ZECHARIAH 9 - KHYINGEI PU'TLOU Bible (BSI)

Israel Cheemlhun Lim Rapya Pichar Tounei

¹ Umpuei tloulhangei putkhrit heiwari Hadrachyei doura leiyura, heirou Israellei limrap nammane Umpuei lhangra mai hollhakyei kheenrouri, thimi rapbei mit'thril heiwari Damascus'yei doura namma leirouwa.

² Heirou Israelkou rikarchunbi klei Hamath'khi, Tyre heirou Sidon'khi, yarap heiri beimakne shingkheiya hoiyanungkhi;

³ heirou Tyre'ne raalpal mantrangni sabaangbinekhi, heirou ane kulshanle, sinaya khullamrei rahuinak chungwane marpeilhakbinekhi;

⁴ thilak, Umpune ayari horthutdurbi khingurou, heitoubi aiyei lalthum rapkhi samadru rilla khingsundarou; heirou ayari meini yertleng kaangtlumyerouwa.

⁵ Ashkelon heiwaya mulhakkurbi chiwurchirou; heirou Gaza'nekhi heiwaya mulhakkurbi, yane beimak lhawai lapirou; heirou Ekron'nekhi yaiyei ningchakhouya malung'thrammakne tamungurbi leiheirou; heiyakhi duinara Gaza'yei Krungkhi heirou Ashkelon'khi yul damakne lakkurkhourou.

⁶ Heitoubi Ashdod'rari marhotkur lim rapne yuldabine paalrouwa; heirou Philistia rapbei tangchabi kanyerchanei thang'al heiwari Keine toudeekpirouwa.

⁷ Heirou aiyei murrouwei Keine aiyei heeya khrupthutpirou; heirou aiyei ha tlakrei aiyei machinkna borh rapya khralbine phorthutpirou; heiya yaihangrei himaleithung thimirap heiri kaiyei Dunpuei thimirap hoirouwa; heirou a heiri Judah cheemkhurrei thiminaksi hoirou; heitoubi Ekron'khi Jebusia thiminaksi hoirouwa.

⁸ Heirou Keine raallui naksine Keicheem karhilne kuikoolbi ngaksilpirou; heiyanungri bi heirou hunekhi kyongkhi-kakhi toubi kalleichabine karwaichamarou; heirou hanui kallengne yaidoura hukhatnekhi hotpimarou; ngamri, Keimitne yaya thibine leilei.

⁹ Kalthi nungwailakalo, O Zion'yei chanapuiyarap! Hakraoni ungraochalaklo, O Jerusalemei chanaorap! Thilak, naiyei Krung heiwari nanung hungleime; A heiri tharmu chim heirou Ralthutpi Pu; ukning khneem heirou gadha doura tungbine, hunekhi tungnamak gadha, touri gadha shunchaei doura tungbine hungleime.

¹⁰ Heirouri Keine Ephraim'yei sapuk kaariya, heirou Jerusalemei raal sapuk rapyakhi dantatrouwa; heitoubi yai raallei malaa-taak rapkhi toudeekpirouwa; heirouri Ane lim rapbei doura kyingei chaytlouya shunthutpirou, heitoubi Aiyei Pu hoinei Krungbom heiwari samadru khat'lhang 'rouweine khat'lhangra wa'tlungrou; heirou kung'rouweine tlaipangpal wadongna ramphane hoirouwa.

Judah'le Ephraim'yakhi Kalthutpi

¹¹ Nanungeikhi, Keine nakou mardingrilkur heeyei ngamne, yui taarna khur rilla raal manbi kul chalphopkhou naiyei thimi rapya Keine malhetthutpirou.

¹² Kallengalo, naiyei raalpal rilla, O malungam klei kul chalphopkur thimirap; angtuhak Keine shunthutdurlame, touri Keine nanungei siruk-khni duini mallenglhakroume.

¹³ Kouweiyo toulanungri, Keine Judah'ya Keiyei malaa-taak naknsine takutyerrou; heitoubi Ephraim'yari malachei khoini yrengpirou; heirou O Zion, neiyei chanapawa rapya malung toufyoubi neiyei chanao rapya karhane mayungyerroume, O Greece; heitoubi neiyari Keine lhouwa khatdei raalshon hoiyerou.

¹⁴ Heirouri Umpune yaidoura yuk'alpirouwa; heitoubi Aiyei malaa-cheiya liptlai alnaksine malhetrou, heitoubi Pu Dunpune pengkul yukhungrouwa; heitoubi khate lhangrei lhimnung-marthee mharle kalhonne charou.

¹⁵ Heirou Thangwan-Shimleiyei Pu Umpune yaya loushoupirou; heirouri yani raal maniwurbi, yeekna rapya kul-chalphopbeirou; heitoubi yani tul malip thiminakni ungraochabi raal sorou; heitoubi khrahpal doura khrumnaput makatnei hee shungsundakur heinaksine raal bomra yani hee kungyerheirou.

¹⁶ Heitoubi tlaini heirouri yaiyei Dunpu, Umpune Aiyei yaorullei thiminaksi yaya kalpiheirou; kouweiyo toulanungri, yarap heiri lukhuprei thlung-kwaarnakne, Aiyei ramra alyerbine leirouwa.

¹⁷ Heirouri Aiyei lhangai heiri kounak tangrou, heirou yunnungei makne karyuinarou! Ngamri ram heiyei trunwai heirou darkha heiyuini nangak-kartlang douwa rapbei mantrang hoinayerrou.