ZECHARIAH 6 - KHYINGEI PU'TLOU Bible (BSI)

Sapuk Kaari Phalitam Kar'ankmu

¹ Heirouri keine mangalthutbi thiyeinungri keimitni mulhakurla, thilak, lhungdou khintamyei tlakra sapuk kaari phalitam wathuk loukmu; heirou lhungdourap heiri kulshan lhungdou.

² Heirou lamkri kaariyei sapukrap heiri mraolei, heirou khintam tlung kaariyei sapukrap heiri khmong.

³ Heirou khyumtam tlung kaariyei sapuk rapri khngou; heirou phalitam tlung kaariyei sapuk rapri khngoubal-bungrangle, mraotronglei.

⁴ Heirouri keikou tlou kallangkril Thangring heiwanung keine mallangbine loukngai, “Arapri kouweiyo, keiyei Upawa?”

⁵ Heirou Thangringne loumallangbi keinungei loushun, “Arapri tlaipangpal namyerrei Pu Umpuei maibongra mayungkhoubi wathukkur thangmunrei Lhawai phalitam rapme.”

⁶ Sapuk khmong rapbei kaari heiwari khalu-lhangei ramranung kawura; heitoubi sapuk khngouwei kaari heiwane yaihilla chanthunglei; heirou sapuk khngoubal-bungrangle, mraotrong rapbei kaari heiwari khate-lhangei ramranung yuwura.

⁷ Heirou sapuk mraotrong rapne wathukkurle tallengni, bikhatra mulcha mayungchim'changmakne, tlaipangpal karyouni kyongle-kale toubi chancha'knine thiphakur. Heitounei ani heishun, “Shoh chalaka! Tlaipangpal karyouni kyongle-kale chanchalaka.” Heisitoubi yani tlaipangpal karyouni kyongle-kale chanchakur.

⁸ Heirouri ani ungraochani keinungei heishunbi atoubi kyun, “Thilak, khalu lhangei ramranungei kakakur sapuk rapne, ram heiyei doura klei Keiyei malungkhanei Lhawaiya malung damyerwurla.”

⁹ Heirouri Umpuei tlouni keinungei hanuikhi yongbine atoubi shunpithu:

¹⁰ “Nangne Babylon'ra raal manphopbi leikhounarei yenkallengbi klei Heldai, Tobijah, heirou Jedaiah'yei hutrei hutthul rapya loubine, heitoubi tlaini heihakrou Zephaniah'yei cha napawa Josiah'yei cheemra wachangalo.

¹¹ Heitoubi kulshanle, sina loubine lukhuprap sheemthutbi, heitoubi heirapya Josedech touri Jehozadak'yei cha napawa Suipipu upawa Joshua'yei lura makhupbaangpilaka.”

¹² Heitoubi anungei asitoubine shunpilak, “Thangwan-Shimleiyei Pu Umpune atoubi shunlei, ‘Thilak, BAN toubine min ung Napawa khatne, Aiyei leinabi heirouwei ban heisouthutbi tangbaangeirou; heitoubi A heiwane Umpuei Pucheemya sabaangeirou.

¹³ Umpuei Pucheem heiwari Ahakpane sabaangeirou; heirouri Ane thang'allei minthulya phabine, Aiyei Krungbom doura Ane Krung khoinikhi omheirou; heitoubi Aiyei Krungbom doura Ane Suipipu khat khoinekhi omrou; heitoubi lhoubom khintam heiyei tlakra Ane kyingni Picharpu khoini thrungeirou.’ ”

¹⁴ Asinungri lukhup heiwari Pucheemra Zephaniah'yei chanapawa'rap Heldai (Hebrew tloura ‘Helem’ toubikhi mu'kna), Tobijah, Jedaiah heirou Josiah (Hebrew tloura Hen toubikhi mu'kna- lingshang 10 ra kyao) yateinao phaliyei ningthutna khoine leirouwa.

¹⁵ “Ram tlatnarei thimi rapnekhi wabine Umpuei Pucheemya sabaangnara yaothungeirou. Heirouri Thangwan-Shimleiyei Pu Umpune Keiya nanungei yenmalhetpikur touri nane loumurouwa. Lhawairap heiri naiyei Dunpu, Umpuei Chaytlou rapya baimakne hil chanthunglanung hungthukkeirou.”