ZECHARIAH 4 - KHYINGEI PU'TLOU Bible (BSI)

Sinayei Meitharl Heirou Olive Trungrap

¹ Heirouri keikou tlou kallangkril Thangring heiwane hanuikhi hungbine napawa khatne ipnarei fyoukur heinaksine keiya hungfyoukur.

² Heitoubi keinungei heikngai, “Nangne kouya muphaleiyo?” Heirouri keine loumallangbi kyun, “Thilak, sinayei meitharl khat, heiyei dourane meishar shirek-kok khat dunkhoubine, heitoubi heiyei doura meishar enitamkhi kyaone, heirou meishar enitam heirouwei meiruikhor khatsol mandokbine, heitoubi heirapya meitharl doura dunbaangbi klei keine muleime.”

³ Heitoubi heiyei pongra Olive trung khintamkhi pukbine klei, heirou trung khatne shirek kokyei thya lhangra, heirou khatneri thyoi lhangra katpukthutbine leilei.

⁴ Heitounei ngammei keikou tlou kallangkril Thangring heiwanungei keine heikngai, “Heirapri kouwo, keiyei Upawa?”

⁵ Heirouri keikou tlou kallangkril Thangring heiwane loumallangbi keinungei loushunpi, “Arapri kouwo touri nangne mumakhuiko?” Heirouri keine loushun, “Keiri mumakme, keiyei Upawa.”

⁶ Heirou ane loumallangbi keinungei shun, “Awari Zerubbabel'nungei shunpikur Umpuei tloulhangme, touri, Awari mantrangnikhi nimak, heirou roushingnikhi nimak, heiya Keiyei Lhawaini toukur lhoume,” toubine Thangwan-Shimleiyei Pu Umpune shunlei.

⁷ “Nangya kouwo, O Mane-Mantrang lhungdou? Zerubbabel'yei maibongra nangri phaitlai naksine hoirouwame; heirouri ane bi heirouwei lil'thlung khat, ‘Kringpi kheiyei kringpikhei!,’ toubi ungraochanei houle kalhonne yenthutpirou!”

⁸ Heiyakhi duinara Umpuei tloulhang heiwari keinungei hanuikhi yongbine,

⁹ Ane keinung shun, “Zerubbabel'yei hut rapri Pucheem heiyei cheemmun thulbangurla; heitoubi aiyei hutne Pucheem heiya sabaangbi luikhi-luilhakrou; heirouri Thangwan-Shimleiyei Pu Umpune Keiyari nanungei yenmalhet'pikurme touri nane murouwa.”

¹⁰ Hune put mandicha rapbei tlaini rapya lhou hoipimakko? Kouweiyo toulanungri thimi rapne Zerubbabel'yei hutra holmarkhena enitam shinbi klei heiwaya mubi haraorou. “Ngamri yarap heiri tlaipangpal karyouni kyongle-kale karwaichabi klei Umpuei mitlung enitam rapme.”

¹¹ Heirouri keine loumallangbi anung kngai, “Meitharl mnaak thyoi-thyarei pukbi klei Olive trungrap heiri kouwo?”

¹² Heirou keine mallangbi anungei hanuikhi loukngai, “Olive ban khintamra sinayei meirui khor khintam mandokbi, yairouwei sinayei shirek mlhathutbi klei heiwari kouwo?”

¹³ Heirouri ane loumallangbi keinungei loushunpi, “Arapri kouweiyo touri nangri mumakhuiko?” Heirouri Keine loushun, “Keiri mumakhuime, keiyei Upawa.”

¹⁴ Heirouri ane shunpikur, “Arapri tlaipangpal namyerrei Pu Umpuei watlhou tounanungei shirek teipikur thimi napung-khni heirime.”