi nimanung lhangaimakhi toumakroume,’ toubine kyun thimiyari Keine tanti piheirou.

¹³ Ngam heineri yaiyei putchei rapri raalla mulouchirou; heirou yaiyei cheem-kei rapkhi umdeekchirou; yani cheemkhi sabangrou, heiya heirouwei yani leiphamakrou; heirou yani darkha yekulkhi trunbi lingpukrou, heiya darkha heiri yani chaapha-mongphamakrou.

¹⁴ Umpuei tangkur Tlaini heiwari yennakkura; beimakni nakkurame; heirou beimak khnotne yennaklei; Umpuei Tlainiyei hou heiwari beimakne khalei; mantrang lhangai lhouwa rapkhi heininungri ungraochaeirou.

¹⁵ Heiyei Tlaini heirouri meithukne malungkhanei tlaini hoirou, heirou hou lungbi, klah-mrimni thimrouwa; deekbai thukbi, maangkur-khromkurne thimrou; kmehle lhawai klahne thimkur tlaini, heirou rameine hubphopkur tlaini khat hoirouwa.

¹⁶ Tlaini heiwari raalpalni kuikoolkur khukarthil rapbei lhangra karhani, heirou raal ngaakna shangkai rapya nangbainanungei raalsonei pengkul houni thimkur tlaini hoirouwa.

¹⁷ Heitoubi Keine thimi rapbei doura mrim-knang dayerrou, heirouri thimi rapne mitdeo thiminakne rancharouwa; ngamri yane Umpuya karhani borh touwurkhoula; heineri yaiyei heeri rahuinakne shungsundarou, heitoubi yaiyei sharungri deenak chulmangrouwa.

¹⁸ Umpuei malungkhanei Tlaini heirouri yaiyei sina-lapanikhi heirou yaiyei lalthum rapnekhi yayari kalpichangmakrou; heiya ram namyerwari Aiyei malungkhanei meithlanni madulchirouwa; kouweiyo toulanungri, tlaipangpallei klei thimilim namyerwaya chi'knayei shakrungra mitrup khatrou dongmaangyerrou.”