ZECHARIAH 5 - KHYINGEI PU'TLOU Bible (BSI)

Traichabi Klei Lailik'khyo

¹ Heirouri keine mai khreiwurbi, heitoubi keimit mangalbi thinarouri, thilak, traichabi klei lailik'khyo khat keine mukur.

² Heirou ane keinung heikngai, “Nangri kou loumulei?” Heirouri keine loumallangkur, “Lailik khyo khat, Dungrani thong somni shaang, heirou homrani thong chip paak khat traichabi klei heiwaya keine mulei.”

³ Heirouri ane keinungei shun, “Awari tlaipangpal karyoune wathukkur manchonei tloulhang kyao; kouweiyo toulanungri, lailik heirouri khat lhangrei mayekur hilthungni mucha thimiya maangyerrou; heirou sowal toubi klalni tlou kantomkur thimiyakhi lailik heiyei khatlhang mnaakrei mayekur hilthungni louthutdurou.

⁴ Keine lailik khyo heiwaya malhetthutrou,” toubi Thangwan-Shimleiyei Pu Umpune shunlei. “Heiwani mucha thimiyei cheemra trailhakrou, heirou Keiminra klalni tlou kantomkur thimiyei cheemrakhi trailhakrou; heitoubi lailik'khyo heiwane aicheemra leibine, heitoubi aicheemrei heengro heirou thlung lhuimakne kaangtumchirou.”

⁵ Heirouri keikou tlou kallangkril Thangring heiwane wathukbine keinungei shun, “Asinungri neimitni mangalthilaka, heitoubi wathukbi klei heiri kouweiyo toubi wathilaka.”

⁶ Heirouri keine, “Heiwari kouwo?” toubine loukngai. Heirou Ane, “Heiwari bluk-shangphai khatme.” toubine loushun. Heirouri Ane hanuikhi, “Heiwari tlaipangpalla yai touwurkhou borh lhouya mu'kname,” toubi yenyunthu.

⁷ Heirouri thilak, bluk-shangphai pingkhalna misikhum heiwari khanglatdurla; heitoubi bluk-shangphai rillari napuiya napung-khat ombine louklei.

⁸ Heirou Ane shun, “Ari Khril Lhangaimak hutlhame.” Heisitoubi Ane napuiya heiwiya bluk-shangphai rilla khinglhakkur; heitoubi misi'khumne bluk-shangphai maira hanui pingkhalkur.

⁹ Heirouri keine mangalthutbine thiyei kallouri, thilak, bi'heirou napuiya napung-khni wathukya keine loukmu; heirouri yani sha yapbi yentraithutkur; ngamri yane laangteyaei naksine sha klei; heirou yane bluk-shangphai heiri thleirei khanglouheibi nungthoura traibaangkur.

¹⁰ Heirouri keikou tlou kallangkril Thangring heiwanungei keine heikngai, “Yane bluk-shangphai heiri koulhangranung khaangloukurro?”

¹¹ Heirouri ani keinungei loushun, “Heiwari anungei Shinar ramra cheem khat sabaangna lhangranungeime; heirou yani cheem sachilanungri, bluk-shangphai heiri cheem heiyei rilla bi chani khoulhakpirou.”